އިޒްރޭލުގެ މިނިސްޓަރަކު އަގްސާ މިސްކިތުގެ ހަރިންމައަށް ޒިޔާރަތް ކުރެއްވުމުން މުސްލިމް ގައުމުތަކުން އެކަން ކުށްވެރިކޮށްފި އެވެ.
އާ ސަރުކާރުގެ ނޭޝަނަލް ސެކިއުރިޓީ މިނިސްޓަރު އިތަމާރް ބެން ގްވިރް އަންގާރަ ދުވަހު އަގްސާ މިސްކިތުގެ ހަރިންމައަށް ޒިޔާރަތް ކުރެއްވީ ހަމަނުޖެހުން އުފެދުމުގެ ފުރުސަތު ބޮޑުކަން އެނގި ހުރެ އެވެ.
"ޓެމްޕަލް މައުންޓް ވަނީ އެންމެންނަށް ހުޅުވިފައި،" ޔަހޫދީން އަގްސާ މިސްކިތަށް ކިޔާ ނަމުން އޭނާ ޓްވީޓް ކުރެއްވި އެވެ.
އިޒްރޭލުގެ އޮފިޝަލަކު ބުނީ އެ ޒިޔާރަތް ކުރީ އަގްސާ މިސްކިތާ ގުޅޭ ގޮތުން ހަދާފައިވާ އެއްބަސްވުމާ އެއް ގޮތަށް ކަމަށެވެ. މުސްލިމް ނޫން މީހުންނަށް އަގްސާ މިސްކިތުގެ ހަރިންމަ ތެރެއަށް ވަދެވުނު ނަމަވެސް، އެ ތަނުގައި އަޅުކަން ކުރުން މަނާ ވާނެ އެވެ.
ފަލަސްތީނުގެ އިތުރުން ސައުދީ އަަރަބިއްޔާ އާއި ޔޫއޭއީ އަދި އުރުދުންއިން ވަނީ އިޒްރޭލް މިނިސްޓަރުގެ ޒިޔާރަތް ކުށްވެރިކޮށްފަ އެވެ.
ފަލަސްތީނުގެ ބޮޑު ވަޒީރު މުހައްމަދު އިޝްތަޔާ ވިދާޅުވީ އިޒްރޭލުން މަސައްކަަތް ކުރަނީ އަގްސާ މިސްކިތް ޔަހޫދީންގެ ފައްޅިއަކަށް ބަދަލުކުރަން ކަމަށެވެ.
ސައުދީ އަރަބިއްޔާގެ ފޮރިން މިނިސްޓްރީން ބުނީ އަގްސާ މިސްކިތުގެ ހަރިންމަ ތެރެއަށް އިޒްރޭލުގެ އޮފިޝަލަކު "ވަދެގަނެގެން އުޅުން" ކުށްވެރި ކުރާ ކަމަށެވެ.
ޔޫއޭއީއިން ވެސް އެކަން ކުށްވެރިކޮށް ބުނީ އަގްސާ މިސްކިތް ފުރިހަމައަށް ހިމާޔަތް ކުރަން ޖެހޭ ކަމަށާއި އެ ތަނުގައި ހަމަނުޖެހުން އުފެދޭ ފަދަ އެއްވެސް ކަމެއް ކޮށްގެން ނުވާނެ ކަމަށެވެ.
އޭގެ އިތުރުން އުރުދުންއިން ވެސް "އެންމެ ހަރުކަށި" އިބާރާތުން އެކަން ކުށްވެރިކުރި އެވެ. އުރުދުންއިން ބުނީ މިސްކިތުގެ ހުރުމަތް ކެނޑޭ ފަދަ ކަންކަން ބަލައިނުގަންނާނެ ކަމަށެވެ.
ބެން ގްވިރް އަކީ ޖުވިޝް ޕަވާ ޕާޓީގެ ލީޑަރެވެ. އޭނާއަކީ ޔަހޫދީ ހަރުކަށި ފިކުރު ގެންގުޅޭ މީހެކެވެ. އިޒްރޭލުގެ އާ ސަރުކާރުގައި ގިނައިން ހިމެނެނީ ޔަހޫދީ "ހަރުކަށި" ޕާޓީތަކެވެ.
