މި މަހުގެ 28 ވަނަ ދުވަހު ބާއްވަން ނިންމާފައިވާ ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީ ކާމިޔާބު ކުރެވިއްޖެ ކަމަށާއި، މިހާރު ވިސްނުން ހުރީ ރިޔާސީ އިންތިހާބާ ދިމާލަށް ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ޕްރައިމަރީގައި ރައީސް އިބްރާހިމް މުހައްމަދު ސޯލިހާ ދެކޮޅަށް ނުކުންނަވާ ހުންނެވި ނަޝީދު މިހެން ވިދާޅުވީ އެމްޑީޕީގެ މާލެއަށް ވޯޓުލާ މެންބަރުންނާއި އެމަނިކުފާނުގެ ކެމްޕޭނަށް އަލަށް ގުޅުނު ޓީމުތަކާ ރޭ ބައްދަލުކުރައްވާ ދެއްކެވި ވާހަކަފުޅުގަ އެވެ.
"ޕްރައިމަރީ އަޅުގަނޑު ދެކެނީ، އިރާދަކުރެއްވިއްޔާ މިއޮތީ އަޅުގަނޑުމެންނަށް ކާމިޔާބުކުރެވިފަ, އަޅުގަނޑު މިހާރު ވިސްނަނީ ސެޕްޓެމްބަރު ނުވަޔަކަށް [ރިޔާސީ އިންތިހާބަށް] އަޅުގަނޑުމެން މަސައްކަތް ކުރާނެ ގޮތް" ނަޝީދު ވިދާޅުވި އެވެ.
ނަޝީދު އިތުރަށް ވިދާޅުވީ ރިޔާސީ އިންތިހާބު ކާމިޔާބު ކުރުމަށް އެމްޑީޕީއިން ވަރަށް ބޮޑަށް ތައްޔާރުވާންޖެހޭ ކަމަށާއި، ބޮޑު އިންތިހާބު ކާމިޔާބު ކުރުމާ މެދު ވިސްނުން ބަހައްޓައިގެން ނޫނީ ކުރިއަށް އޮތް ހަފުތާ ތަކުގައިވެސް ޕާޓީއިން މަސައްކަތް ކޮށްގެން ނުވާނެ ކަމަށެވެ.
ނަމަވެސް، ނަޝީދު ވިދާޅުވީ ސެޕްޓެމްބަރު މަހު އޮންނަ ރިޔާސީ އިންތިހާބު އެމްޑީޕީއަށް ފަސޭހަވާނެ ކަމަށް ގަބޫލުކުރައްވާ ކަމަށެެވެ. ސަބަބަކީ އެމްޑީޕީއަށް އޮތް ތާއީދު ބޮޑުވާނެ ކަމަށް ފެނުމާއި، ވާދަވެރި އެހެން ޕާޓީއަކުން ބޮޑު އިންތިހާބާ ދިމާލަށް މިސްރާބު ޖަހާ ތައްޔާރުވަމުން ނުދާތީ ކަމަށެވެ.
"އަޅުގަނޑުމެން ޕާޓީ ވަރަށް ބޮޑަށް މިއޮތީ އިންތިހާބުގެ މޯޑަށް، ޕާޓީ އިންތިހާބުގެ ގިޔަރަށް އައިސްފައި، އޭތި ހުއްޓުވޭނެ ގޮތެއް އަޅުގަނޑަކަށް ނުފެނޭ" ނަޝީދު ވިދާޅުވި އެވެ.
ރާއްޖޭގެ ރަށްރަށުން ދެން އެމްޑީޕީގެ ދިދަ ނެގުން ނުހުއްޓުވޭނެ ކަމަށާއި، ޕާޓީ ދަނީ ރިޔާސީ އިންތިހާބާ ދިމާލަށް ވަރަށް ބާރަށް ކުރިއަށް ކަމަށްވެސް ނަޝީދު ވިދާޅުވި އެވެ. އަދި، ރޭގެ ބައްދަލުވުމުގައި ތިބި މެންބަރުންގެ އަރިހުންވެސް ނަޝީދު ވަނީ އެބޭފުޅުންގެ ވިސްނުންވެސް ޕްރައިމަރީއާ އެކު ބޮޑު އިންތިހާބަށްވެސް ބެހެއްޓުމަށް އެދިވަޑައިގެންފަ އެވެ.
