މި ސަރުކާރުގެ 60 އިންސައްތަ ސަރުކާރު ކޯލިޝަނުގައި ހިމެނޭ އެހެން ޕާޓީތަކަށް ދޫކޮށްލީ ފަސް އިންސައްތަ ވޯޓު ހޯދުމަށްޓަކައި ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ހޮނިހިރު ދުވަހު ބާއްވާ އެމްޑީޕީގެ ރިޔާސީ ޕްރައިމަރީ ކެމްޕޭނުގައި އައްޑޫ މަރަދޫގައި ރޭ ވާހަކަފުޅު ދައްކަވަމުން ނަޝީދު އިތުރަށް ވިދާޅުވީ މިއީ ސެޕްޓެމްބަރު މަހު އޮންނަ ރިޔާސީ އިންތިހާބަށް އެމްޑީޕީއިން އެހެން ޕާޓީތަކާއެކު ކޯލިޝަން ހެދުމުގެ ވާހަކަ ދައްކަންވީ ވަގުތު ނޫން ކަމަށެވެ.
"އިއްތިހާދެއް ވާން ޖެހެންޏާ އަޅުގަނޑުމެން އެކަން ކުރަން ޖެހޭނީ ދެވަނަ ބުރުގައި"
ނަޝީދު މިހެން ވިދާޅުވެފައިވާއިރު ރައީސް އިބްރާހިމް މުހައްމަދު ސޯލިހު، އެމަނިކުފާނުގެ ކެމްޕޭނުގައި ތަކުރާރުކޮށް ވިދާޅުވަމުން ދަނީ ރިޔާސީ އިންތިހާބު ކާމިޔާބު ކުރެވޭނެ ގޮތަކީ ޕާޓީތަކާއެކު ކޯލިޝަނެއް ހެދުން ކަމަށާއި، އެމްޑީޕީގެ ރިޔާސީ ޓިކެޓު އެމަނިކުފާނަށް ލިބިވަޑައިގަންނަވާ ހާލަތެއްގައި ކޯލިޝަން ހެދުމުގެ މަސައްކަތް ކުރައްވާނެ ކަމަށެވެ.
ނަމަވެސް، އެކަމަށް ރައްދު ދެއްވަމުން ނަޝީދު ވިދާޅުވީ ރިޔާސީ އިންތިހާބުގެ ފުރަތަމަ ބުރުގައި ހުރިހާ ސިޔާސީ ޕާޓީތަކަށް ވޯޓު ދިނުމުގެ ފުރުސަތު ރައްޔިތުންނަށް ދިނުމަށް ގާނޫނު އަސާސީން ވެސް ލާޒިމު ކުރާ ކަމަށެވެ. އަދި، އެ ޕާޓީތަކުގެ ސިޔާސަތުތައް ވެސް ރައްޔިތުންނަށް ހުށަހަޅަންޖެހޭ ކަމަށް ނަޝީދު ވިދާޅުވި އެވެ.
"މި ވަގުތު އަޅުގަނޑުމެން ފަސް ޕަސެންޓު ވޯޓު ހޯދަން، ސަރުކާރުގެ 60 ޕަސެންޓު މިވަނީ ކޯލިޝަން ޕާޓީތަކަށް ދޫކޮށްލާފައި" ނަޝީދު ވިދާޅުވި އެވެ.
އަދި، މިކަމުގެ ސަބަބުން އެމްޑީޕީގެ ސަރުކާރެއް ގެންނަށް ގިނަ މަސައްކަތް ކުރި އެ ޕާޓީގެ މެންބަރުން މަގުމަތިވެފައިވާ ކަމަށްބުނެ ޝަކުވާ ކުރާ ކަމަށް ނަޝީދު ވަނީ ރޭ ވިދާޅުވެފަ އެވެ. ނަޝީދު އިތުރަށް ވިދާޅުވީ އިއްތިހާދުގެ ސިޔާސަތުތައް ތަންފީޒުކުރާ އިރު އެމްޑީޕީ މެންބަރުންނަށް އޮންނަ ފުރުސަތުތައް އަބަދުވެސް އޮންނަނީ މަދުވެފައި ކަމަށެވެ.
މިހާރު އޮތް ސަރުކާރު ހިންގާ ކޯލިޝަނުގައި އެމްޑީޕީގެ އިތުރުން ހިމެނެނީ ޖުމްހުރީ ޕާޓީ، އަދާލަތު ޕާޓީ، އަދި އެމްއާރުއެމް އެވެ.
ޕްރައިމަރީ ކެމްޕޭނުގެ ތެރެއިން ނަޝީދު ވަނީ ސަރުކާރު ކޯލިޝަން އުފެދިފައިވާ ގޮތަށް ވަރަށް ބޮޑަށް ފާޑުވިދާޅުވެފަ އެވެ. އެގޮތުން، ސަރުކާރު ކޯލިޝަނެއް އެކުލަވާލާއިރު ޕާޓީތަކަށް ޕަސެންޓު ކަނޑައަޅަންޖެހޭނީ ލިބޭ ވޯޓުގެ އަދަދަށް ބަލާފައި ކަމަށްވެސް ނަޝީދު ވަނީ މީގެ ކުރިން ވިދާޅުވެފަ އެވެ.
އަދި، މި ސަރުކާރަކީ އެމްޑީޕީގެ ސަރުކާރެއް ނޫން ކަމަށާއި، ސަރުކާރުން އެމްޑީޕީގެ ސިޔާސަތުތައް ތަންފީޒު ނުކުރަނީ ކޯލިޝަންގެ ސިޔާސަތުތައް ތަންފީޒު ކުރުމަށް ކަމަށް ވިދާޅުވެ މި ކެމްޕޭނުގެ ތެރެއިން ސަރުކާރު ހިންގަމުންދާ ކޯލިޝަނުގެ ސިޔާސަތާ ދެކޮޅަށް އެމަނިކުފާނު ދަނީ ތަކުރާރުކޮށް ވާހަކަފުޅު ދައްކަވަމުންނެވެ.
