އެމްޑީޕީ އަކީ ސަރުކާރު ނޫން ކަމަށާއި، ސަރުކާރުގެ ބޮޑު ބައި އޮތީ ވެރިކަންކުރާ ކޯލިޝަނުގައި ހިމެނޭ އެހެން ޕާޓީތަކަށް ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިހެން ވިދާޅުވީ މިރޭ ލ. ގަމުގައި ބޭއްވި އެމަނިކުފާނުގެ ރިޔާސީ ޕްރައިމަރީ ކެމްޕޭނު ޖަލްސާގައި ވާހަކަދައްކަވަމުންނެވެ. އެގޮތުން ނަޝީދު ވިދާޅުވީ އެމްޑީޕީއަށް މި ސަރުކާރުން ލިބިފައިވަނީ 40 ޕަސަންޓު ކަމަށާއި، ބާކީ 60 ޕަސަންޓަކީ ކޯލިޝަނުގައި ހިމެނޭ އެހެން ޕާޓީތައް ކަމަށެވެ.
މި ސަރުކާރަކީ އެމްޑީޕީގެ ސަރުކާރެއް ކަމަށް ދެކޭ ދެކުން، އެއީ ވަރަށް ބޮޑު ކުށްހީއެއް"
މިރޭގެ ޖަލްސާގައި ނަޝީދު ވަނީ ސަރުކާރުން އަތޮޅުތަކުގެ ރައްޔިތުންގެ އަޑުނާހާ ކަމަށް ވިދާޅުވެ އެކަމުގެ ސަބަބުން އެ ރައްޔިތުންގެ ވޯޓު ސަރުކާރަށް ގެއްލޭނެ ކަމަށް ވިދާޅުވެފަ އެވެ. އަދި އެމްޑީޕީގެ ސިޔާސަތު ތަކަކީ މި ސަރުކާރުގެ ސިޔާސަތާއި ތަފާތު ސިޔާސަތުތަކެއް ކަމަށްވެސް ވިދާޅުވި އެވެ.
ލ. ހިތަދޫއިން މިސާލު ނަންގަވަމުން ނަޝީދު ވިދާޅުވީ މި ވެރިކަމުގައި އެ ރަށުގެ ރައްޔިތުންގެ މަތިން ހަނދާން ނައްތާލައި، އެމީހުންނަށް ވެފައިވާ ވައުދުތައް ފުއްދާފައިނުވާ ކަމަށެވެ. އަދި އޭގެ ސަބަބުން އެ މީހުންގެ ވޯޓު ރިޔާސީ އިންތިހާބުގައި ހޯދަން ވަރަށް އުނދަގޫ ވާނެ ކަމަށް ވިދާޅުވި އެވެ.
"އަޅުގަނޑު ދަންނަވާނީ އެމްޑީޕީއަށް ހިތަދޫގެ ވޯޓު.. ސަރުކާރަށް ހިތަދޫގެ ވޯޓު، ކުރިއަށް އޮތް ރިޔާސީ އިންތިހާބުގައި ނުހޯދޭނެއޭ، އެމްޑީޕީއަކީ ސަރުކާރެއް ނޫން،" ނަޝީދު ވިދާޅުވި އެވެ.
އެމްޑީޕީ ފިޔަވާ ދެން ކޯލިޝަނުގައި ހިމެނެނީ ޖުމްހުރީ ޕާޓީ، އަދާލަތު ޕާޓީ އަދި އެމްއާރުއެމް އެވެ.
އެމްޑީޕީގެ ރިޔާސީ ޕްރައިމަރީގައި ނަޝީދުއާ ވާދަކުރައްވާ ރައީސް އިބްރާހިމް މުހައްމަދު ސޯލިހު ވަނީ އެމަނިކުފާނަށް ޕްރައިމަރީ ކާމިޔާބު ކުރެވޭ ހާލަތެއްގައި މި ކޯލިޝަނާއެކު ކުރިއަށްދާނެ ކަމުގެ އިޝާރާތެއް ދެއްވައިފަ އެވެ.
ނަމަވެސް ނަޝީދު ވިދާޅުވަނީ އެމަނިކުފާނު ކޯލިޝަނުގެ ވިސްނުން ގެންނަވާނީ ރިޔާސީ އިންތިހާބު ދެވަނަ ބުރަކަށް ދާ ހާލަތެއްގައި، އެހެން ޕާޓީތަކަށް ލިބޭ ވޯޓުގެ އަދަދަށް ބެލުމަށްފަހު ކަމުގަ އެވެ.
