މި ސަރުކާރުން ބައެއް ރަށްރަށުގެ މަގުތަކާއި ބަނދަރުތައް ތަރައްގީ ކުރި ނަމަވެސް އެމަނިކުފާނު ކަންބޮޑުވަނީ ސަރުކާރުން ރައްޔިތުންްގެ އާމްދަނީ އިތުރުވާނެ ކަންކަން ނުކުރާތީ ކަމަށް މޯލްޑިވިއަން ޑިމޮކްރެޓިކް ޕާޓީގެ ރިޔާސީ ޓިކެޓު ހޯއްދަވަން ނުކުމެ ހުންނެވި އެ ޕާޓީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީ ރިޔާސީ ޕްރައިމަރީ ކެމްޕެއިނުގެ ތެރެއިން ރޭ ގދ. ގައްދޫގައި ވާހަކަދައްކަވަމުން ނަޝީދު ވިދާޅުވީ އެ ރަށަށް ރައީސް އިބްރާހިމް މުހައްމަދު ސޯލިހު 2018 ވަނަ އަހަރު ވެ ވަޑައިގެން ތިން ވައުދުގެ ތެރެއިން އެއް ވައުދު ވެސް ފުއްދިފައި ނުވާ ކަމަށް އެ ރަށުގެ ރައްޔިތުން އެމަނިކުފާނު ކައިރި ބުނެފައިވާ ކަމަށެވެ.
އެގޮތުން ގައްދޫގައި އަޅަން ބުނި ހޮސްޕިޓަލުގައި އޮތީ 'އަންނަނީ' އަޅުވާފައި ކަމަށް ސިފަކުރައްވަމުން ނަޝީދު ވިދާޅުވީ ސަރުކާރުން އެ ހޮސްޕިޓަލު ބިނާކުރާނެ ކަމަށް ބުނި ނަމަވެސް މި ދައުރުގެ ތެރޭގައި އެކަން ވާނެ ކަމަށް އެމަނިކުފާނު ދެކިވަޑައިނުގަންނަވާ ކަމަށެވެ.
ދެން ނަޝީދުގެ ވާހަކަފުޅުގައި އިޝާރާތް ކުރެއްވީ ސަރުކާރުގެ ވައުދުތައް ފުއްދުމުގައި ލަސްވުމާއި ބެހޭގޮތުން އެމަނިކުފާނުގެ ކެމްޕޭނުގައި ތަކުރާރުކުރައްވަމުން ގެންދަވާ ވާހަކަޔާ ދިމާލަށެވެ.
"ބައެއް ކަންތައްތައް އެބަ ކުރޭ ބަނދަރުތައް އެބަ ހަދާ، އެކަމަކާ އަޅުގަނޑު އިންކާރެއް ނުކުރަން، ހެދޭނެ، 42 ބިލިއަން ރުފިޔާ ހުސްކުރަން ޖެހޭނެ ތާ!،" ނަޝީދު ވިދާޅުވި އެވެ.
ނަޝީދު ވިދާޅުވީ ސަރުކާރަށް މި މަޝްރޫއުތައް ހިންގަން މަޖުބޫރުވަނީ ދައުލަތުގެ އާމްދަނީ އިންތިހާއަށް ބޮޑުވެފައިވާތީ ކަމަށެވެ. އެހެންކަމުން ބޮޑުވަމުންދާ އާމްދަނީ ކޮންމެވެސް ކަމެއް ކޮށްކޮށް ތިބެން ޖެހޭނެ ކަމަށް ނަޝީދު ވިދާޅުވި އެވެ.
"[މަސައްކަތް] ނުކޮށްގެން އަޅުގަނޑުމެން މި ކަންބޮޑުވަނީ، ރައްޔިތުންގެ އާމްދަނީ އިތުރުވާ ކަންކަން، މަގެއް އަޅައިގެން ޖީބަށް ވަންނާނެ ފައިދާއެއް އިތުރެއް ނުވާނެ،" އެމަނިކުފާނު ވިދާޅުވި އެވެ.
އޭގެ އިތުރުން، މަގުތަކާއި ބަނދަރުތައް ބޭނުން ކަމަށާއި އެކަމަށް ދެކޮޅު ނުހައްދަވާކަން ސާފުކޮށްދެއްވަމުން ނަޝީދު ދެންވެސް ތަކުރާރުކުރެއްވީ އެ މަޝްރޫއުތަކުން ރައްޔިތުންގެ ޖީބަށް ވަންނަ ފައިސާ އިތުރު ނުވާނެ ކަމަށް ވިދާޅުވި ވިދާޅުވުމެވެ.
"މި ރާއްޖެއެއް ތަރައްގީވެގެންނެއް ނުދާނެ، ތަނަވެސްވެއެއް ނުދާނެ، މި ރާއްޖޭގެ ގުދުރަތީ ވަސީލަތްތައް ރަނގަޅު ގޮތުގައި ބޭނުންނުކުރެވޭހާ ހިނދަކު،" ނަޝީދު ވިދާޅުވި އެވެ.
މިސާލު ޖައްސަވަމުން އެ އަތޮޅު ފަރެސްމާތޮޑާގައި ދެއްކެވި ވާހަކަފުޅު ތަކުރާރުކުރައްވާ ނަޝީދު ވިދާޅުވީ އެމަނިކުފާނު ބޭނުންފުޅުވަނީ މިހާރު 17ރ. ހުރި މަސް ކިލޯއެއްގެ އަގު 25ރ. އިތުރު ކުރެއްވުމަށް ކަމަށެވެ. އަދި އެއީ ފަސޭހަކަމާއެކު ސަރުކާރަށް ކުރެވެން އޮތް މަސައްކަތެއް ކަމަށް އެމަނިކުފާނު ވިދާޅުވި އެވެ.
