ކުރީގެ ރައީސް މުހައްމަދު ނަޝީދުގެ ވެރިކަމުގައި ދުނިޔެއާ ކުރިމަތިވި ފައިނޭންޝަލް ކްރައިސިސްއާއި, މި ވެރިކަމުގައި ކުރިމަތިވި ކޮވިޑުގެ ހާލަތާ ރައީސް އިބްރާހިމް މުހައްމަދު ސޯލިހް އަޅާކިއުއްވައިފި އެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ހއ. ކެލައަށް ވަޑައިގެން އެ ރަށުގެ އެމްޑީޕީ މެމްބަރުންނާ ވާހަކަފުޅު ދައްކަވަމުން ރައީސް ސޯލިހް ވަނީ ކޮވިޑްގެ ހާލަތުގައި ސަރުކާރުން ރައްޔިތުންނަށް ވެދިން އެހީ ފާހަގަކުރައްވާފަ އެވެ. އެގޮތުން, ކަރަންޓާއި ފެނުން ސަބްސިޑީ ދިން ކަމާއި, އިންކަމް ސަޕޯޓުގެ ވާހަކަ ފާހަގަކުރެއްވި އެވެ.
ރައީސް ވިދާޅުވީ, ސަރުކާރެއްގެ ދައުރަކީ މިފަދަ ހާލަތްތަކުގައި ރައްޔިތުންނަށް އެހީވުން ކަމަށާއި, 2008 ވަނަ އަހަރުގެ ފައިނޭންޝަލް ކްރައިސިސްގައި ފެނިގެން ދިޔައީ އެ މަންޒަރު ނޫން ކަމަށެވެ.
"ސިވިލް ސާވިސްގެ މުސާރަ ކުޑަކުރީ، މުވައްޒަފުން މަދުކުރީ. މިހެން ގޮސް ރައްޔިތުން ތަކުލީފުތަކެއް އުފުލަން ޖެހޭ އެތައް ކަމެއް އެ ވަގުތު ކުރެއްވި،" ނަޝީދުގެ ސަރުކާރުން ނިންމި ބައެއް ނިންމުންތަކާ ގުޅޭގޮތުން އެމަނިކުފާނު ވިދާޅުވި އެވެ.
އަދި އެއީ ސަރުކާރުން ކަން ކުރަންޖެހޭ ގޮތް ކަމަށް ގަބޫލު ނުކުރައްވާ ކަމަށް ވެސް ރައީސް ސޯލިހު ވިދާޅުވި އެވެ.
އެފަދަ ދަނޑިވަޅެއްގައި ރިސްކު ނަގަން ޖެހޭނީ ސަރުކާރުން. އަޅުގަނޑުމެން މި ގެންދަނީ އެކަން ކުރަމުން.
ރައީސް ވިދާޅުވީ, އެފަދަ ހާލަތްތައް ކުރިމަތިވުމުން ރިސްކު ނަގަންޖެހޭނީ ސަރުކާރުން ކަމަށާއި, އެކަމުގައި ރައްޔިތުންނަށް ތަކުލީފު ޖެއްސުމަކީ ރަނގަޅު ގޮތް ނޫން ކަމަށެވެ. މި މޭރުމުން ވާހަކަ ދައްކަވަމުން ރައީސް ވިދާޅުވީ, އެމަނިކުފާނާ އެކު ކުރިއަށް ދިއުމަކުން ރައްޔިތުންނަށް ދެރަގޮތެއް ނުވާނެ ކަމަށެވެ.
"ސަރުކާރެއްގެ ބޭނުމަކީ އެއީ. ދިމާވާ ދަތި ދަނޑިވަޅުތަކުގައި ރައްޔިތުންނަށް އެހީތެރިކަން ފޯރުކޮށްދިނުން. ދުނިޔެއަށް ޖެހޭ އިގްތިސާދީ ދަތި އުނދަގޫގެ އަސަރު ރާއްޖެއަށް ވެސް ކުރާނެ،" ރައީސް މިއަދު ވިދާޅުވި އެވެ.
