މިއަދު މުޅި ރާއްޖޭގައި ކުރިއަށްގެންދިޔަ މޯލްޑިވިއަން ޑިމޮކްރެޓިކް ޕާޓީގެ ރިޔާސީ ޕްރައިމަރީ ބޮޑު ތަފާތަކުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކާމިޔާބު ކުރައްވައިފި އެވެ.
މި އިންތިހާބުގައި މުޅި ރާއްޖޭގައި 243 ވޯޓު ފޮށި ބެހެއްޓިއިރު މިހާތަނަށް ގުނި 150 ފޮށީގެ ނަތީޖާއިން ރައީސް ސޯލިހު ވަނީ ވޯޓުލީ މީހުންގެ 65 ޕަސެންޓް ވޯޓު ހޯއްދަވައިފަ އެވެ. އެހެންކަމުން މި އިންތިހާބުގެ މިހާތަނަށް ގުނުނު ވޯޓަށް ބަލާއިރު، ވާދަ ކުރައްވާ އަނެއް ކެންޑިޑޭޓު، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮޅަށް ނަތީޖާ އެނބުރޭނެ ކަމަށް "އަދަދު" އަކަށް ނުބެލެވެ އެވެ.
މިއަދުގެ އިންތިހާބުގައި ވޯޓު އޮޅުވާލަން ބަޔަކު މަސައްކަތް ކުރި ކަމަށް ނަޝީދު ވަނީ ތުހުމަތު ކުރައްވައިފަ އެވެ. އަދި އެމަނިކުފާނުގެ ބައެއް މަންދޫބުން އަދި ސަޕޯޓަރުން ނުހައްގުން ހައްޔަރު ކުރި ކަމަށް ވެސް ނަޝީދު ތުހުމަތު ކުރެއްވި އެވެ.
"ބައެއް ވޯޓު ފޮށިތައް ކައިރީގައި އަޅުގަނޑުގެ ފަރާތުން ތިބި ކިތަންމެ އޮބްޒާވަރުންނާއި ތާއީދު ކުރާ މީހުން ފުލުހުން ވަނީ ހައްޔަރުކޮށްފަ. އެ މީހުން ވަގުތުން ދޫކޮށްލުމަށް އަދި ވޯޓު ގަޑުބަޑު ކުރާ މީހުންނާމެދު ފިޔަވަޅު އެޅުމަށް ގޮވާލަން،" ނަޝީދު ވިދާޅުވި އެވެ.
މިހާތަނަށް ގުނި ފޮށިތަކުން މި އިންތިހާބުގައި ގާތްގަނޑަކަށް 30،000 އަށް ވުރެ ގިނަ މެމްބަރުން ވަނީ ވޯޓުލައިފަ އެވެ. މިއީ އެތެރޭގެ އިންތިހާބެއްގައި އެންމެ ގިނަ މީހުން ވޯޓުލި ފަހަރެވެ. ގާތްގަނޑަކަށް 57،000 އަށް ވުރެ ގިނަ މީހުންނަށް މި އިންތިހާބުގައި ވޯޓުލުމުގެ ހައްގު ލިބުނެވެ.
