ލަންޑަން (ޖެނުއަރީ 26) - އިނގިރޭސި ޕްރިމިއާ ލީގުގެ ތަށި ހޯދަން އާސެނަލުން މި ސީޒަނުގައި ކުރާ މަސައްކަތުގައި މެންޗެސްޓާ ސިޓީއާ ވާދަކުރަން ބޭނުންނުވާ ކަމަށާއި އެ ޓީމުގެ ކޯޗަކަށް ހުރި ޕެޕް ގާޑިއޯލާއާ ދެކޮޅަށް އެ ފަދަ ޗެލެންޖަކަށް ނުކުތުން "ފަސޭހައެއް ނުވާނެ" ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
އާސެނަލްގެ ކޯޗުކަމާ 2019 ވަނަ އަހަރު ހަވާލުވުމުގެ ކުރިން އާޓެޓާ މަސައްކަތް ކުރަމުން އައީ ސިޓީގައި ގާޑިއޯލާގެ އެސިސްޓަންޓް އަކަށެވެ. ސިޓީގައި ގާޑިއޯލާއާ އެކު މަސައްކަތްކުރިއިރު، އާޓެޓާ ވަނީ އެ ކްލަބާ އެކު، ދެ ޕްރިމިއާ ލީގާއި ދެ ލީގު ކަޕާއި އެއް އެފްއޭ ކަޕް ކާމިޔާބުކޮށްފަ އެވެ.
އާޓެޓާ ވަނީ ގާޑިއޯލާގެ ސިޓީ ބަލިކުރުމަށް ފަހު، 2020 ވަނަ އަހަރުގެ އެފްއޭ ކަޕް، އާސެނަލަށް ކާމިޔާބު ކޮށްދީފަ އެވެ. އާސެނަލް، މި ވަގުތު އިނގިރޭސި ޕްރިމިއާ ލީގުގެ އެއް ވަނައިގައި އޮތީ ދެ ވަނައިގައި އޮތް ސިޓީ އަށް ވުރެ، އެއް މެޗު މަދުން ކުޅުނު ނަމަވެސް ފަސް ޕޮއިންޓްގެ ލީޑަކާ އެކު އެވެ.
އެފްއޭ ކަޕްގައި ހުކުރު ދުވަހުގެރޭ ސިޓީއާ ދެކޮޅަށް އާސެނަލުން ނުކުންނަ މެޗުގެ ކުރިން އާޓެޓާ ބުނީ ކޮންމެ މުބާރާތެއް ކަމުގައި ވިޔަސް، އަދި މި ވަގުތު ޕްރިމިއާ ލީގުގައި ސިޓީ އަށް ވުރެ ކުރީގައި އޮތް ނަމަވެސް އެ ޓީމާ ވާދަކުރަން ގާޑިއޯލާއާ ދެކޮޅަށް ނުކުންނަން ޖެހުމުން ކުރެވެނީ "އެހެން އިހުސާސެއް" ކަމަށެެވެ.
"އަހަރެން އަބަދުވެސް އެދެނީ އޭނަ (ގާޑިއޯލާ) އަށް ރަނގަޅު ގޮތްވުމަށް. އެހެންވެ، މި ބުނަނީ އެ ފަދަ ގޮތަކަށް އެދޭ މީހަކާ ދެކޮޅަށް ނުކުންނަން ފަސޭހައެއް ނުވާނެއޭ. ތެދެއް މި ވަގުތު ލީގުގައި އަހަރެމެން ކުރީގައި އޮތަސް އެ ހާލަތުގައި ވެސް އަހަރެން ބޭނުމެއް ނޫން، އޭނައާ ވާދައެއް ކުރާކަށް،" އާޓެޓާ ބުންޏެވެ.
ޕްރިމިއާ ލީގުގައި ކުޅުމުގެ ކެރިއަރުގައި އާސެނަލާއި އެވަޓަންގެ ކެޕްޓަންކަން ވެސް ކުރި އާޓެޓާ ބުނީ ގާޑިއޯލާއާ ދެމެދު އޮންނަ އެކުވެރިކަމަށް ފުޓްބޯޅަ މެޗެއްގެ ސަބަބުން ބުރޫ އަރާނެ ކަމެއް ނުހިނގާނެ ކަމަށެވެ. އަދި ޕްރޮފެޝަނަލީ އެ އޮންނަ ހަމައެއްގެ ތެެރެއިން ދެ މީހުން ވެސް އަމިއްލަ ޓީމު މޮޅުކުރަން ކަންކަން ކުރާނެ ކަމުގެ ޔަގީންކަން އެކަކު އަނެކަކަށް އޮންނަ ކަަމަށް އާޓެޓާގެ ވާހަކައިގައި ވަނީ ފާހަގަކޮށްފަ އެވެ.
މި ސީޒަނުގެ ބާކީ ބައިގައި އާސެނަލާއި ސިޓީގެ ތިން ކުރިމަތިލުމެއް އެބައޮތެވެ. އެއީ، ކުރިއަށް އޮތް އެފްއޭ ކަޕްގެ މެޗުގެ އިތުރުން، 15 ފެބްރުއަރީ އާއި 26 އޭޕްރީލްގައި ކުޅެން ޝެޑިއުލްކޮށްފައިވާ ޕްރިމިއާ ލީގުގެ މެޗުތަކެވެ.
އާޓެޓާ ބުނީ ސިޓީއާ ދެކޮޅަށް ނުކުންނަން ޖެހޭ މީގެއިން ކޮންމެ މެޗެއް ވެސް މުހިންމު ކަމަށާއި އަދި އެފްއޭ ކަޕްގެ މެޗު މި ވަގުތު ކުރިމަތީގައި އޮތްއިރު، މި މެޗުގެ ނަތީޖާގެ އަސަރު "ސައިކޮލޮޖިކަލީ" ސީޒަންގެ ބާކީ ބައިގައި އާސެނަލްގެ ކުޅުންތެރިންނަށް ކުރުމުގެ ފުުރުސަތު އޮންނާނެ ކަމަށެވެ.
