ގުދުސްގެ އޯލްޑް ސިޓީ ކައިރީގައި ހުންނަ ގަދީމީ ސަހަރާއަކަށް ގެއްލުން ދިނުމުން އިނގިރޭސިވިލާތާއި ނަސާރާއިން ހިތްހަމަނުޖެހުން ފާޅުކޮށްފި އެވެ.
އާދީއްތަ ދުވަހު ގެއްލުން ދިނީ މައުންޓް ޒިޔޯންގައި ހުންނަ ޕްރޮޓެސްޓަންޓް ސިމެޓްރީގެ 30 އަށް ވުރެ ގިނަ މަހާނަ ގަލަށެވެ. ސޮލީބުތައް ބިންދާލައި ބޮޑެތި ގެއްލުންތަކެއް ދީފައި ހުއްޓެވެ.
އެކަމުގެ ތުހުމަތު ކުރެވެނީ ޔަހޫދީ ދީނުގެ ހަރުކަށި މީހުންނަށެވެ.
"ނަފުރަތާ ގުޅުން ހުރި ކުށްތަކާއި ނަފުރަތަށް ހިތްވަރު ދިނުން ގުދުސްގައި އިތުރުވަމުން އެބަދޭ،" އެންގްލިކަން ފައްޅީގެ ފާދިރީ އާޗްބިޝޮޕް ހޮސާމް ނައުމް ބުންޏެވެ.
އެގޮތުން ނަސާރާއިންގެ ގަޔަށް ކުޅުން ޖެހުމާއި ނަސާރާ ދީނުގެ ގަދީމީ ތަންތަނަށް ގެއްލުން ދިނުން އިތުރުވެފައިވާ ކަމަށް އޭނާ ފާހަގަކުރި އެވެ.
ގުދުސްގައި ހުންނަ އިނގިރޭސިވިލާތުގެ ކޮންސިއުލޭޓުން ކުރި ޓްވީޓެއްގައި ސަހަރާއަށް ގެއްލުން ދިނުން ކުށްވެރި ކުރުމަށް ފަހު ބުނީ އެކަން ކުރި މީހުންނަށް އަދަަބު ދޭން ޖެހޭނެ ކަމަށެވެ.
ނަސާރާއިންގެ ފައްޅި އާއި އިނގިރޭސިވިލާތުގެ އިތުރުން އިޒްރޭލުގެ ފޮރިން މިނިސްޓްރީން ވެސް އެ އަމަލު ކުށްވެރި ކުރި އެވެ. އިޒްރޭލް ފުލުހުން ބުނީ އެކަމުގެ ތަހުގީގު ކުރިއަށްދާ ކަމަށެވެ.
ގެއްލުން ދިން ސަހަރާއަކީ 1848 ވަނަ އަހަރު ގާއިމްކުރި ތަނެކެވެ. އެ ތަނުގައި ވަޅުލާފައިވާ މީހުންގެ ތެރޭގައި ސައިންޓިސްޓުންނާއި، ސިޔާސީ މީހުންނާއި، ސިފައިންނާއި، ފާދިރީން ހިމެނެ އެވެ. އޭގެ ތެރެއިން ގިނަ މީހުންނަކީ ގުދުސްއާ ގުޅުން ހުރި ޝަހުސިއްޔަތުތަކެވެ.
