މިތަނުގައި މިި ތިބީ މުހައްމަދު ނަޝީދުގެ ވަރުގަދަ ސަޕޯޓަރުންނެވެ. ބޮނޑިބަތް ޕާކުން މިރޭ ފެނުނު ގިނަ މީހުންނަކީ ދެގޮތެއް ނުވެ، 18 އަހަރު "އަންނި" އާއެކު ތިބި މީހުންނެވެ. ބައެއް މީހުން އެއަށްވުރެ ވެސް ގިނަ ދުވަހެވެ.
މިތަނުގައި މިރޭ މި ތިބި ގިނަ މީހުންނަކީ، ގިނަ ސިޔާސީ ޕާޓީ ހިމެނޭ އިންތިހާބެއް 2008 ގައި ބޭއްވުމުގެ ކުރިން، މޯލްޑިވިއަން ޑިމޮކްރެޓިކް ޕާޓީ ވެރިކަމަށް ގެންނަންޖެހޭ ކަމަށް ބުނި މީހުންނެވެ. މިވަގުތު ވެރިކަމުގައި އޮތީ އެ ޕާޓީ އެވެ. އެކަމަކު، މިވެރިން މިރޭ ވަކާލާތު ކުރަނީ، އަނެއްކާ ވެސް ބަދަލަކަށެވެ. އޭގެ ސަބަބުތައް ވެސް ކިޔަައިދިނެވެ.
"މި ސަރުކާރުން އެއްވެސް ކަމެއް ނުކުރެއެއްނު؟ އެމްޑީޕީތަ ވެރިކަމުގައި އޮތީ؟ އަހަންނަށް ފެންނަނީ ތަސްމީނު [އަލީ] އާ، ރޮޒެއިނާ [އާދަމް] އާ، މިހެން ގޮސް ޑީއާރްޕީގައި އުޅުނު ބަޔަކު،" މި ޖެނުއަރީ މަހު ބާއްވާ ރިޔާސީ ޕްރައިމަރީގައި ނަޝީދަށް ތާއީދު ކުރާ މީހަކު ބުންޏެވެ.
ނަޝީދާއެކު ޕްރައިމަރީގައި ވާދަ ކުރައްވާނީ މިހާރުގެ ރައީސް އިބްރާހިމް މުހައްމަދު ސޯލިހެވެ. ޒުވާން ދުވަސްވަރުން ފެށިގެން ރަހުމަތްތެރި އެ ދެ ބޭފުޅުންގެ މެދުގައި ބާއްވާ އިންތިހާބުގައި ކުރި ހޯދާ ލީޑަރަކު އަހަރު ފަހުކޮޅު ބާއްވާ ރިޔާސީ އިންތިހާބަށް ނިކުންނަވާނީ ވެރިކަން ކުރާ ޕާޓީގެ ކެންޑިޑޭޓުގެ ގޮތުގަ އެވެ.
ނަޝީދުގެ ސަޕޯޓަރުންނަށް އެމަނިކުފާނުގެ އެންމެ ކަމުދާ އެއް ސިފައަކީ މަސައްކަތްތެރިކަމާއި ދަގަނޑު ދަހަނާއެއް ފަދަ ނުގުޑާ އަޒުމެވެ. ނަޝީދުގެ ހިތްވަރަކީ އެމަނިކުފާނު ލެއްވުމުން ސަޕޯޓަރުންގެ ގަޔަށް ވާރުތަވާ އެއްޗެކެވެ.
"މި މީހާ ހަމަ ވަރުބައްޔެއް ނުވާނެ،" ނަޝީދުގެ ކެމްޕެއިނު ލަވައިގައި، އެމަނިކުފާނުގެ މަސައްކަތުގެ އަހުލާގާ ގުޅޭ ގޮތުން ބުނެފައި އިން ތަންކޮޅު އަޑު އިވުމުން ބޮނޑިބަތް ޕާކުގައި ސިގިރެޓެއް ބޯން ހުރި މީހަކު ބުނެލި އެވެ.
