ޗައިނާއިން ދަތުރު ކުރާ މީހުން ކޮވިޑަށް ޓެސްޓު ކުރަން ޔޫރަޕިއަން ޔޫނިއަން (އީޔޫ) ގެ މެމްބަރު ހުރިހާ ގައުމަކަށް ލަފާ ދިނުމަށް އީޔޫގެ އޮފިޝަލުން ބާރު އަޅައިފި އެވެ.
ޗައިނާގެ ޒީރޯ ކޮވިޑް ސިޔާސަތު އުވާލައި ތިން އަހަރަށް ފަހު ބޯޑަރު ހުޅުވާލުމުން، އަންނަ އާދީއްތަ ދުވަހުން ފެށިގެން އެ ގައުމުގެ މީހުންނަށް އެހެން ގައުމުތަކަށް ދަތުރުކުރެވޭނެ އެވެ.
އެހެން ނަމަވެސް މި ވަގުތު ޗައިނާގައި ހަލުވިކަމާ އެކު ކޭސްތައް އިތުރުވަމުންދާ ކަމަށް ރިޕޯޓުތައް ބުނެ އެވެ. ހުޅަނގުގެ ނޫސްތަކުން ބުނާ ގޮތުގައި ހޮސްޕިޓަލްތަކާއި މޯޗަރީތައް ވެސް ވަނީ ފުރިފަ އެވެ.
އީޔޫގެ ބައެއް ގައުމުތަކުން ނިންމާފައި ވަނީ ޗައިނާއިން ދަތުރު ކުރާ މީހުން ޓެސްޓު ކުރަން ޖެހޭނެ ކަމަށެވެ. އެކަމަކު މީގެ ކުރިން އީޔޫގެ އިދާރާއަކުން ބުނީ އެ ފިޔަވަޅު އަޅަން ޖެހޭ ސަބަބެއް ނެތް ކަމަށެވެ.
ޗައިނާއިން ދަތުރު ކުރާ މީހުންގެ ނެގެޓިވް ޕީސީއާރް ނަތީޖާ ހުށަހަޅަން ފެންނަ ކަމަށް ބުދަ ދުވަހު ލަފާދިނީ އީޔޫގެ 27 ގައުމެއްގެ އޮފިޝަލުން ހިމެނޭ އިންޓެގްރޭޓެޑް ޕޮލިޓިކަލް ކްރައިސިސް ރެސްޕޯންސް ގްރޫޕް (އައިޕީސީއާރް) އިންނެވެ.
އައިޕީސީއާރުން ލަފާދިން ކަންކަން
- ޗައިނާއިން ދަތުރު ކުރާ މީހުން ނެގެޓިވް ޕީސީއާރް ނަތީޖާ ހުށަހެޅުން
- ޗައިނާއިން ދަތުރު ކުރާ ފްލައިޓްތަކުގައި ހުރިހާ ޕަސެންޖަރުން މާސްކު އެޅުން
- ޗައިނާއިން ދަތުރު ކުރާ ފްލައިޓްތަކުގައި ރޭންޑަމްކޮށް ޓެސްޓު ކުރުން
- އެއާޕޯޓުތަކުގެ ނަޖިސް ފެން މޮނީޓާ ކުރުން
އަންގާރަ ދުވަހު އީޔޫގެ ތަންފީޒީ އިދާރާ، ޔޫރޮޕިއަން ކޮމިޝަނުން ވެސް ބުނީ މެމްބަރު ގިނަ ގައުމުތަކުން ތާއީދުކުރަނީ ޗައިނާއިން ދަތުރު ކުރާ މީހުންނާ މެދު ރައްކާތެރިކަމުގެ ފިޔަވަޅު އެޅުމަށް ކަމަށެވެ.
ޓެސްޓު ކުރުމަށް އީޔޫއިން ބާރު އެޅި ނަމަވެސް، އެކަމާ ގުޅޭ ސިޔާސަތެއް އެކުލަވާލާނެކަން ސާފެއް ނޫނެވެ. އީޔޫގެ ގައުމުތަކަށް އެ ގައުމެއްގައި ތަންފީޒު ކުރަން ބޭނުންވާ ފިޔަވަޅެއް ތަންފީޒް ކުރެވޭނެ އެވެ. އީޔޫގެ ޒިންމާއަކީ ހާލަތު ވަޒަންކޮށް އެންމެ އެކަށޭނަ ލަފާ އާއި އިރުޝާދު ދިނުމެވެ.
