ލާމަރުުކަޒީ އުސޫލުން ރާއްޖެ ހިންގެން އޮތީ ފެޑެރަލް ނިޒާމަކަށް ދިވެހި ދައުލަތް ބަދަލުކޮށްގެން ކަމަށް، އެމްޑީޕީގެ ރިޔާސީ ޕްރައިމަރީގައި ވާދަކުރައްވާ އެ ޕާޓީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ގއ. ވިލިނގިލީގައި ހުޅުވާފައިވާ "އަންނި ހަރުގެ" ގައި މިއަދު ހަވީރު އޮތް ސައިފޮދަކަށް ފަހު، ސަޕޯޓަރުންނާ ވާހަކަ ދައްކަވަމުން ނަޝީދު ވިދާޅުވީ ފެޑެރަލް ނިޒާމަކީ ރާއްޖެއަށް ވަރަށް ގުޅޭނެ ނިޒާމެއް ކަމަށެވެ.
"މި ހުވަދޫ އަތޮޅުގެ ކަންކަން ނިންމާނީ ހުވަދު އަތޮޅު މީހުން، ހުވަދު އަތޮޅު މީހުން އެ ކަމަކަށް އިންތިހާބުކޮށްފައިވާ ވަކި ބަޔަކު، އެހެން އެ ގޮތަށް ދާން، އަޅުގަނޑަށް ވެސް ފެނޭ ފެޑެރަލް ނިޒާމެއް ގެންނަން،" ރައްޔިތުންގެ މަޖިލީހުގެ ރައީސަކަށް ވެސް ހުންނެވި ނަޝީދު ވިދާޅުވި އެވެ.
ރާއްޖޭގައި އޮންނަނީ ޔުނިޓަރީ ދައުލަތެކެވެ. ގާނޫނު އަސާސީގައި ބަޔާންކޮށްފައި އޮންނަނީ އެ ގޮތަށެވެ. ޔުނިޓަރީ ދައުލަތުގެ މައި ސިފައަކީ، މައި ސަރުކާރުގައި ހުރިހާ ބާރެއް އޮތުމާއި ދައުލަތް ހިމެނޭ ހުރިހާ ސަރަހައްދެއްގައި އެއް ގާނޫނުތަކެއް ހިންގުމެވެ.
ފެޑެރަލް ދައުލަތެއްގައި އެ ސަރަހައްދެއްގައި ވަކި ސަރުކާރެއް އޮވެ، އެ ސަރަހައްދެއްގެ ކަންކަން ބަލަހައްޓާނީ އެ ސަރަހައްދެއްގެ ސަރުކާރުންނެވެ. އެފަދަ ނިޒާމުތަކުގައި ވެސް މައި ސަރުކާރެއް އޮވެ، މައި ސަރުކާރުގެ ދައުރު އެކި ފެންވަރުގައި ބަޔާންކޮށްފައި އޮވެ އެވެ. އަދި ފެޑެރަލް ގާނޫނެއް އޮވެ، އެ ގާނޫނުގައި އޮންނަ ގޮތުގެ މަތިން، އެކި ސަރަހައްދުތަކުގައި ހިނގާނީ އެ ސަރަހައްދެއްގެ އަމިއްލަ ގާނޫނެވެ.
އެމްޑީޕީގެ ރިޔާސީ ޕްރައިމަރީ އޮންނާނީ ޖެނުއަރީ 28 ގަ އެވެ. އެ ޕްރައިމަރީގައި 57،000 އެއްހާ މީހުނަށް ވޯޓުދެވެ އެވެ. ނަޝީދުގެ އިތުރަށް އެ ޕްރައިމަރީގައި ވާދަކުރައްވަނީ މިހާރުގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހެވެ އެވެ.
ނަޝީދަކީ މީގެ ކުރިން ތިން ފަހަރު މަތިން ވެސް ޕްރައިމަރީ މެދުވެރިކޮށް ރިޔާސީ ޓިކެޓު ކާމިޔާބު ކުރެއްވި ކެންޑިޑޭޓެވެ. ނަމަވެސް 2018 ވަނަ އަހަރު ނަޝީދަށް އިއްވާފައިވާ ޖަލު ހުކުމާ ހުރެ، ވާދަކުރުމުގެ ފުރުސަތު ގެއްލުނީތީ، އެމްޑީޕީ ކޮންގްރެސް މެދުވެރިކޮށް ރައީސް ސޯލިހަށް ރިޔާސީ ޓިކެޓު ދިނުމަށް ނިންމީ އެވެ.
