ކުރިއަށް އޮތް މޯލްޑިވިއަން ޑިމޮކްރެޓިކް ޕާޓީގެ ރިޔާސީ ޕްރައިމަރީގައި ވާދަ ކުރައްވާ ރައީސް އިބްރާހިމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދު ރަށްރަށުގައި ކެމްޕެއިން ކުރައްވަމުން ގެންދަވާއިރު، މިއަދުވެގެންދިޔައީ އެއްބޭފުޅަކު އަނެއް ބޭފުޅަކަށް ތުހުމަތު ކުރެއްވުމާއި ރައްދު ދިނުން ގިނަ ދުވަހަކަށެވެ.
ރައީސް ސޯލިހާއި އެމަނިކުފާނުގެ ޓީމުން މިއަދު ދަތުރު ކުރައްވަނީ ރ. އަތޮޅުގެ މާކުރަތާއި އިންނަމާދޫ އާއި މީދޫއަށެވެ. ނަޝީދުގެ ކެމްޕެއިން ޓީމުން އއ. އަތޮޅުގެ ތޮއްޑޫ އާއި ރަސްދޫ އާއި އުކުޅަހާއި ހިމަންދޫ އާއި އދ. އަތޮޅުގެ މަހިބަދޫ އާއި މާމިނގިއްޔަށް ދަނީ ދަތުރު ކުރައްވަމުންނެވެ.
ރިޔާސީ ޕްރައިމަރީގެ އިންތިހާބަށް ތިން ހަފުތާ އާއި އެއް ދުވަސް ކުރިއަށް އޮތް އިރު، މިއަދު ފެށުނީ ނަޝީދުގެ ކެމްޕެއިނު ޓީމުން ކުރެއްވި ތުހުމަތަކާއެކު އެވެ. ނަޝީދުގެ ޓީމުން 11:30 ވި ފަހުން ނެރުނު ބަޔާނެއްގައި ތުހުމަތުކޮށްފައި އޮތީ ސަރުކާރުން މުވައްޒަފުންނަށް ވަޒީފާގެ ބިރު ދައްކަމުންދާ ކަމަށެވެ.
"މި ނާތަހުޒީބު ބިރުދެއްކުމުގެ އަމަލުތަކާއި ސަރުކާރުން ނާޖާއިޒް ނުފޫޒު ބޭނުންކުރުމުގެ އަމަލުތަކަކީ، 2008 ވަނަ އަހަރުގެ ރިޔާސީ އިންތިހާބުގެ ކުރީން އެއިރު އޮތް ރައީސް މައުމޫނު އަބްދުލްގައްޔޫމުގެ ޑީއާރްޕީގެ ސަރުކާރުން ފެށިގެން އައިސްފައިވާ ކަންކަން،" ނަޝީދުގެ ޓީމުން ތުހުމަތުކޮށްފައި އޮތެވެ.
އެކަމަކު ދާދި އަވަހަށް ރައީސް ސޯލިހުގެ ޓީމުން އެ ތުހުމަތު ދޮގު ކުރެއްވި އެވެ. ރައީސްގެ ޑިފެންސް މިނިސްޓަރު އަދި ކެމްޕެއިނުގެ ތަރުޖަމާނު މާރިޔާ އަހުމާދު ދީދީ، ނަޝީދު ޓީމުގެ ބަޔާނާއެކު ސޯޝަލް މީޑިއާ ޕްލެޓްފޯމް ޓުވިޓާގައި ވިދާޅުވީ އެ ތުހުމަތަކީ ޕާޓީގެ މެމްބަރުންނަށް ކުރެވޭ މަލާމާތެއް ކަމަށެވެ.
"އެމްޑީޕީ އަކީ ވަޒީފާގެ ބިރަށް ފަސް ނުޖެހުނު މީހުންގެ ޕާޓީ. ވަޒީފާގެ ބިރޭ ކިޔައިގެން ވާހަކަ ދެއްކުމަކީ މި ބިޔަ ބޮޑު ޕާޓީގެ ހިތްވަރުގަދަ މެމްބަރުންނަށް ކުރެވޭ ބޮޑު މަލާމާތެއް،" މާރިޔާ ވިދާޅުވެފަވެ އެވެ.
އޭގެ އިތުރުން އެ ތުހުމަތަށް ރައީސް ސޯލިހުގެ ރަސްމީ ތަރުޖަމާނު މިއުވާން މުހައްމަދު ވެސް، ނަޝީދުގެ ޓީމުގެ ތުހުމަތުތަކަށް ރައްދު ދެއްވި އެވެ.
