އެމްޑީޕީގެ ރިޔާސީ ޕްރައިމަރީގެ ކެމްޕެއިނުގައި ރައީސް އިބްރާހީމް މުހައްމަދު ސޯލިހުގެ ބަދަލުގައި އެމަނިކުފާނުގެ އަރިސް ބޭފުޅުން ފެންނާތީ، އެ ޕްރައިމަރީގައި ދެން ވާދަކުރައްވާ އެމްޑީޕީގެ ރައީސް މުހައްމަދު ނަޝީދު ފާޑުވިދާޅުވެއްޖެ އެވެ.
އިއްޔެ ހަވީރު އެމްޑީޕީ ހަރުގޭގައި ސަޕޯޓަރުންނާ ބައްދަލުކުރައްވައި ވާހަކަ ދައްކަވަމުން ނަޝީދު ވިދާޅުވީ އެމަނިކުފާނު ހުންނަވާނީ އެމްޑީޕީގެ އާންމު މެންބަރުންނާއި ދިވެހި ރައްޔިތުންނާ ވަރަށް ގާތުން ކަމަށެވެ. ކެމްޕޭނަކަށް ވެސް ނަޝީދުގެ ބަދަލުގައި ވަކި މީހަކު ގޮސް ނުހުންނާނެ ކަމަށް ވިދާޅުވި އެވެ.
"އަޅުގަނޑުގެ ކެމްޕޭނުގައި ފެންނާނީ އަޅުގަނޑު، [ހެންވޭރު ހުޅަނގު ދާއިރާގެ މެންބަރު] ހަސަން ލަތީފެއް ނޫން، [މެދު ހެންވޭރު ދާއިރާގެ މެންބަރު] އަލީ އާޒިމެއް ވެސް ނުޖެހޭ، [ގަލޮޅު އުތުރު ދާއިރާގެ މެންބަރު] އީވާއެއް ވެސް ނޫން، އިތުރު އެކަކު ވެސް ނޫން، އަޅުގަނޑު އުޅެން ޖެހޭނީ،" ނަޝީދު ވިދާޅުވި އެވެ.
ނަޝީދު އިޝާރާތް ކުރެއްވީ، ރައީސް ސޯލިހުގެ ކެމްޕެއިނުން ބާއްވާ ޖަގަހަ ޖަލްސާތަކުގައި ރައީސް ބައިވެރިވެޑައިނުގެން އަރިސް އެހެން ބޭފުޅުން ވާހަކަ ދައްކަވާތީ އެވެ. ޕްރައިމަރީގެ ކެމްޕެއިނުގައި ރައީސް އެއްވެސް ވާހަކައެއް ދައްކަވާފައިނެތްއިރު އެމަނިކުފާނު މި ވަގުތު ހުންނެވީ ވެސް ރާއްޖޭން ބޭރުގަ އެވެ.
"އަޅުގަނޑަށް ދެން ފެންނަނީ ޣައިރު ހާޒިރުގައި ކުރައްވާ ކެމްޕޭނެއް، ޣައިބުގައި ހުންނަވާ ލީޑަރެއް، ތިޔަ ބޭފުޅުން ކުރިމަތީގައި އަޅުގަނޑު ހުންނާނެ، އަޅުގަނޑު މިހާރު ވެސް މި ހުރީ ތިޔަ ބޭފުޅުންނަށް ފެންނަ ގޮތަށް،" ރައްޔިތުންގެ މަޖިލީހުގެ ރައީސްގެ މަގާމުގައި ހުންނެވި ނަޝީދު ވިދާޅުވި އެވެ.
އެމްޑީޕީގެ ފުރަތަމަ ސަރުކާރުގެ ރައީސްކަން ވެސް ކުރެއްވި ނަޝީދު ވިދާޅުވީ، އެމްޑީޕީގެ ދަފްތަރުން 39،000 އެއްހާ މީހުން ވަކިކުރުމުން އެ އެންމެ މެންބަރުންނާއި އެ މެންބަރުންގެ އާއިލާ މީހުން ހިމެނޭހެން ގާޓްގަނޑަކަށް 70،000 އެއްހާ މީހުންގެ ވޯޓެއް ދެން ރައީސް ސޯލިހަށް ނުލިބޭނެ ކަމަށެވެ.
"އެ 70،000 މީހުންގެ ވޯޓު އެމްޑީޕީއަށް އަލުން ހޯދޭނީ އަޅުގަނޑަށް، އެ ކަން ދެން ވާން އޮތީ ވެސް އަޅުގަނޑަށް، ހިތާމަ ހުރި ދެރަވަރު ކަމެއް، އެކަމަކު ކުރެވޭނެ ވަކި އިތުރު ކަމެއް ވެސް ނެތް،" ނަޝީދު ވިދާޅުވި އެވެ.
ނަޝީދު ތުހުުމަތުކުރެއްވި ގޮތުގައި އެމަނިކުފާނުގެ ބޭބޭފުޅު ޑރ. އިބްރާހީމް ނާޝީދާއި އަނބިކަނބަލުން ލައިލާ އަލީއާއި، އެމްޑީޕީގެ ކުރީގެ ސެކްރެޓަރީ ޖެނެރަލް ހާމިދު އަބްދުލް ޣަފޫރު ވެސް ހިމެނޭހެން ނަޝީދުގެ އަރިސް ބޭފުޅުންތަކެއް މިހާރު އެމްޑީޕީގެ ދަފްތަރުގައި ނެތް ކަމަށެވެ.
އަންނަ ޖެނުއަރީ މަހުގެ 28 ވަނަ ދުވަހު އޮންނަ އެމްޑީޕީގެ ރިޔާސީ ޕްރައިމަރީގެ ފޯރި ވަނީ ބޮޑުވެފަ އެވެ.
ނަޝީދުގެ ފެކްޝަން ބޭފުޅުން ރައީސް އަދި ސަރުކާރަށް ދަނީ ވަރަށް ބޮޑަށް ފާޑުކިޔަމުންނެވެ. ސަރުކާރާއި، ރައްޔިތުންގެ މަޖިލީހުގައި ތިއްބެވި ރައީސަށް ތާއީދުކުރައްވާ ބޭފުޅުން ދަނީ އެ ވާހަކަތަކަށް ރައްދު ވެސް ދެމުންނެވެ.
