ލަންޑަން (ޖެނުއަރީ 19) - އިނގިރޭސި ޕްރިމިއާ ލީގުގައި މެންޗެސްޓާ ސިޓީގެ ފޯމު ދަށްވެ، ތާވަލްގެ އެއް ވަނައިގައި އޮތް އާސެނަލް އަށް ވުރެ އަށް ޕޮއިންޓް ފަހަތަށް އެ ޓީމު ޖެހިލާފައިވާއިރު، މިއީ ސިޓީގެ ކޯޗުކަމާ ހަވާލުވި ފަހުން ކުރިމަތިވި އެންމެ އުނދަގޫ ހާލަތު ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.
އެންމެ ފަހުގެ ޗެމްޕިއަން ސިޓީ މި ފަހަަކަށް އައިސް ނެރިފައިވާ ދަށް ނަތީޖާތަކާ އެކު، އެ ޓީމާއި އާސެނަލްއާ ދެމެދު އޮތް ފަރަގު ވަނީ ބޮޑުވެފަ އެވެ. އިނގިރޭސި ޕްރިމިއާ ލީގުގައި މިރޭ ޓޮޓެންހަމް ހޮޓްސްޕާއާ ދެކޮޅަށް އަމިއްލަ ދަނޑުގައި ނުކުންނައިރު، މި މެޗުން މޮޅެއް ހޯދަން ސިޓީ އަށް މުހިންމެވެ.
ތާވަލްގެ ދެ ވަނައިގައި އޮތް ސިޓީއާ ވާދަވެރި މެންޗެސްޓާ ޔުނައިޓަޑުން މިހާރު ވަނީ ސިޓީއާ ޕޮއިންޓްގެ ގޮތުން އެއްވަރުކޮށްފަ އެވެ. އަދި މިރޭ ޓޮޓެންހަމް މޮޅުވެއްޖެ، ސިޓީ އާއި އެ ޓީމާދެމެދު އޮތް ފަރަަގު ތިން ޕޮއިންޓަށް ކުޑަވާނެ އެވެ.
މެޗުގެ ކުރިން ނޫސްވެރިންނާ ވާހަކަދައްކަމުން ގާޑިއޯލާ ބުނީ މިއީ ސިޓީގެ ކޯޗުކަމާ އޭނާ ހަވާލުވި ފަހުން ކުރިމަތިވި އެންމެ އުނދަގޫ ހާލަތު ކަމަށެވެ. އަދި މި ވަގުތު ޓީމު އޮތް ފޯމަށް ބަލާއިރު، ގަދަ ހަތަރެއްގެ ޖާގައެއް ވެސް މި ސީޒަންގައި ލިބޭނެކަން ޔަގީންކަމާއެކު ބުނެވެން ނެތް ކަމަށް ގާޑިއޯލާ ވަނީ ބުނެފަ އެވެ.
"މިހާރު މިއީ ލީގު ޗެމްޕިއަންކަން ހޯދުމަށް ކިތައް މެޗުން މޮޅުވަންޖެހޭތޯ ވިސްނަންވީ ވަގުތެއް ނޫން. މި ވަގުތު ވިސްނަންވީ ކުރިއަށް އޮތް މެޗަށް. މެޗަކަށް ފަހު މެޗަކަށް،" ގާޑިއޯލާ ބުންޏެވެ.
ލީގުގައި އެންމެ ފަހުން ކުޅުނު ތިން މެޗުން ސިޓީ މޮޅުވީ އެންމެ މެޗަކުންނެވެ. ވޯލްޑް ކަޕްގެ ބްރޭކްގެ ކުރިން ރަނގަޅު ފޯމެއްގައި ހުރި ސިޓީގެ ފޯވާޑް، އާލިން ހާލަންޑަށް ވެސް އެންމެ ފަހުން ކުޅުނު ތިން މެޗުގައި ލަނޑެއް ނުޖެހެ އެވެ.
ގާޑިއޯލާ ބުނީ އެންމެ ފަހުން ކުޅުނު ދެ މެޗުގައި ހާލަންޑަށް ލަނޑު ނުޖެހުނީ އޭނާ އަށް އެކަށީގެންވާ ފުރުސަތުތައް ތަނަވަސްނުވުމުން ކަމަށާއި ޓީމު ކުޅުނީ ފުރުސަތުތައް ތަނަވަސްކުރެވޭ ގޮތަކަށް ނޫން ކަމަށެވެ.
"އަހަރެންގެ މައްސަލައެއް ކަމަށް މި ގަބޫލްކުރަނީ. އެއީ އެޓޭކްކުރަންޖެހޭ ގޮތް ކުޅުންތެރިނަށް ރަނގަޅަށް ކިޔައިނުދެވުނީ ކަމަށް އަހަރެން މި ބަލަނީ،" ގާޑިއޯލާ ބުންޏެވެ.
ސިޓީން އެންމެ ފަހުން ޓޮޓެންހަމާ ދެކޮޅަށް ކުޅުނު ދެ މެޗުން ވެސް ވަނީ ބަލިވެފަ އެވެ. ގާޑިއޯލާ ކޯޗުކޮށްދިން ޓީމެއް މިހާތަނަށް އެއް ޓީމެއް އަތުން ޖެހިޖެހިގެން ތިން މެޗުން ބަލިވެފައިނުވެ އެވެ.
އިއްތިހާދު ސްޓޭޑިއަމްގައި މިރޭ ސިޓީން ޓޮޓެންހަމާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން ދަންވަރު 1 ޖަހާއިރު އެވެ.