"ސަރުކާރުގެ، ރައީސް އޮފީހުގެ މިނިސްޓަރުން ވެސް ރައީސް އާ ދެކޮޅަށް ޕްރައިމަރީގެ ކެމްޕެއިނުގައި އެ އުޅުއްވަނީީ ނޫންތޯ؟ އަދި ސަރުކާރުގެ އެކި މަގާމުތަކުގައި ތިއްބެވި ބޭފުޅުން ވެސް އެބަ އުޅުއްވާ ރައީސްގެ ވާދަވެރި ކެންޑިޑޭޓާއެކު ކެމްޕޭނުގައި. އެއްވެސް ފަރާތަކަށް ވަޒީފާގެ ބިރެއް ނުދައްކާ،" ރާއްޖޭގެ ނޫހަކަށް ދެއްވި އިންޓަވިއުއެއްގައި މިއުވާން ވިދާޅުވި އެވެ.
އޭގެ ފަހުން ރަސްދޫގައި ނަޝީދު ވާހަކަ ދައްކަވަމުން ރައީސް ސޯލިހަށް އަނެއްކާ ވެސް ތުހުމަތެއް އަމާޒު ކުރެއްވި އެވެ. މިފަހަރު ވިދާޅުވީ ރައީސް ކެމްޕެެއިނު ދަތުރުތަކުގައި ދައުލަތުގެ ވަސީލަތްތައް ބޭނުން ކުރައްވަމުންދާ ކަމަށެވެ.
"ސަރުކާރުގެ ދަތުރުފުޅެއްގައި ޅިޔަން ބޭފުޅެއްގެ ދާއިރާގައި އެއާޕޯޓެއް ހުޅުވަން ވަޑައިގެންފައިގެންފައި ނުވަތަ އެއާޕޯޓާ ގުޅޭ ކޮންމެވެސް ކަމެއް ކުރައްވަން ވަޑައިގެންފައި ދެން އޭގެ ތެރެއަށް އިންތިހާބުގެ ކަންތައްތައް ވެއްދީމާ އަޅުގަނޑަށް ދެންނެވޭނީ އޭރުން އެ ޖެހެނީ ޑީއާރުޕީގެ ފިކުރެއްގެ ކުލައެކޭ. އަޅުގަނޑުމެނެއް ނޫން އެއީކީއެއް،" ނަޝީދު ވިދާޅުވި އެވެ.
ނަޝީދުގެ އެ ވާހަކައަށް މިފަހަރު ރައްދު ދެއްވީ ސީދާ ރައީސް ސޯލިހެވެ. އިންނަމާދޫގައި ރައީސްގެ ސަޕޯޓަރުންނާ ވާހަކަ ދައްކަވަމުން މާ ބޮު ތަފްސީލަކަށް ނުގޮސް އެމަނިކުފާނު ވިދާޅުވީ، ޕްރައިމަރީ ނިމުނީމާ ވެސް އެކުގައި މަސައްކަތް ކުރަންޖެހޭކަން އެންމެންވެސް ދަންނަންޖެހޭ ކަމަށެވެ.
"މިއީ [އެމްޑީޕީގެ] އެތެރޭގެ އިންތިހާބެއް. އަޅުގަނޑުމެންގެ ތެރޭގައި އިދިކޮޅު މީހުންނެއް ނުތިބޭނެ. ވާދަވެރިން ތިބެދާނެ. އެހެންވީމާ ޕްރައިމަރީ ނިމިގެން އެކުގައި މަސައްކަތް ކުރަންޖެހޭ ބައެއްކަން ދަނެގެން ކުރިއަށް ދާންވީ،" ރައީސް ސޯލިހު ވިދާޅުވި އެވެ.
ޖެނުއަރީ 28، ގައި ބާއްވާ ރިޔާސީ ޕްރައިމަރީގައި އެމްޑީޕީގެ 57،000 މެމްބަރުންނަށް ވޯޓުލެވޭނެ އެވެ. މިއީ މިފަހުން ޕާޓީގެ އެތެރޭގެ އިންތިހާބެއް މިހާ ވާދަވެރިކޮށް ކުރިއަށްދާ ފުރަތަމަ ފަހަރެވެ. މިއީ ރިޔާސީ ޕްރައިމަރީއެއްގައި ރައީސް ސޯލިހު ވާދަ ކުރައްވާ ފުރަތަމަ ފަހަރެވެ. ރައީސް ނަޝީދު މީގެ ކުރިން ދެ ފަހަރަކު ވާދަ ކުރެއްވި އެވެ.
