އެމްޑީޕީގެ ވެރިކަމެއްގައި ޕާޓީގެ ފިކުރު "އެމްޑީޕީ ނޫން ފިކުރަކަށް" ބަދަލުވެއްޖެ ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވާތީ އެކަމާ އެ ޕާޓީގެ ޕާލަމެންޓްރީ ގްރޫޕްގެ ލީޑަރު, ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ނުރުހުން ފާޅުކުރައްވައިފި އެވެ.
އެމްޑީޕީގެ ރިޔާސީ ޕްރައިމަރީގައި ނަޝީދުއާ ވާދަކުރައްވާ ރައީސް އިބްރާހިމް މުހައްމަދު ސޯލިހުގެ ކެމްޕޭނު ރަސްމީކޮށް ލޯންޗުކުރުމަށް ނ. ވެލިދޫގައި މިރޭ ބޭއްވި ޖަލްސާގައި ވާހަކަދައްކަވަމުން އަސްލަމް ވިދާޅުވީ ޕާޓީއަށް 17 އަހަރު ވެގެންދިޔަ އިރު މިހާރު ހުންނަންޖެހިފައިމިވަނީ އޮޅުމެއްގެ ތެރޭގައި ކަމަށެވެ.
އެކަމުގެ ސަބަބަކީ ޕާޓީގެ ފިކުރު ބަދަލުވެއްޖެ ކަމަށް ބުނާ ބުނުން ކަމަށްވެސް އަސްލަމް ވިދާޅުވި އެވެ. އަދި ރައީސް ސޯލިހުގެ ވެރިކަމުގައި ފެނިގެންދަނީ އެމްޑީޕީގެ ފިކުރެއް ނޫން ކަމަށް ވިދާޅުވާ ކަމަށާއި ރައީސް ސޯލިހަށް ތާއީދުކުރައްވާ ބޭފުޅުންނަކީ އެމްޑީޕީގެ ބައެއް ނޫން ކަމަށް ވިދާޅުވާ ކަމަށްވެސް އަސްލަމް ވިދާޅުވި އެވެ.
އަސްލަމް އިތުރަށް ވިދާޅުވީ މި ސަބަބުތަކާއެކު އެމްޑީޕީގެ ފިކުރަކީ ކޮބައިކަން އޮޅިފައިވާ ކަމަށެވެ. އަދި އެ ވިދާޅުވާ އެމްޑީޕީގެ ފިކުރަކީ ކޮބައިތޯ ވެސް ސުވާލުވ ކުރެއްވި އެވެ.
އަޅުގަނޑުމެންނަށް ފޮރުވައިގެން އަޅުގަނޑުމެންނަށް ނާންގާ އެހެން ފިކުރެއް ގެންގުޅުއްވަނީތޯ؟"
މީގެއިތުރުން އަސްލަމް ވިދާޅުވީ އެބޭފުޅުންނަށް އެނގޭ އެމްޑީޕީގެ ފިކުރަކީ ޕާޓީގެ އަސާސީ ގަވާއިދުގައި ބަޔާންކޮށްފައިވާ އަސާސްތައް ކަމަށެވެ. އަދި އޭގެ ތެރެއިން މި ސަރުކާރުން ހިލާފުވީ ކޮން ފިކުރަކާ ކޮން އަސާސަކާތޯ ވިދާޅުވެ އަސްލަމް ސުވާލު އުފެއްދެވި އެވެ.
އެ ނޫން އެހެން ފިކުރެއްގެ ދިރުން އެއީ މުޅިން އެހެން ފިކުރެއްގެ ދިރުން، މުޅިން އެހެން ޕާޓީއެއް އުފަންކުރާ ވާހަކަ އެ ދައްކަވަނީ"
ނަޝީދުއަށް ރައްދުދެއްވާ އަސްލަމް ވިދާޅުވީ އެމްޑީޕީގެ ފިކުރަކީ ވަކި މީހެއްގެ ފިކުރެއް ނޫން ކަމަށެވެ.
އަސްލަމްގެ މި ރައްދުތައް ނަޝީދުއަށް އަމާޒުވެފައި މިވަނީ އެމަނިކުފާނުގެ ކެމްޕޭނުގައި އެކި ރަށްރަށް ވަޑައިގެން އެންމެ ބޮޑު ކަންބޮޑުވުމެއްގެ ގޮތުން އެމްޑީޕީގެ އެތެރޭގައި "މައުމޫނީ ފިކުރެއް" އުފަންވެގެން އުޅޭކަން ނަޝީދު ފާހަގަކުރައްވާފައިވާ ދަނޑިވަޅެއްގަ އެވެ.
އެގޮތުން ރައީސް ސޯލިހުގެ ސަރުކާރު ސިފަ ކުރައްވަމުން "ރަށުގައި ކަމެއް ވާން އޮތީ މާލޭގައި ވަޒީރެއްގެ ގޭގައި މުގޯލި އަޅައިގެންނޭ، ވަޒީރުމީހާއަށް ބާޒާރު ވެސް ކޮށްދީގެނޭ، ތިމަންނައިމެންގެ ދަރިން އެ ގޭގައި ބައިތިއްބަގެނޭ، އެ ގޭގެ މަތިވަޑާން ވެސް ކޮށްދީގެން،" ކަމަށް ނަޝީދު ވަނީ ވިދާޅުވެފަ އެވެ.
މީގެ އިތުރުން ވެރިއެއް ރުއްސައިގެން ތަރައްގީ ހޯދަން އުޅުމަކީ އެމްޑީޕީގެ ފަލްސަފާއާ ދުރު ކަމެއް ކަމަށް ވިދާޅުވެ "ފިކުރެއްގެ ދިރުން" ޝިއާރުގައި ނުކުމެ ހުންނެވީ އަނެއްކާ ވެސް ޑިމޮކްރެޓިކް ފަލްސަފާ ދިރުވަން ކަމަށް މިއަދު ދ. މީދޫގައި ވާހަކަދައްކަވަމުން ނަޝީދު ވިދާޅުވި އެވެ.
