ދުނިޔޭގެ ތާރީހުގައި އަމިއްލަ މުއްސަނދިކަން އެންމެ ބޮޑަށް ގެއްލުނު މީހާ ރެކޯޑް އެލޮން މަސްކަށް ލިބިއްޖެ އެވެ.
ގިނެސް ވޯލްޑް ރެކޯޑްސްއިން ބުނީ ނޮވެމްބަރު 2021 އިން ޑިސެމްބަރު 2022 އާ ހަމައަށް މަސްކަށް 165 ބިލިއަން ޑޮލަރު ގެއްލުނު ކަމަށެވެ.
އެ ތަފާސްހިސާބު ބިނާކޮށްފައި ވަނީ ފޯބްސްއިން އާއްމުކުރާ ޑޭޓާގެ މައްޗަށެވެ. ބައެއް އެހެން ޑޭޓާއިން ދައްކާ ގޮތުގައި ގެއްލުމުގެ އަދަދު އެއަށްވުރެ ވެސް ބޮޑުވެދާނެ ކަމަށް ގިނެސްއިން ބުނެ އެވެ.
މިދިޔަ އަހަރު ޓްވިޓާ ގަތުމާ އެކު މަސްކްގެ އިލެކްޓްރިކް ކާރު އުފައްދާ ކުންފުނި ޓެލްސާގެ ހިއްސާގެ އަގު ވެއްޓުނެވެ. އޭނާ ޓްވިޓާ ގަތީ 44 ބިލިއަން ޑޮލަރަށެވެ.
ޓެސްލާގެ ހިއްސާގެ އަގު ވެއްޓުނީ، އެ ކުންފުންޏަށް މަސްކް އެކަށީގެންވާ ސަމާލުކަން ނުދޭ ކަމަށް އިންވެސްޓަރުންނަށް ހީވާން ފެށުމުންނެވެ.
މީގެ ކުރިން އެ ރެކޯޑު އޮތީ ޖަޕާނުގެ ޓެކް އިންވެސްޓަރު މަސަޔޯޝީ ސަންގެ އަތުގަ އެވެ. އޭނާއަށް 2000 ވަނަ އަހަރު 58.6 ބިލިއަން ޑޮލަރު ގެއްލުނެވެ.
މަސްކްއަށް ލިބުނު ކަމަށް ބެލެވޭ ގެއްލުމުގެ ތެރޭގައި އޭނާގެ ހިއްސާތަކުގެ އަގު ވެސް ހިމެނެ އެވެ. އެހެންކަމުން، ހިއްސާގެ އަގު އުފުލެން ފަށައިފި ނަމަ، އޭނާގެ މުއްސަނދިކަން އަލުން އިތުރުވާން ފަށާނެ އެވެ.
