މި ސަރުކާރު ހިންގުމުގައި ވާދަވެރި ސިޔާސީ ފަރާތްތަކުގެ ވިސްނުންތަކަށް ސިހި "ރިއެކްޓް ނުކުރައްވާނެ" ކަމަށް ވިދާޅުވެ، ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ޑިފެންސް މިނިސްޓަރ މާރިޔާ އަހުމަދު ދީދީ މިރޭ ރައްދު ދެއްވައިފި އެވެ.
ގައުމުގައި ހިނގާ ކަންކަމަށް ސަރުކާރު ރިއެކްޓުނުކުރާ ކަމަށް ނަޝީދު ބުދަ ދުވަހު ވިދާޅުވުމުން އެކަމަށް ރައްދު ދެއްވައި، ރައީސް ސޯލިހުގެ ކެމްޕެއިން ޓީމުން ބޭއްވި ޖަލްސާއެއްގައި މާރިޔާ ވިދާޅުވީ މިހާތަނަށް އެނގިފައި އޮތީ އެމްޑީޕީއަކީ އެއްވެސް އިރެއްގައި ރިއެކްޓުކުރާ ޕާޓީއެއް ނޫންކަން ކަމަށާއި އެމްޑީޕީއަކީ "ޕްރޯއެކްޓު" ކުރާ ޕާޓީއެއް ކަމަށެވެ.
"އަޅުގަނޑުމެން އަބަދުވެސް ދައްކަނީ ހަކުޅި ކުރިއަށް ކުޅޭ ވާހަކަ. ތިބޭފުޅުން އަބަދުވެސް ހަނދާން ހުންނާނެ އަޅުގަނޑުމެންނަކީ ބައެއްގެ ފަހަތުން ބަޔަކު ކުރާ ކަންތަކަށް ބަލަމުންދާ ބައެއްނޫން. ހަކުޅި ކުރިއަށް ކުޅޭ ވާހަކަ ދައްކަމުން މިހިސާބަށް އައިސްފަ ކުއްލިއަކަށް ރިއެކްޓުގެ ވާހަކަ ދެއްކުނީމަ އަޅުގަނޑު ވަރަށް ދެރަވޭ" މާރިޔާ ވިދާޅުވި އެވެ.
ރޭގެ ކެމްޕޭން ޖަލްްސާގައި ނަޝީދު ދެއްކެވި ވާހަކަތަކާ ގުޅިގެން މާރިޔާ އިތުރަށް ވިދާޅުވީ ސަރުކާރުން ގެންގުޅޭ ހަމަހަމަކަމުގެ ސިޔާސަތަށް ވެސް ނަޝީދު ފާޑުވިދާޅުވި ކަމަށާއި ހަގީގަތުގައި އެމްޑީޕީއިން މިހާތަނަށް ވެސް ގަބޫލުކުރަމުން އައީ މީހާ ތަރައްގީވާ ވާހަކަ ކަމަށެވެ.
މީހާގެ ތަރައްގީއަށް ކުރަން ޖެހޭ ކޮންމެ ކަމެއް ކުރަން ޖެހޭނެ ކަމަށާއި އޭގައި ކުޑަރަށެއް ބޮޑުރަށެއް ބެލުމެއް ނޯންނާނެ ކަމަށްވެސް ވިދާޅުވިއެވެ.
މީގެ ކުރިން 2018 ވަނަ އަހަރު ވެރިކަމަށް އައުމުގެ މަސައްކަތް ފެށުނީއްސުރެ އަދި ޒީރާ ރާއްޖޭގެ ވާހަކައިގެ އަސްލަކީ ވެސް ތަފާތުކުރުމެއް ނެތި ތަރައްގީ ގެނައުމުގެ ސިޔާސަތު ކަމަށް މާރިޔާ ވިިދާޅުވި އެވެ.
"ކުރީގެ ރައީސް އަބްދުﷲ ޔާމީން ދައްކަވަމުން ގެންދެވީ ރާއްޖޭގެ 70 ޕަސެންޓު އާބާދީ މާލެއަށް އަޅާލާ ވާހަކަ. އެވާހަކަ ދެއްކީމަ އަޅުގަނޑުމެން ދެންނެވީ ހޯހޯއޭ އެގޮތަަކަށް ނޫނޭ އެމްޑީޕީން ކަންކުރާނީ އެމީހެއްގެ ރަށުގަ އެމީހަކަށްް ހަމަޖެހިލައިގެން ދިރިއުޅެވޭނެ ގޮތްތަކޭ އަޅުގަނޑުމެން ހޯދައިދޭނީ،" މާރިޔާ ވިދާޅުވި އެވެ.
ރޭގެ ޖަލްސާގައި ނަޝީދު ވަނީ މި ސަރުކާރުން ގެންގުޅެމުން އަންނަ ހަމަހަމަކަމުގެ ސިޔާސަސަތަށް ވަރަށް ބޮޑަށް ފާޑު ވިދާޅުވެފައެވެ. ނަޝީދު ފާހަގަކުރެއްވީ ކުދި ރައްރަށުގައި މަޝްރުއޫތައް ހިންގުމުގައި ބޮޑެތި އާބާދީތައް އޮންނަ ތަންތަނާ އެއްހަމަ ކުރުމަކީ ހަގީގަތުގައި ހަމަހަމަކަން ނޫން ކަމަށެވެ.
