އެހެން ޕާޓީގެ ދަފުތަރުގައި އޮތް ކަމަށް ނުވަތަ ފިންގަޕްރިންޓް އޮތް ފޯމެއް ނެތް ކަމަށް ބުނެ މިދިޔަ އަހަރުގެ މެއި މަހު އެމްޑީޕީއިން ވަކިކުރި 39،000 މެންބަރުންގެ ސަބަބުން ސަރުކާރަށް 70،000 ވޯޓު ގެެއްލޭނެ ކަމަށް އެ ޕާޓީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ނަޝީދުގެ ކެމްޕޭނުގެ ތެރެއިން މިރޭ ބޭއްވި ޖަލްސާއެއްގައި ވާހަކަަދައްކަވަމުން އެމަނިކުފާނު ވިދާޅުވީ ޕާޓީއިން ވަކިކޮށްފައިވާ 39،000 މީހުންގެ ވޯޓު ދެން ސަރުކާރަށް ހޯދުން ވަރަށް ދަތިވާނެ ކަމަށެވެ.
"އަދި، އެ މީހުންގެ ބަސް އަޑުއަހާ އެތައް ބަޔެއް އެބައުޅޭ، އަޅުގަނޑު އަންދާޒާކުރާ ގޮތުގައި 70،000 ވޯޓު ސަރުކާރަށް އެބަ ގެއްލޭ މި އަމަލުގެ ސަބަބުން، މި މުޑުދާރު އަމަލުގެ ސަބަބުން،" ނަޝީދު ވިދާޅުވި އެވެ.
ޕާޓީއިން މީހުން ވަކިކުރީ އެމީހުންގެ އެއްވެސް ބަހެއް ނެތި ކަމަށް ވެސް ނަޝީދު ވިދާޅުވި އެވެ. ނަމަވެސް އެ މެންބަރުންނާ ނުލާ މިހާރު އޮތް އެމްޑީޕީގެ ވޯޓާސް ލިސްޓުން ވެސް ބޮޑު ކާމިޔާބީއެއް ލިބޭނެ ކަމަށް އެމްޑީޕީގެ ފުރަތަމަ ވެރިކަމުގެ ރައީސްކަން ވެސް ކުރެއްވި ނަޝީދު ވިދާޅުވި އެވެ.
އެމްޑީޕީގެ ދަފުތަރުން 39،000 މެންބަރުން ވަކިކުރަން މިދިޔަ އަހަރުގެ މެއި މަހު އެ ޕާޓީގެ ގައުމީ މަޖިލީހުން ނިންމީ ޕާޓީގެ ދަފުތަރު އިސްލާހުކުރުމަށްޓަކާ އެހެން ޕާޓީތަކުގައި ތިބި އަދި ގާނޫނީ ގޮތުން ފިންގަޕްރިންޓް ޖެހި ފޯމެއް ހުށަހަޅާފައިވާނުވާ މެންބަރުން ވަކިކުރުމަށް ކަމަށް ބުނެ އެވެ. އަދި ވަކިކުރި މެންބަރުން އަލުން އެ ޕާޓީއަށް ވަނުމަށް ތިން މަހުގެ މުހުލަތެއް ވެސް އޭރު ޕާޓީއިން ދިނެވެ.
ރިޔާސީ ޕްރައިމަރީ އިއުލާނުކުރުމާއެކު ނަޝީދު ވަނީ ޕާޓީގެ ދަފުތަރު ގަޑުބަޑު ވެފައިވާ ކަމަށް ބުނެ ޕާޓީގެ ޗެއާޕާސަން ފައްޔާޒު އިސްމާއިލަށް ސިޓީއެއް ވެސް ފޮނުއްވާފަ އެވެ. ނަމަވެސް އެމްޑީޕީއިން ވަނީ ނަޝީދުގެ ތުހުމަތުތައް ދޮގުކޮށް ޕާޓީގެ ދަފުތަރަކީ އެ ޕާޓީގެ އަސާސީ ގަވާއިދާއި ގައުމީ މަޖިލީހުގެ ނިންމުމާ އެއްގޮތަށް އިސްލާހު ކުރެވިފައިވާ ދަފުތަރެއް ކަމަށް ބުނެފަ އެވެ.
ޕާޓީގެ ރައީސް ނަޝީދު އަދި ރައީސް ސޯލިހު ވާދަކުރައްވާ ރިޔާސީ ޕްރައިމަރީގައި ވޯޓުލެވޭ މީހުންގެ ރަސްމީ ލިސްޓު އެމްޑީޕީއިން މާދަމާ އާންމުރާނެ އެވެ.