މިރޭ މި އެއްވުމުގައި ތިބި ގިނަ މީހުންނަށް ނަޝީދުގެ މަސައްކަތް ހުންނަ ގޮތް ވަރަށް ބޮޑަށް އެނގޭނެ އެވެ. މިދިޔަ ހަފުތާގެ އަންގާރަ ދުވަހުގެ ރޭ ނަޝީދުގެ ކެމްޕެއިން ސަލްޓަން ޕާކުގައި ލޯންޗު ކުރެއްވުމަށްފަހު މިރޭ ބޮނޑިބަތް ޕާކަށް އެމަނިކުފާނު ވަޑައިގަަތީ ހއ. ބާރަށާއި އެ އަތޮޅު އިހަވަންދޫ އާއި ދިއްދޫ އާއި ކެލާ އާއި ހދ. ކުޅުދުއްފުއްޓާއި އެ އަތޮޅު ވައިކަރަދޫ އާއި ކުމުންދޫ އާއި ށ. މިލަންދޫ އާއި އެ އަތޮޅު ކޮމަންޑޫއަށް ވަޑައިގެންނެވުމަށްފަހު އެވެ.
"އަންނިގެ މަސައްކަތް ބަރާބަރުވާނެ. އަބުުއިވެގެން، މާތް ވެގެނެއް މިކަމެއްނުވާނެ. ބަލަ ވެރިންނަކީ ރައްޔިތުންގެ ހާދިމުންނެއް ނޫންތަ،" ނަޝީދަށް ތާއީދު ކުރާ މުހައްމަދު ނައީމު، 43، ބުންޏެވެ. "ކުރިން [2018] ގައި ވެސް އަހަރެން ވޯޓި ދިނީ އަންނި ދެއްކި މީހަކަށް. މިފަހަރު މި ހުރީ އަންނި، އެހެންވީމަ އިތުރު ޗޮއިހެއް ނެތް."
އެއްވެފައި ތިބި މީހުންގެ ތެރެއިން ބައެއް މީހުން ދައްކަމުންދިޔައީ ނަޝީދުގެ ވާދަވެރިޔާގެ ވާހަކަ އެވެ. ބައެއް މީހުން ކުރި ޝަކުވާއަކީ ސަރުކާރުގެ މުދަލާއި މުވައްޒަފުންނާއި ވަސީލަތްތައް ކެމްޕެއިނަށް ބޭނުން ކުރާ ވާހަކަ އެވެ.
"ސަރުކާރަަށް ނެރެވީ ސިޔާސީ މަގާމުތަކުގައި ތިބި މީހުންނެއްނު. އެ މީހުން ނެރުނު މީހަކަށް މިތަނުގައި ފަސް މީހުން އެބަތިބި،" ނަޝީދު ވާހަކަ ދައްކާ އަޑު އަހަން އައިސްތިބި މީހުންނަށް އިޝާރާތް ކުރައްވަމުން މާފަންނު ހުޅަނގު ދާއިރާގެ ކުރީގެ މެމްބަރު އަބްދުﷲ އަބްދުއްރަހީމް ވިދާޅުވި އެވެ. "އެމްޑީޕީ މީހުންގެ ތާއީދު ސަރުކާރަށް ގެއްލިެއްޖެޔޭ."
މިތަނަށް އެއްވެފައި ތިބި މީހުންގެ ސަޕޯޓު ކިތަންމެހާ ވެސް ބޮޑަކަށް ނަޝީދަށް އެބަ އޮތެވެ. އެކަމަކު މުހިންމީ ވޯޓާސް ލިސްޓުގައި ނަން އޮތް 57،714 މީހުންގެ ތާއީދާއި ވޯޓެވެ. އެ ތާއީދު އޮތްކަން ނުވަތަ ނޫންކަން ޔަގީންވާނީ އިންތިހާބަށް ފަހެވެ.
