މިހާރު ކުރިއަށްދާ އެމްޑީޕީގެ ރިޔާސީ ޕްރައިމަރީގައި ގދ. ތިނަދޫގައި ކުރިއަށް ގެންދާ ވޯޓުލުމުގެ ތެރެއިން ޖެހުނު ހަމަނުޖެހުމެއްގައި ތިނަދޫ ދެކުނު ދާއިރާގެ މެންބަރު އަބްދުﷲ ސަނީފް އާއި އާންމުން ކުރިމަތިލާ ހަމަނުޖެހުމެއް ހިނގައިފި އެވެ.
މިހާރު ސޯޝަލް މީޑިއާގައި ދަނީ ސަނީފް އާއި އާންމުންގެ ދެމެދުގައި ހިނގި ހަމަނުޖެހުމުގެ ވީޑިއޯއެއް ދައުރުވަމުންނެވެ. އެ ވީޑިއޯއިން ފެންނަނީ ވޯޓު ފޮށި ބަހައްޓާފައި ހުރި ސަރަހައްދުގައި ސަނީފް އާއި އިތުރު ބައެއްގެ ދެމެދުގައި ހަމަނުޖެހުމެއް ހިނގާ ސަނީފް ބިންމައްޗަށް ވެއްޓޭ މަންޒަރެވެ.
މިކަމާ ގުޅިގެން ސަނީފް "އަދަދު"އަށް ވިދާޅުވީ، މި ކުރިމަތިލުން ހިނގާފައި ވަނީ ވޯޓުލާ މަރުކަޒަށް އިދިކޮޅު ޕީޕީއެމްއަށް ނިސްބަތްވާ މީހަކު ވަދެ ވޯޓުފޮށި ފަޅާލަން މަސައްކަތް ކުރަން ފެށުމުން ކަމަށެވެ. އެ ހަމަނުޖެހުން ހިނގާފައި ވަނީ ވޯޓުގެ ފޮޓޯ ނަގަން ފެށުމުން ކަމަށް އޭނާ ވިދާޅުވި އެވެ.
އެ ވަގުތު ވޯޓުލާ މަރުކަޒުގައި ވެސް ތިބީ މަދު ފުލުހުން ކޮޅެއް ކަމަށާއި، ސަނީފް އަމިއްލައަށް އެ ހަމަނުޖެހުމުގެ ތެރެއަށް ވަނީ "ވޯޓުފޮށި ހިމާޔަތް ކުރުމަށް" ކަމަށެވެ.
"ފޮށި ހިމާޔަތްކުރަން ހުރެފައި ފޮށި ދަމައިގަތީމަ ދެން ފޮއްޓާ ދިމާކުރަން އައި ކުއްޖާާ ގައިގަ ބައްދައިގަތީ އަޅުގަނޑު. ފޮށީގަ އަަނެއްކާވެސް ނުހިފުވަން ވެގެން." މިކަން ހިނގިގޮތް ހިއްސާކުރައްވަމުން ސަނީފް ވިދާޅުވި އެވެ.
ސަނީފް އިތުރަށް ވިދާޅުވީ، މި ހަމަނުޖެހުމުގެ ތެރެއިން އޭނާ ވެއްޓި އަނިޔާ ވެސް ލިބިފައިވާ ކަމަށެވެ. ލިބުނު އަނިޔާގެ ތަފްސީލެއް ނުދެއްވަ އެވެ.
ގދ. އަތޮޅު ތިން ރަށެއްްގައި މިހާތަނަށް ހަމަނުޖެހުންތަކެއް ހިނގާފައި ވެއެވެ. ރަތަފަންދޫގައި ހިނގި ހަމަނުޖެހުމުގެ މައްސަލާގައި ދެ އޮބްޒާވަރަކު ހައްޔަރު ވެސް ކުރި އެވެ. ތ. މަޑިފުށީގައި ވެސް ބަހައްޓާފައި ހުރި ވޯޓު ފޮއްޓެއް ވަނީ ފަޅާލައިފަ އެވެ. އެ ތަނުގައި ހަމަނުޖެހުން ހިނގަން ފެށީ، ވޯޓާސް ލިސްޓުގައި ނަން ނެތް މީހަކު ވޯޓުލާފައިވާ ކަމަށް ބުނެ އެވެ.
