ރިޔާސީ އިންތިހާބު ކާމިޔާބު ކުރެވޭނީ އެހެން ބައެއް ޕާޓީތަކުގެ ތާއީދާއެކު ކަމަށާއި ނަމަވެސް ކޯލިޝަން ގާއިމްކުރަން ވާނީ ފުރަތަަމަ ބުރުގައި ލިބޭ ވޯޓު މިނުމަށް ފަހު އެއާ އެއް ގޮތަށް ކަމަށް، އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މިދިޔަ ހަފުތާގައި މެދުރާއްޖޭގެ ހަތަރު އަތޮޅަކަށް ދަތުރު ކުރެއްވުމަށް ފަހު، މި ހަފުތާގައި އެމަނިކުފާނު ގެންދަވަނީ އުތުރު ތިން އަތޮޅަކަށް ދަތުރު ކުރައްވަމުންނެވެ. މިއަދު ކެމްޕޭންގެ ހަރަކާތްތައް ގެންދަވަނީ ނ. އަތޮޅުގަ އެވެ.
އެ ރަށްރަށަށް ވަޑައިގެން ނަޝީދު ގެންދަވަނީ މިހާރު އޮތް ސަރުކާރުގެ ކޯލިޝަންގެ ބައިވެރިންނާއެކު ރިޔާސީ އިންތިހާބުގައި ރައީސް އިބްރާހީމް މުހައްމަދު ސޯލިހް ވާދަކުރައްވަން ވިސްނަވާފައި އޮތް އުކުޅަށް ފާޑުވިދާޅުވަމުންނެވެ. ނަޝީދު ގަބޫލުކުރައްވާ ގޮތުގައި އެއީ އެންމެ ޑިމޮކްރެޓިކް ގޮތެއް ނޫނެވެ.
"ފުރަތަމަ ބުރުގައި ގިނަ ޕާޓީތަކުން ވާދަކުރީމައި ދެން ދާނީ ދެވަނަ ބުރަކަށް، އޭރަށް ކޯލިޝަން ހަދާނީ ވެސް ތާއީދު ބޮޑު ޕާޓީއަކާއެކު، ސަރުކާރުގައި ހިއްސާ ދޭން ވާހަކަ ދެކެވޭނީ ވެސް އެ ޕާޓީއަކަށް ލިބުނު ވޯޓެއްގެ ނިސްބަތަކަށް،" ނ. ކެނދުކުޅުދޫގައި ނަޝީދު މިއަދު ވިދާޅުވި އެވެ. ނ. އަތޮޅުގެ އެހެން ރަށްރަށުގައި ވާހަކަ ދައްކަވަމުން ވެސް އެ މަނިކުފާނު މި ވާހަކަ ތަކުރާރު ކުރެއްވެވި އެވެ.
ޕާޓީއަކަށް އޮތް ތާއީދު ޔަގީން ނުކޮށް، އިންތިހާބުގެ ކުރިން ކޯލިޝަން ހެދުމުން ސަރުކާރުގައި އެ ޕާޓީއަކަށް ދެވޭނީ އެންމެ ހައްގު ހިއްސާއެއް ނޫން ކަމަށް އެމަނިކުފާނު ވިދާޅުވި އެވެ. އަދި ތާއީދު އޮތް ޕާޓީގެ ސަޕޯޓަރުންގެ ހިޔާލާއި ފަލްސަފާ ވަރަށް ބޮޑަށް ބާކީވެގެން ދާނެ ކަމަށް ވިދާޅުވި އެވެ.
"މިހާރު އެމްޑީޕީގެ މެންބަރުން މި އޮތީ ވަރަށް ބޮޑަށް ބާކީވެފަ، އެމްޑީޕީއަށް މި އޮތީ 40 ޕަސެންޓް، އެކަމަކު ރިޔާސީ އިންތިހާބު ނިންމާފައި ދެން މި ބޭއްވި މަޖިލިސް އިންތިހާބުގައި، އެމްޑީޕީން ސައްހަ މެޖޯރިޓީ ޔަގީންކުރިއިރު [ކޯލިޝަންގެ] ބައެއް ޕާޓީތަކަށް ގޮނޑި ވެސް ނުލިބޭ،" އެމަނިކުފާނު ވިދާޅުވި އެވެ.
ރައީސުލްޖުމްހޫރިއްޔާގެ މަގާމަށް މީހަކު އިންތިހާބު ވެވޭނީ ވޯޓުލާ މީހުންގެ 50 ޕަސެންޓު އަދި އިތުރަށް އެއް ވޯޓު ލިބިގެެނެވެ. އިންތިހާބުގެ ފުރަތަމަ ބުރުގައި، އެ މިންވަރަށް ކެންޑިޑޭޓަކަށް ވޯޓު ނުލިބޭނަމަ އެންމެ ގިނަ ވޯޓު ލިބޭ ދެ ކެންޑިޑޭޓުންނާއެކު ދެވަނަ ބުރެއް ބާއްވަން ޖެހެ އެވެ.
މީގެ ކުރިން 2008 އަދި 2013 ވަނަ އަހަރު، ފުރަތަމަ ބުރުގައި އެއްވެސް ކެންޑިޑޭޓަކަށް އެ ނިސްބަތަށް ވޯޓު ނުލިބުމުން ދެވަނަ ބުރެއް ބޭއްވި އެވެ. އޭރު އިންތިހާބު ކާމިޔާބުކުރީ ފުރަތަމަ ބުރުގައި ދެވަނަ އަށް އެންމެ ގިނަ ވޯޓު ލިބުނު ކެންޑިޑޭޓެވެ. އެއީ ފުރަތަމަ ބުރުގައި ނާކާމިޔާބުވި އެހެން ކެންޑިޑޭޓުންގެ ތާއީދާ އެކުގަ އެވެ.
ނަމަވެސް 2018 ވަނަ އަހަރު، އޭރު ތިބި އިދިކޮޅު ލީޑަރުން ޖަލު ބަންދުގައި ނުވަތަ ޖަލު ހުކުމްތަކުގައި ތިބުމުން އިންތިހާބަށް ނުކުތީ ފުރަތަމަ ބުރުގައި ވެސް ސަރުކާރާ ވާދަވެރި ހުރިހާ ޕާޓީތަކެއް ކޯލިޝަން ހަދައިގެންނެވެ.
ރައީސް އިބްރާހީމް މުހައްމަދު ސޯލިހްގެ ސަރުކާރު އުފެއްދީ އޭރު ރިޔާސީ އިންތިހާބުގައި ޕާޓީތަކުގެ މެދުގައި އެއްބަސްވެފައިވާ ގޮތަށް ކޮންމެ ޕާޓީއަކަށް ދޭން އޮތް ހިއްސާއަކާ އެއް ވަރަށް ސަރުކާރު ކެބިނެޓާއި، ސިޔާސީ ވަޒީފާތައް ލިބިގެންދާ ގޮތަށެވެ. އެކަމަކު ފަހުންފަހުން އޭގެ އިތުރަށް ވެސް މަގާމުތައް އުފައްދާފައިވެ އެވެ.
