އެމެރިކާގެ ރައީސް ޖޯ ބައިޑެންގެ ޕްރައިވެޓް އޮފީހަކުން ދައުލަތުގެ ސިއްރު ލިޔުންތަކެއް ފެނުނު މައްސަލަ އެ ގައުމުގެ ޖަސްޓިސް ޑިޕާޓްމަންޓުން ބަލަމުން އެބަދެ އެވެ.
ވައިޓް ހައުސްއިން ބުނީ އެއީ ތިންކް ޓޭންކެއްގައި ބައިޑެން މަސައްކަތް ކުރެއްވި އިރު، އެ ތަނުގެ އިމާރާތުގައި އެމަނިކުފާނަށް ހާއްސަ ކުރީގެ އޮފީހެއް ކަމަށެވެ.
ވޮޝިންޓަންގައި ހުންނަ ޕެން ބައިޑެން ސެންޓަރުގެ ތަޅުލާފައިވާ ކަބަޑެއްގެ ތެރެއިން 10 ފައިލް ފެނުނީ މިދިޔަ ނޮވެމްބަރު މަހު ބައިޑެންގެ ގާނޫނީ ޓީމަށެވެ.
މިހާރު އެ ލިޔުންތައް ވަނީ ނޭޝަނަލް އާކައިވްސް އޮފީހާ ހަވާލުކޮށްފަ އެވެ.
އެމެރިކާގެ ރައީސްކަން ކުރިން ކުރެއްވި ޑޮނަލްޑް ޓްރަމްޕް ފްލޮރިޑާގައި ދިރިއުޅުއްވާ ގެކޮޅަށް ސިއްރު ލިޔުންތައް ގެންދެވި މައްސަލައިގެ ތަހުގީގު ވެސް ދަނީ ކުރިއަށެވެ.
ޓްރަމްޕްގެ މައްސަލަ ބެލުމުގައި އިސްކޮށް އުޅެނީ އެފްބީއައިއިންނެވެ. ސީބީއެސް ނިއުސްއިން ބުނީ ބައިޑެންގެ މައްސަލައިގައި ވެސް އެފްބީއައިއިން ތަހުގީގުގައި އުޅެމުންދާ ކަމަށެވެ.
ފެނުނު ލިޔުންތަކަކީ ދައުލަތުގެ ސިއްރު ހިމެނޭ ލިޔުންތަކެއްތޯ ކަށަވަރު ކުރުމަށް އެޓާނީ ޖެނެރަލް މެރިކް ގާލޭންޑް ގެންދަވަނީ ލިޔުންތައް މުރާޖައާ ކުރައްވަމުންނެވެ.
އޮފިޝަލަކު ބުނީ އެ ލިޔުންތަކުގައި ނިޔުކްލިއާ ކަންކަމާ ގުޅޭ އެއްވެސް ސިއްރެއް ނުހިމެނޭ ކަމަށެވެ. ލިޔުންތައް ފެނުނު އޮފީހުގައި ބައިޑެން މަސައްކަތް ކުރެއްވީ 2017 އިން 2020 އަށެވެ.
