އިޒްރޭލުގެ ތާރީހުގައި "ދީނީ ގޮތުން އެންމެ ހަރުކަށި" ސަރުކާރު ވެރިކަމާ ހަވާލުވެއްޖެ އެވެ.
އާ ސަރުކާރުގެ ބޮޑު ވަޒީރަކީ ކުރިން ވެސް އެ މަގާމު ފުރުއްވި ބެންޖަމިން ނަތަންޔާހޫ އެވެ. އެމަނިކުފާނުގެ ލިކޫދް ޕާޓީއިން ވަނީ "އަލްޓްރާ ނޭޝަނަލިސްޓް" އަދި "އަލްޓް އޯތޮޑޮކްސް" ޔަހޫދީ ޕާޓީތަކާ އެކު ކޯލިޝަން ހަދައިފަ އެވެ.
އޭގެ ސަބަބުން އިޒްރޭލާއި ފަލަސްތީނުގެ މައްސަލަ އިތުރަށް ގޯސްވެ، ޖުޑިޝަރީއަށް ގެއްލުން ލިބި، މައިނޯރިޓީންގެ ހައްގުތަކަށް އުނިކަން ލިބޭނެކަމުގެ ކަންބޮޑުވުން އިޒްރޭލުގެ އެތެރެ އާއި ބޭރުގައި ވެސް އެބަ އޮތެވެ.
ނަތަންޔާހޫ ވައުދުވެވަޑައިގެންނެވީ ސުލްހައަށް މަސައްކަތްކޮށް، މަދަނީ ހައްގުތައް ހިމާޔަތް ކުރުމަށެވެ.
ގުދުސްގައި އޮތް ޕާލަމެންޓްގެ ހާއްސަ ބައްދަލުވުމެއްގައި ނަތަންޔާހޫ ވިދާޅުވީ އާ ސަރުކާރުން "ވެރިކަން ހަރުދަނާކޮށް، ސުލްހަ އާއި ރައްކާތެރިކަން އިޒްރޭލް ރައްޔިތުންނަށް ކަށަވަރުކޮށްދޭނެ" ކަމަށެވެ.
"ދައުލަތް ނިމުނީ ކަމަށް އަދި ޑިމޮކްރަސީ ނިމުނީ ކަމަށް ބުނެ އިދިކޮޅުން ތަކުރާރުކޮށް ކުރާ ޝަކުވާ އެބަ އަޑު އިވޭ. އިދިކޮޅު ފަރާތްތަކަށް އިންތިހާބުން މޮޅުނުވެވުމަކީ ޑިމޮކްރަސީ ނިމުމެއް ނޫން. ޑިމޮކްރަސީގެ އަސާސަކީ މިއީ،" ނަތަަންޔާހޫ ވިދާޅުވި އެވެ.
އިދިކޮޅު ފަރާތްތަކުން ތުހުމަތު ކުރާ ގޮތުގައި "ހަރުކަށި" ޕާޓީތަކާ އެކު ޑީލްތަކުގައި ސޮއިކުރަން ނަތަަންޔާހޫއަށް މަޖުބޫރުވެވަޑައިގެންނެވީ މިނިވަން ފިކުރުގެ ޕާޓީތަކުން ސަރުކާރުގައި ބައިވެރިވާން ދެކޮޅު ހެދުމުންނެވެ.
ޕާޓީތަކުން ނަތަންޔާހޫގެ ސަރުކާރުގައި ބައިވެރިވާން ބޭނުން ނުވަނީ، އެމަނިކުފާނާ ދެކޮޅަށް ރިޝްވަތާއި މަކަރާއި ހީލަތް ހެދުން އަދި އިތުބާރު ގެއްލުވާލުމުގެ ދައުވާ އުފުލާފައި ވާތީ އެވެ. އެހެން ނަމަވެސް ނަތަންޔާހޫ އެ ތުހުމަތުތައް ދޮގުކުރައްވަ އެވެ.
