އެމްޑީޕީގެ ރިޔާސީ ޕްރައިމަރީގެ ނަތީޖާ ލިބުނުތާ 24 ގަޑިއިރަށްވުރެ ގިނައިރު ފަހުން ބަލި ގަބޫލު ކުރެއްވުމަށްފަހު އެމަނިކުފާނުގެ ތާއީދު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ލިބޭނީ ނިޒާމު ބަދަލު ކުރަން މަސައްކަތް ކުރައްވާ ނަމަ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީގެ އެކި ސޯޝަލް މީޑިއާ ގްރޫޕުތަކަށް ނަޝީދު މީގެ ކުޑައިރުކޮޅެއް ކުރިން ފޮނުއްވި މެސެޖެއްގައި ވިދާޅުވީ ހޮނިހިރު ދުވަހުގެ އިންތިހާބުގައި ވޯޓުލީ މީހުންގެ ތެރެއިން ގިނަ މީހުން ވޯޓުލީ ރައީސް ސޯލިހަށް ކަމަށެވެ.
"އަޅުގަނޑު ލަފާ ކުރަނީ ވޯޓުލީ ވޯޓާސް ލިސްޓަށް ބަލައިފި ނަމަ ކުޑަ ފަރަގަކުން ރައީސް ސޯލިހު މޮޅުވެދާނެ ކަމަށް،" ނަޝީދު ވިދާޅުވެފައިވެ އެވެ.
ނަމަވެސް ނަޝީދު ވިދާޅުވީ ރައީސް ސޯލިހާއެކު ކުރިއަށް ގޮސް މި އަހަރުގެ ރިޔާސީ އިންތިހާބު ކާމިޔާބު ނުކުރެވޭނެ ކަމަށެވެ.
"ފިކުރެއްގެ ދިރުންގެ ފަރާތުން ތާއީދު ކުރާ ރިޔާސީ ކެންޑިޑޭޓު ކަނޑައަޅާނީ ފަހުން. ރިޔާސީ އިންތިހާބުގެ ކުރިއަށް ޕާލަމެންޓަރީ ނިޒާމަށް ބަދަލު ކުރުމަށް އެއްބަސްވާ ކެންޑިޑޭޓަކީ ތާއީދު ކުރަން ފަސޭހަވާނެ ކެންޑިޑޭޓެއް،" ނަޝީދު ވިދާޅުވެފައިވެ އެވެ.
އޭގެ އިތުރުން ނަޝީދު ވިދާޅުވީ އެމްޑީޕީން ކަނޑާލާފައިވާ މެމްބަރުން އަލުން ޕާޓީއަށް ވެއްދުމަށް ވެސް މަސައްކަތް ކުރަންޖެހޭ ކަމަށެވެ.
"އަޅުގަނޑު ހުށަހަޅަނީ ފިކުރެއްގެ ދިރުން ނަމުގައި އެމްޑީޕީ ގެ ގޮފިތައް ހުރިހާ ރަށެއްގައި ވެސް އަލުން ހަދާ، ކަނޑާލި 39،000 އަށްވުރެ ގިނަ މީހުން އަލުން އެމްޑީޕީ އާއި ގުޅި އެމީހުންނާއެކު އަޅުގަނޑުމެންނަށް ފެންނަ ގޮތް ނިންމުމަށް،" ނަޝީދު ވިދާޅުވި އެވެ.
މީގެ ކުރިންވެސް ނަޝީދުގެ ބަރުލަމާނީ ވިސްނުމާއި ޝަރުތުތަކަށް ރައީސް ސޯލިހު އެއްބަސްވެފައެއް ނުވެ އެވެ. އެގޮތުން މިދިޔަ އަހަރު ބޭއްވި އެމްޑީޕީގެ ކޮންގްރެސްގައި ނަޝީދު ހުށަހެޅުއްވި ބަރުލަމާނީ ގަރާރު ވެސް ރައީސް ސޯލިހާ މަޝްވަރާ ކުރެއްވުމަށްފަހު އަނބުރާ ގެންދެވީ އެވެ.
ހޮނިހިރު ދުވަހުގެ ޕްރައިމަރީ ރައީސް ސޯލިހު ކާމިޔާބުކުރެއްވީ 61 އިންސައްތަ ވޯޓާއެކު އެވެ. ނަޝީދަށް ލިބިވަޑައިގަތީ 39 އިންސައްތަ ވޯޓެވެ. އެ އިންތިހާބުގައި 40،000 އަށްވުރެ ގިނަ މެމްބަރުން ވޯޓުލި އެވެ.
