ތިމާވެއްޓާ ގުޅުން ހުރި ކަންބޮޑުވުންތަކަށް ބެލުމެއް ނެތި އިޒްރޭލުގައި އެއް ފަހަރު ބޭނުން ކުރުމަށް ފަހު އުކާލާ ބާވަތްތަކުގެ ޕްލާސްޓިކް ތައްޓާއި ސަމުސާ ފަދަ ތަކެތިން ނަގާ ޓެކްސް އުވާލަން އާ ސަރުކާރުން ނިންމާފައިވާ ކަމަށް ފިނޭންސް މިނިސްޓަރު ބެޒަލޭލް ސްމޮޓްރިޗް ވިދާޅުވެއްޖެ އެވެ.
ދުނިޔޭގެ ގައުމުތަކުން މަސައްކަތް ކުރަނީ ކަނޑުތައް ތަގައްޔަރުވުމަަށް މަގުފަހިވާ ޕްލާސްޓިކް މަދު ކުރުމަށް ފިޔަވަޅު އެޅުމަށެވެ. އެގޮތުން އަޅާ އެންމެ މުހިއްމު ފިޔަވަޅަކީ ސިންގަލް ޔޫޒް ޕްލާސްޓިކް މަނާ ކުރުން ނުވަތަ ޓެކްސް ނެގުމެވެ.
އެހެން ނަމަވެސް އިޒްރޭލުގައި އެ ޓެކްސް އުވާލަން ސަރުކާރުން ނިންމީ، އެ ޓެކްސްއާ ދެކޮޅަށް ދީނީ ޕާޓީތަކުން އަޑުއުފުލާތީ އެވެ. އެ ޕާޓީތަކުން ބުނާ ގޮތުން އެ ޓެކްސުން ނަހަމަ ގޮތުގައި އެ މީހުން ކޮމިއުނިޓީތަކަށް އަމާޒުކުރެ އެވެ.
މިދިޔަ ބުރާސްފަތި ދުވަހު ފިނޭންސް މިނިސްޓަރުކަމަށް ވަޑައިގެންނެވި ސްމޮޓްރިޗް ވިދާޅުވީ އެންމެ ފުރަތަމަ ފިޔަވަޅަކީ ޕްލާސްޓިކުން ނަގާ ޓެކްސް އުވާލުން ކަމަށެވެ.
އިޒްރޭލުގައި އެ ޓެކްސް ތައާރަފުކުރީ 2021 ވަނަ އަހަރު އެވެ. އެ ގައުމުގެ އެންވާރަމެންޓަލް ޕްރޮޓެކްޝަން މިނިސްޓްރީން ބުނީ ޓެކްސް ތަންފީޒު ކުރަން ފެށި ފަހުން ސިންގަލް ޔޫޒް ޕްލާސްޓިކް ބޭނުންކުރުން 50 ޕަސެންޓު މަދުވި ކަމަށެވެ.
އެ މިނިސްޓްރީން ބުނީ އާ ސަރުކާރުގެ ނިންމުމާއި އެ ނިންމުމުން ކުރާނެ އަސަރު ދިރާސާ ކުރަމުންދާ ކަމަށެވެ.
