އިރާނުގައި މަރުގެ ހުކުމް އިއްވާފައި ހުރި އަލީރިޒާ އަކްބަރީ ދަންޖައްސައި މަރާލާފައިވާ ކަމަށް އެ ގައުމުގެ ދައުލަތުގެ މީޑިއާއިން ބުނެފި އެވެ.
އަކްބަރީއަކީ އިނގިރޭސިވިލާތާއި އިރާނުގެ ރައްޔިތެކެވެ. އަކްބަރީއާ ފަހުގެ ސަލާމް ކުރުމަށް ޖަލަށް ދިޔުމަށް މިދިޔަ ބުދަ ދުވަހު އާއިލާއަށް އެންގި އެވެ.
އޭނާއަކީ ކުރިން އިރާނުގެ ޑެޕިއުޓީ ޑިފެންސް މިނިސްޓަރުކަން ކުރި މީހެކެވެ. އޭނާ ހައްޔަރުކޮށް އިނގިރޭސިވިލާތަށް ޖާސޫސްކޮށްދޭ ކަމަށް ތުހުމަތު ކުރީ 2019 ގަ އެވެ.
އެހެން ނަމަވެސް އެއީ ދޮގު ތުހުމަތެއް ކަމަށް އަކްބަރީ ބުންޏެވެ. އިނގިރޭސިވިލާތުން ގޮވާލީ ދަންނުޖައްސައި، ވަގުތުން އޭނާ މިނިވަން ކުރުމަށެވެ.
ހުކުރު ދުވަހު އިނގިރޭސި ފޮރިން ސެކެޓްރީ ޖޭމްސް ކްލެވެލީ ވިދާޅުވީ "ދަންޖައްސާނެ ކަމަށް ބުނެ އިރާނުން ދީފައިވާ ލާއިންސާނީ އިންޒާރު ހަގީގަތަކަށް ހަދައިގެން ނުވާނެ" ކަމަށެވެ.
އޭނާ ދަންޖައްސައި މެރި ކަމަށް އިރާނުގެ ދައުލަތުގެ މީޑިއާއިން ބުނި އިރު، އެ ގައުމުގެ ޖުޑިޝަރީގެ ރަސްމީ ނޫސް މިޒާންއިން ވެސް ބުނީ އަކްބަރީ ދަންޖައްސާފައިވާ ކަމަށެވެ.
އަކްބަރީ ކުށަށް އިއުތިރާފްވާ ވީޑިއޯއެއް އިރާނުން މިދިޔަ ހަފުތާގައި އާއްމުކުރި އެވެ. އެކަމަކު ބުދަ ދުވަހު އާއްމުވި އޯޑިއޯ މެސެޖެއްގައި އޭނާ ބުނީ އިއުތިރާފުވީ އަނިޔާކުރުމުން ކަމަށެވެ.
މިދިޔަ އަހަރު އިރާނުގައި ފެށި މުޒާހަރާތަކާ ގުޅިގެން އިނގިރޭސިވިލާތުން އިރާނުގެ ފުލުހުންނާއި އެހެން ސެކުއިރިޓީ އޮފިޝަލުންނާ ދެކޮޅަށް ދަތިކުރުމުގެ ފިޔަވަޅު އެޅި އެވެ.
އޭގެ ސަބަބުން އިރާނާއި އިނގިރޭސިވިލާތުގެ ގުޅުން އޮތީ ވަރަށް ގޯސްވެފަ އެވެ. އަކްބަރީގެ އިތުރުން ވެސް އެހެން ގައުމުތަކުގެ ޕާސްޕޯޓް އޮންނަ ގިނަ ބަޔަކު އިރާނުގައި ހައްޔަރުކޮށްފައިވެ އެވެ.
އެ އެންމެންނަށް ވެސް ކުރަނީ ޖާސޫސްކުރުމުގެ ތުހުމަތެވެ. މިހާރު ވެސް އިނގިރޭސިވިލާތުގެ ޕާސްޕޯޓް އޮންނަ ދެ މީހުން ބަންދުކޮށްފައި އެބަ ތިއްބެވެ.
މިދިޔަ އަހަރު އިނގިރޭސި ޕާސްޕޯޓް އޮންނަ ނަޒަނިން ޒަގަރީ ރެޓްކްލިފް އާއި އަނޫޝާ އަޝޫރީ ޖަލުން މިނިވަންކޮށް އިރާނުން ފުރަން ހުއްދަ ދިނީ އިނގިރޭސިވިލާތުން އަދާކުރަން ޖެހޭ ދަރަންޏެއް ދެއްކުމުންނެވެ.
