އަންނަ ހަފުތާގައި ޗައިނާގެ ބޯޑަރު ހުޅުވާލަން ނިންމުމާ އެކު، އެ ގައުމުން އެމެރިކާއަށް ދަތުރުކުރާ މީހުން ކޮވިޑަށް ޓެސްޓު ކުރަން ޖެހޭނެ ކަމަށް އަންގައިފި އެވެ.
މީގެ ކުރިން އިޓަލީ، ޖަޕާން، ޓައިވާން އަދި އިންޑިއާއިން ވެސް ބުނީ ނެގެޓިވް ޕީސީއާރް ނަތީޖާ ހުށަހަޅަން ޖެހޭނެ ކަމަށެވެ. އެހެން ނަމަވެސް އޮސްޓްރޭލިއާ އާއި އިނގިރޭސިވިލާތުން ބުނީ ޗައިނާއިން ދަތުރުކުރާ މީހުންނާ މެދު ހާއްސަ އުސޫލެއް ނުގެންގުޅޭނެ ކަމަށެވެ.
ޗައިނާގެ ބޯޑަރު ބަންދުކޮށްފައި އޮންނަތާ ތިން އަހަރު ފަހުން، އާއްމުންނަށް ބައިނަލްއަގްވާމީ ދަތުރުތަކަށް ހުޅުވާލަން ހަމަޖެހިފައި އޮތީ ޖެނުއަރީ އަށް ވަނަ ދުވަހު އެވެ.
އެކަމަކު އެ ގައުމުގައި ފިޔަވަޅުތަކަށް ލުއިދޭން ފެށުމުން ކޭސްތައް އިތުރުވެފައި ވާތީ ގައުމުތަކުން ކަންބޮޑުވެ އެވެ.
މިހާރު ޗައިނާގައި ކޮންމެ ދުވަހަކު ވެސް 5000 ކޭސް ރިޕޯޓުކުރެ އެވެ. އެކަމަކު އެނެލިސްޓުން ދެކޭ ގޮތުގައި ކޮންމެ ދުވަހަކު ވެސް މިލިއަނެއްހާ މީހުންނަށް ބަލި ޖެހެމުން ދިޔުން އެކަށީގެންވެ އެވެ. ޗައިނާގެ ހޮސްޕިޓަލްތައް ފުރި، އާދައިގެ ބޭސް ލިބުން ވެސް ދަތިވެފައިވާ ކަމަށް ރިޕޯޓުތައް ބުނެ އެވެ.
