އެމެރިކާގެ ޕާލަމެންޓުގެ ތިރިގެ، ހައުސް އޮފް ރެޕްރެޒެންޓޭޓިވްސްގެ ރައީސް ހޮވުމަށް ފަނަރަ ފަހަރު ވޯޓަށް އަހައިގެން ރިޕަބްލިކަން ޕާޓީގެ ކެވިން މެކްކާތީ އެ މަގާމު ހޯއްދަވައިފި އެވެ.
ހައުސް އޮފް ރެޕްރެޒެންޓޭޓިވްސްގެ މެޖޯރިޓީ އޮތީ ރިޕަބްލިކަން ޕާޓީއަށެވެ. އެކަމަކު މެކްކާތީއަށް ގޮންޖެހުމާ ދިމާވީ ޕާޓީގެ ތެރޭގައި ފެކްޝަން އުފެދިފައި އޮތުމުންނެވެ.
މެކްކާތީއާ އިދިކޮޅު ފެކްޝަންގައި އިސްކޮށް ހުންނެވީ މެޓް ގައެޓްޒް އެވެ. މަޖިލިސް ތަޅުމުގައި ގައެޓްޒްއަށް ޕްރެޝަރު ކުރުމަށް މެކްކާތީ ފަޅީގައި ތިބި މެމްބަރުން ކެމްޕެއިން ކުރެއްވި އެވެ.
ހުކުރު ދުވަހުގެ ރޭ އެންމެ ފަހުން މެކްކާތީއަށް އެ މަގާމު ދޭން ފެންނަ ކަމަށް ގައެޓްޒް އާއި އިތުރު ހަ މެމްބަރުން ވޯޓު ދިނެވެ. މެކްކާތީއަށް މަގާމު ކަށަވަރުވީ އެ ހިސާބުންނެވެ.
އޭގެ ކުރިން މަޖިލިސް ތަޅުން ހޫނުވެ، މެމްބަރުންގެ މެދުގައި ކޯޅުން ބޮޑުވި އެވެ. ގައެޓްޒް އާއި ރިޕަބްލިކަން ޕާޓީގެ މައިކް ރޮޖާޒްއާ ދެމެދު ތަޅާފޮޅުމަކާ ހަމައަށް ނުދިޔައީ ކިރިޔާ އެވެ.
ޕާލަމެންޓުގެ ތިރިގޭގެ އެޖެންޑާ ހަމަޖައްސައި ހުރިހާ މަަސައްކަތެއް ބެލެހެއްޓުމުގެ ޒިންމާ އޮންނަނީ ރައީސަށެވެ. ހައުސް އޮފް ރެޕްރެޒެންޓޭޓިވްސްގެ ރައީސަކީ އެމެރިކާގެ ރައީސް އާއި ނައިބު ރައީސް ނުކުޅެދިއްޖެ ހާލަތެއްގައި ވެރިކަމަށް ވަޑައިގަންނަވާނެ ބޭފުޅެވެ.
މެކްކާތީއަށް އެ މަގާމު ލިބިވަޑައިގެންނެވުމުން ރައީސް ޖޯ ބައިޑެން މަރުހަބާ ދެންނެވި އެވެ. އެމަނިކުފާނު ވިދާޅުވީ ރިޕަބްލިކަން ޕާޓީއާ ގުޅިގެން މަސައްކަތް ކުރުމަށް އުއްމީދު ކުރައްވާ ކަމަށެވެ.
ބައިޑެންގެ އާއިލީ ވިޔަފާރިތަކާއި ސަރުކާރާ ގުޅުން ހުރި ތުހުމަތުތައް ޕާލަމެންޓުގެ ތެރެއިން ތަަހުގީގު ކުރާނެ ކަމަށް ރިޕަބްލިކަން ޕާޓީއިން މީގެ ކުރިން ބުނެފައިވެ އެވެ.
