ގަނެ ވިއްކުމުގެ އުސޫލުން ކޯލިޝަން ހަދައިގެން އެކިއެކި ޕާޓީއަށް އޮތް މަދު ތާއީދު އެއްކޮށްގެން ގިނަ ވޯޓު ހޯދުމަށް ވުރެ، ރަނގަޅު ސިޔާސަތެއް ދައްކައިގެން މާ ގިނަ ވޯޓު ހޯދޭނެ ކަމަށް އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މީގެ ކުރިން 2008 އަދި 2013 ގައި ވެސް އެމްޑީޕީގެ ރިޔާސީ ކެންޑިޑޭޓަކަށް ހުންނެވި ނަޝީދު އަނެއްކާ ވެސް އެމްޑީޕީގެ ރިޔާސީ ޓިކެޓު ހޯއްދެވުމަށް ވާދަކުރައްވާއިރު އެމަނިކުފާނު ގެންދަވަނީ ކޯލިޝަން ހެދުމުގެ އުސޫލުތަކާ ގުޅޭ ގޮތުން ވާހަކަފުޅު ދައްކަވަމުންނެވެ.
ނަޝީދުގެ ވިސްނުންފުޅަކީ ދެވަނަ ބުރުގައި ކޯލިޝަން ހެދުމެވެ. ފުރަތަމަ ބުރުގައި ރައްޔިތުންނަށް އިހުތިޔާރުތައް ގިނަކޮށް ލިބެން ވާނެ ކަމަށާއި، ކޮންމެ ސިޔާސީ ޕާޓީއަކުން ވެސް ނުކުމެ ވާދަކުރަން ވާނެ ކަމަށް ނަޝީދު ދެކެވަޑައިގަންނަވަ އެވެ.
"ކޯލިޝަނަކީ ވަކި މީހަކު ހުރެގެންވާ ކަމެއް ނޫން. އޭރުގެ ހާލަތަކާއި ސިޔާސީ ހަގީގަތްތައް އޭރުގެ މައްޗަށް ކޯލިޝަން މި އުފެދެނީ. ރައީސް ސޯލިހަކީ އެމްޑީޕީން ދެއްކި ކެންޑިޑޭޓް، އެހެން ލީޑަރުން އަދި އަޅުގަނޑު ވެސް ބަންދުގައި ހުރުމުން ޑިމޮކްރަސީއަށް އަލުން ދާން އެކުގައި ނުކުތީ،" ނަޝީދު ވިދާޅުވި އެވެ.
ނަޝީދުގެ ވާހަކަތައް އެ ގޮތަށް ދައްކަވަނީ، އެމަނިކުފާނާ ދެން ވާދަކުރައްވާ ރައީސް އިބްރާހީމް މުހައްމަދު ސޯލިހްގެ ސަރުކާރު ކޯލިޝަންގެ އޮތް ޕާޓީތަކުގެ ތާއީދާއެކު އެމްޑީޕީގެ ރިޔާސީ ޓިކެޓުގައި އެމަނިކުފާނު ނުކުންނަވަން ފުރުސަތު ދެއްވަން ވާހަކަ ދައްކަވަމުން ދާތީ އެވެ.
"ދިވެހި ޗެނަލް" އަށް ނަޝީދު ދެއްވި އިންޓަވިއުއެއްގައި އެމަނިކުފާނު ވިދާޅުވީ ރައީސް ސޯލިހުގެ އެ ވިސްނުންފުޅަކީ "ޓްރާންސިޝަނަލް ޕޮލިޓިކިސް" ކަމަށެވެ. ގަނެ ވިއްކާ އުސޫލުން ސަރުކާރު ފަޅިކުރަން އެއްބަސްވެ، ކޯލިޝަން ހެދުން ގޮތުގައި ނަޝީދު ސިފަކުރެއްވި އެވެ.
"އެއީ ރައީސް ސޯލިހުގެ ރެލެވެންސް، އެކަމަކު އަޅުގަނޑަށް އެބަ ފެނެއޭ އެމްޑީޕީގެ މަގުބޫލުކަން އިތުރުވާވަރު، ކޮންމެ އިންތިހާބަކަށް ފަހު ވެސް، އެ ފަލްސަފާ ފެތުރިގެންދާ ވަރު، ރައްޔިތުން މިހާރު ތިބީ ރަނގަޅު ސިޔާސަތުތަކެއް ހުށަހަޅާ ޕާޓީއަކާ އެކު ކުރިއަށް ދާން،" ނަޝީދު ވިދާޅުވި އެވެ.
އެމްޑީޕީގެ ފުރަތަމަ ސަރުކާރުގެ ރައީސަކަށް ވެސް ހުންނެވި ނަޝީދު ވިދާޅުވީ އެންމެ ފަހުުން ބޭއްވި މަޖިލީހުގެ އިންތިހާބުގައި ބޮޑު އަގުލަބިއްޔަތެއް އެމްޑީޕީއަށް ލިބުނު ސަބަބަކީ ވެސް ރަނގަޅު ސިޔާސަތުތަކެއް ދެއްކުން ކަމަށެވެ. ދެން ވެސް އެމްޑީޕީއަށް ކުރި ހޯދެން އޮތީ އެ މަގުން ކަމަށް ނަޝީދު ވިދާޅުވި އެވެ.
ނަޝީދު ވިދާޅުވީ ދިވެހިން ވަރަށް ބޮޑަށް ޑިމޮކްރެސީއަށް ހޭނެމުން އަންނަ ކަމަށެވެ. އަބަދު އެއް ގޮތެއްގައި ތިބުމުގެ ބަދަލުގައި ދިވެހިން ދެން ފާރަލާނީ ވެސް ރަނގަޅު ސިޔާސަތުތަކެއް ދައްކަން އޮތް ޕާޓީއަކަށް ކަމަށެވެ.
މި ސިފަތައް ނަޝީދު ސިފަކުރެއްވީ "އަނެއް ދިވެހިރާއްޖޭގެ މަލަމަތި" ގޮތުގަ އެވެ. ސަރުކާރުގެ ވެރިންނަށް ބަރޯސާވުމުގެ ބަދަލުގައި، ރައްޔިތުންގެ ތަނަވަސްކަން ހޯދޭނެ ސިޔާސަތުތަކެއް މާ ބޮޑަށް ރައްޔިތުން ބޭނުންވާ ކަމަށް ނަޝީދު ވިދާޅުވި އެވެ.
