ލިވަޕޫލް (ޑިސެމްބަރު 31) - އިނގިރޭސި ޕްރިމިއާ ލީގުގައި މިރޭ ލެސްޓާ ސިޓީ އަތުން 2-1 އިން ހޯދި އުނދަގޫ މޮޅާ އެކު ލިވަޕޫލުން ގަދަ ހަތަރެއްގެ ރޭހުގައި ފިޔަވަޅެއް ކުރިއަށް ޖެހިލައިފި އެވެ.
މިހާރު އޮތްގޮތުން، ލީގުގެ ހަތަރެއްގައި އޮތް ޓޮޓެންހަމް ހޮޓްސްޕާސް އާއި ހަ ވަނައިގައި އޮތް ލިވަޕޫލާ ދެމެދު އޮތީ ދެ ޕޮއިންޓުގެ ފަރަގެކެވެ. ޓޮޓެންހަމަށް 16 މެޗުން 30 ޕޮއިންޓް ލިބިފައިވާއިރު، ފަސް ވަނައިގައި އޮތް މެންޗެސްޓާ ޔުނައިޓެޑަށް ވަނީ 15 މެޗުން 29 ޕޮއިންޓް ލިބިފަ އެވެ. ލިވަޕޫލް ހައެއްގައި އޮތީ 16 މެޗުން 28 ޕޮއިންޓް ހޯދައިގެންނެވެ.
ލިވަޕޫލްގެ އެންފީލްޑް ސްޓޭޑިއަމްގައި ކުޅުނު މިރޭގެ މެޗު ފަށައިގެން ހަތަރު ވަނަ މިނިޓްގައި ލެސްޓާ އިން ލީޑުނެގި އެވެ. އެ ގޮތުން ލިވަޕޫލްގެ މެދުތެރެއިން ލިބުނު ބޯޅައެއް ހިފައިގެން ހުސްކޮށް އޭރިއާތެރެއަށް ވަދެ، ލެސްޓާގެ މިޑްފީލްޑަރު، ކިއެނަން ޑިއުސްބަރީ-ހޯލް ވަނީ ގޯލުގެ ކައިރީ ކަނަށް ބޯޅަ ފޮނުވާލައިފަ އެވެ.
މި މެޗުގައި ލިވަޕޫލުން ޖެހި ދެ ގޯލަކީ ވެސް ލެސްޓާގެ ބެލްޖިއަމް ޑިފެންޑަރު ވައުޓް ފާސް އަތުން ބައިކޮޅަށް ވަން ގޯލުތަކެކެވެ. އެ ގޮތުން، މެޗުގެ 38 ވަނަ މިނިޓްގައި ލިވަޕޫލްގެ ޓްރެންޓް އަލެކްސަންޑަ-އާނޯލްޑް ނެގި ހުރަހެއް ސަލާމަތްކުރަން ފާސް ޖައްސާލި ބޯޅަ ލެސްޓާގެ ކީޕަރު ޑެނީ ވޯޑް ބޯމަތިން ގޮސް ދަނޑީގައި ޖެހިފައިވަނީ ބައިކޮޅަށެވެ
އޭގެ ފަހުން، މެޗުގެ 45 ވަނަ މިނިޓްގައި ލިވަޕޫލްގެ ޑާވިން ނޫނޭޒް، ހާފުގެ މެދުތެރެއިން ބޯޅަ ހިފައިގެން އޭރިއާތެރެއަށް ވަންނަމުން ޖެހި ބޯޅަ ދަނޑީގައި ޖެހިފައި ނުކުތް ވަގުތު ފާސް އެ ބޯޅަ ސަލާމަތްކުރަން ފޮނުވާލުމުން އަމާޒުވީ ގޯލުގެ މަތީ ދާގަނޑަށެވެ. ފާސް އަކީ ޕްރިމިއާ ލީގުގެ އެއް މެޗެއްގައި ބައިކޮޅަށް ދެ ގޯލު ޖެހި ހަތަރު ވަނަ ކުޅުންތެރިޔާ އެވެ. މީގެ ކުރިން އެކަން ކުރީ ޖޭމީ ކެރަގާ، މިކައެލް ޕްރޮކްޓޯ އަދި ޖޮނަތަން ވޯލްޓާސް އެވެ.
ދެ ވަނަ ހާފުގައި ގޯލު ޖަހަން ލިވަޕޫލްގެ މުހައްމަދު ސަލާހާއި ނޫނޭޒަށް ހުސްކޮށް ލިބުނު ފުރުސަތުތަކުން ޖެހި ބޯޅަތައް ދިޔައީ ގޯލާ ސީދާނުވެ އެެވެ.
ޕްރިމިއާ ލީގުގައި މިރޭ ވެސްޓް ހޭމް ޔުނައިޓެޑް ދަނޑުގައި ބްރެންޓްފޯޑް ވަނީ 2-0 އިން މޮޅުވެފަ އެވެ.
އައިވަން ޓޯނޭ އާއި ޖޯޝް ޑަސިލްވާގެ ގޯލުތަކުން ބްރެންޓްފޯޑުން މި ހޯދި މޮޅާ އެކު އެ ޓީމު އޮތީ 17 މެޗުން 23 ޕޮއިންޓާ އެކު ލީގުގެ ނުވަ ވަނައިގަ އެވެ. ވެސްޓް ހޭމް އޮތީ 17 މެޗުން 14 ޕޮއިންޓާ އެކު 17 ވަނައިގަ އެވެ.
ވެސްޓް ހޭމް މި ވަނީ 2017 ވަނަ އަހަރުގެ އޭޕްރީލް މަހުގެ ފަހުން ފުރަތަަމަ ފަހަރަށް ލީގުގައި ޖެހިޖެހިގެން ފަސް މެޗުން ބަލިވެފަ އެވެ. އަނެއްކޮޅުން، މިއީ ކުރިން މެންޗެސްޓާ ޔުނައިޓެޑާއި އެވަޓަން އަށް ކޯޗުކޮށްދިން ޑޭވިޑް މޮއިސް ހުރި ކްލަބެއް ލީގުގައި ޖެހިޖެހިގެން ފަސް މެޗުން ބަލިވި ދެ ވަނަ ފަހަރެވެ. މީގެ ކުރިން މޮއިސް، 2005 ވަަނަ އަހަރު އެވަޓަންއާ ހަވާލުވެ ހުރިއިރު ހުރިއިރު، އެ ޓީމު ވެސް ލީގުގައި ޖެހިޖެހިގެން ފަސް މެޗުން ބަލިވި އެވެ.
