"އިސްލާމީ ހަރުކަށި ފިކުރާ" ގުޅުން ހުރި ހަމަލާއެއް ދޭން ރޭވި ކަމުގެ ތުހުމަތުގައި ޖަރުމަނުވިލާތުން އުމުރުން 32 އަހަރުގެ އިރާނުގެ ފިރިހެނަކު ހައްޔަރުކޮށްފި އެވެ.
ނޯތު ރައިން ވެސްޓްފޭލިއާ ފުލުހުން ނެރުނު ބަޔާނުގައި ބުނީ ފިރިހެން މީހާ ރާވަމުން ދިޔައީ ސަޔަނައިޑް އަދި ރިސިން ކެމިކަލް ބޭނުންކޮށްގެން ހަމަލާއެއް ދިނުމަށް ކަމަށެވެ.
ރޫރް ސަރަހައްދުގައި އެ މީހާ ދިރިއުޅޭ ގެ ބަލައި ފާސްކުރި ނަމަވެސް، އެއްވެސް ކެމިކަލެއް ފެނިފައެއް ނުވެ އެވެ. ތުހުމަތު ކުރެވޭ މީހާގެ ބޭބެ ވެސް ފުލުހުންގެ ތަހުގީގަށް ހައްޔަރު ކުރި އެވެ.
ޑިޔުޝް ޕްރެސް އެޖެންސްއިން ބުނީ ރައްކާތެރި ސޫޓުތައް ލައިގެން ތިބި ގިނަ އަދަދެއްގެ މީހުން އެ ގެ ކައިރީގައި ހަރަކާތްތެރިވި ކަމަށެވެ.
އެ މީހާއަށް ކުރެވޭ ތުހުމަތުގެ އުގޫބާތަކީ ހަ މަހާއި 10 އަހަރާ ދެމެދުގެ ޖަލު ހުކުމެކެވެ. ފަހަކަށް އައިސް ޖަރުމަނުގައި ހަރުކަށި ފިކުރުގެ މީހުންގެ ހަރަކާތްތައް ވަނީ އިތުރުވެފަ އެވެ.
އެގޮތުން 2016 ވަނަ އަހަރު ވެރިރަށް ބާލިންގައި އޮތް ކްރިސްމަސް މާކެޓެއްގެ ތެރެއަށް ޓްރަކެއް ދުއްވާފައި ގޮސް 12 މީހުން މަރާލި އެވެ.