ރިޔާސީ ޕްރައިމަރީގައި އެމަނިކުފާނު ހޮވަންޖެހޭ ކަމަށް ދެކެވަޑައިގަންނަވާ ސަބަބުތައް ވެސް ރައީސް މިއަދު ތަކުރާރު ކުރެއްވި އެވެ.
ހއ. ކެލާގައި ބޭއްވި ޖަލްސާގައި ރައީސް ވާހަކަފުޅު ދައްކަވަނީ. ރިޔާސީ އިންތިހާބު ކާމިޔާބު ކުރެވޭނެ ފޯމިއުލާ އޮތް ކަމަށް ވިދާޅުވި --- ފޮޓޯ: އެމްޑީޕީ ކުރިއަށް ކެމްޕޭން
އެމަނިކުފާނު ވިދާޅުވި ގޮތުގައި ޕްރައިމަރީ އަކީ ޕާޓީގެ އެހެން އެތެރޭގެ އިންތިހާބުތަކާ ތަފާތު އިންތިހާބެއް ކަމަށާއި, އެއީ އެހެން އިންތިހާބުތަކުގައި ޕާޓީގެ މަގާމުތަކަށް ކޮންމެ މީހަކު ވެސް ހޮވިދާނެތީ ކަމަށެވެ. އަދި، ޕްރައިމަޜީގައި ހޮވާ މީހަކީ ރިޔާސީ އިންތިހާބު ކާމިޔާބު ކުރަންޖެހޭ މީހެއްކަން ފާހަގަކުރެއްވި އެވެ.
ރާއްޖޭގެ ސިޔާސީ މަސްރަހަށް އަލިއަޅުއްވާލައްވާ ރައީސް ވިދާޅުވީ މިވަގުތު ރާއްޖޭގައި އެއް ޕާޓީއަކަށް އިންތިހާބު ކާމިޔާބު ނުކުރެވޭނެ ކަމަށާއި, އެއީ ނާދިރު ކަމެއް ކަމަށް ވިދާޅުވެވިދާނެ ކަމަށެވެ.
އެހެންކަމުން ރިޔާސީ އިންތިހާބު ކާމިޔާބު ކުރެވޭނެ ފޯމިލާއަށް ވިސްނުމަށްފަހު ވޯޓު ދެއްވުމަށް އެމަނިކުފާނު ވަނީ އިލްތިމާސްކުރައްވާފަ އެވެ. އެމަނިކުފާނު ވިދާޅުވީ ރިޔާސީ އިންތިހާބު ކާމިޔާބު ކުރުމުގެ ފޯމިލާ އެބަ އޮތް ކަމަށެވެ.
އެމަނިކުފާނު މި އިންތިހާބު ކާމިޔާބު ކުރަން އެމްޑީޕީ މެންބަރުން އެހީތެރިވާން ޖެހެނީ ހަމައެކަނި އެމްޑީޕީއަށް ނޫންކަން ފާހަގަކުރައްވާ ރައީސް ވިދާޅުވީ އެމަނިކުފާނު ވެރިކަމުގައި ހުންނަވައިގެން ހިންގަވާ މަޝްރޫއުތަކުގެ ސަބަބުން ފައިދާވަނީ މުޅި ރާއްޖޭގެ ރައްޔިތުންނަށް ކަމަށެވެ.
އަދި، ރައްޔިތުން ބޭނުންވާ ގޮތަށް ކަންކަން ކުރިއަށް ގެންދަވާނެ ކަމަށާއި, ވެރިކަން ކުރައްވަން ލިބިވަޑައިގެންނެވި ކުޑަ ދުވަސްކޮޅުގައި ވެސް ގިނަ މަޝްރޫއުތައް ހިންގިފައިވާކަން އެމަނިކުފާނު ފާހަގަކުރެއްވި އެވެ. މިހާރު ހިންގަމުންދާ މަޝްރޫއުތައް ނިންމުމަށް އެމަނިކުފާނު ވެރިކަމަށް ވަޑައިގަތުން މުހިންމު ކަން ފާހަގަކުރައްވާ ވެސް ވާހަކަފުޅު ދެއްކެވި އެވެ.
