މެންޗެސްޓާ (ޖެނުއަރީ 17) - މެންޗެސްޓާ ޔުނައިޓެޑުން ކުޅުންތެރިންނަށް ދެމުން އަންނަ މުސާރައިގެ ކަންކަން އޮނިގަނޑެއްގެ ތެރެއިން ހަމަޖެއްސުމުގެ ގޮތުން އެ ޓީމުން، "ރޮނާލްޑޯ ރޫލް"ގެ ނަމުގައި އުސޫލުތަކެއް ކަނޑައަޅަން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ޔުނައިޓެޑްގެ ކޯޗުކަމާ ނެދަލެންޑްސްގެ އެރިކް ޓެން ހާގް، މި ސީޒަނުގައި ހަވާލުވުމަށް ފަހު އެ ކްލަބްގެ ގިނަ ކަންކަން ބަދަލުކުރަން އަންނަނީ މިހާތަނަށް ވެސް މަސައްކަތް ކުރަމުންނެވެ.
ޓެން ހާގްގެ ބައެއް ނިންމުންތަކާ ހިތްހަމަނުޖެހި، ޔުނައިޓެޑަށް ފާޑުކިޔައި އިންޓަވިއުއެއް ދިން މައްސަލައިގައި، އެ ޓީމަށް ކުޅެމުން އައި ޕޯޗުގީސް ތަރި، ކްރިސްޓިއާނޯ ރޮނާލްޑޯ ވަނީ ކްލަބް ދޫކޮށްލައިފަ އެވެ. ޔުނައިޓެޑްގެ ކޮންޓްރެކްޓް އުވާލައި، ރޮނާލްޑޯ ބަދަލުވީ ސައުދީ އަރަބިއްޔާގެ އަލް ނަސްރު އަށެވެ. އެއީ ފުޓްބޯޅަ ތާރީހުގައި ވެސް ކުޅުންތެރިއަކަށް ލިބޭނެ އެންމެ ބޮޑު މުސާރައެއް ލިބޭ ޑީލްގެ ތެރެއިންނެވެ.
ޔުވެންޓަސް ދޫކޮށް، 2021 ވަނަ އަހަރު، ރޮނާލްޑޯ، ޔުނައިޓެޑަށް ދެ އަހަރެއްގެ ކޮންޓްރެކްޓެއްގެ ދަށުން ބަދަލުވިއިރު، އެ އެއްބަސްވުމުގެ ދަށުން ދިން މުސާރަ އަށް ބަލާއިރު، ހަފްތާ އަކަށް، ޖުމްލަ އެކު، 600,000 ޑޮލަރު ލިބެ އެވެ. މިއީ ޔުނައިޓެޑްގެ ތާރީހުގައި ވެސް ހަފްތާ އަކަށް ބަލާނަމަ ކުޅުންތެރިއަކަށް އެންމެ ބޮޑަށް ލިބުނު މުސާރަ އެވެ.
އިނގިރޭސި މީޑިއާ ރިޕޯޓްތައް ބުނާގޮތުން ދާދި ފަހުން، ޔުނައިޓެޑްގެ ވެރިންނާ އެކު ޓެން ހާގް ބޭއްވި ބައްދަލުވުންތަކަކަށް ފަހު ވަނީ ކްލަބުން ކުޅުންތެރިން ގަންނަން ހޭދަކުރާ ޓްރާންސްފާ ފީ އާއި ކުޅުންތެރިންނަށް ދޭ މުސާރަ ކޮންޓްރޯލް ކުރަން އެދިފަ އެވެ. އެއީ ދެމެހެއްޓެނިވި ގޮތެއްގައި ޓީމެއް ބިނާކުރަން މަސައްކަތް ކުރެވޭނެ ހަރުދަނާ ގޮތެއް ހެދުމަށެވެ.
އެ ގޮތުން، ޔުނައިޓެޑްގެ ބޯޑުން މިހާރު ނިންމާފައިވަނީ ކުުޅުންތެރިންނަށް ދޭނެ މުސާރައިގެ އޮނިގަނޑެއް ކަނޑައަޅައި، އެ ގޮތަށް ކުރިއަށް ދިއުމަށެވެ. އަދި އެ އޮނިގަނޑަށް ބޯޑުގެ ބައެއް މެމްބަރުން ހުށަހެޅި ނަމަކީ "ރޮނާލްޑޯ ރޫލް" ކަމަށް މީޑިއާތަކުގައި ރިޕޯޓްކޮށްފައިވެ އެވެ.
ރިޕޯޓްތައް ބުނާގޮތުން ޔުނައިޓެޑުން މަޝްވަރާކޮށް، މިހާރު ނިންމާފައިވާ އެއް ކަމަކީ، ކުރިއަށް އޮތްތަނުގައި ޔުނައިޓެޑްގެ އެއްވެސް ކުޅުންތެރިއެއްގެ ކޮންޓްރެކްޓް އާ ކުރާއިރު، ހަފްތާ އަކު އެއްވެސް ކުޅުންތެރިއަކަށް 365،000 ޑޮލަރަށް ވުރެ އިތުރަށް މުސާރަ ނުލިބޭ ގޮތަށް ކަނޑައެޅުމެވެ.
މުސާރައިގެ އިތުރަށް ދެން ޔުނައިޓެޑުން ތައާރަފްކުރާނީ ސީޒަނަކު އެއް ފަހަރު ލިބޭ "ޕާފޯމަންސް ބޯނަސް" އެއް ކަމަށް ވެސް ރިޕޯޓްތައް ބުނެ އެވެ.
ޔުނައިޓެޑުން މި ވަގުތު އަންނަނީ ދެ ކުޅުންތެރިއެއްގެ ކޮންޓްރެކްޓް އާ ކުރުމުގެ މަޝްވަރާތައް ކުރަމުންނެވެ. އެއީ، މި ވަގުތު ތަފާތު ފޯމެއްގައި ކުޅެމުން އަންނަ، ފޯވާޑް، މާކަސް ރަޝްފޯޑާއި ގޯލްކީޕަރު، ޑޭވިޑް ޑެހެއާ އެވެ. މި ދެ ކުޅުންތެރިންނަށް ވެސް އާ ކޮންޓްރެކްޓް ދޭން ނިންމާފައިވަނީ "ރޮނާލްޑޯ ރޫލް"ގައި ހިމެނޭ ކަންކަމަށް ބެލުމަށް ފަހު ކަމަށް މީޑިއާ ރިޕޯޓްތައް ބުނެ އެވެ.
