ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ދެމެދު އުފެދިފައިވާ ނުތަނަވަސް ކަމުގެ އަސްލަކީ ރައީސުލްޖުމްހޫރިއްޔާގެ މަގާމަށް ވަޑައިގަތުމަށް ރައީސް ނަޝީދު ބޭނުންފުޅުވުން ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
އެމްޑީޕީގެ ރިޔާސީ ކެންޑިޑޭޓު ހޮވުމަށް ބާއްވާ ޕްރައިމަރީގައި ރައީސް ސޯލިހުއާ ދެކޮޅަށް ނުކުންނަވާނީ ރައީސް ނަޝީދެވެ. ދެ ބޭފުޅުންގެ މެދުގައި ބޮޑެތި ހިޔާލު ތަފާތުވުންތަކެއް އުފެދިފައިވާއިރު ޕާޓީ ވެސް ވަނީ ދެ ފެކްޝަނަކަށް ފަޅިވެފަ އެވެ.
ރިޔާސީ ޕްރައިމަރީގެ ފޯރިގަދަވެފައިވާއިރު ނަޝީދު ވަނީ ރައީސް ސޯލިހުއާ އެކު ސިޔާސީ މަސައްކަތް ނުކުރައްވާނެ ކަމަށް ހާމަކުރައްވާފަ އެވެ. އަދި، ގެންދަވަނީ މި ސަރުކާރުގެ ސިޔާސަތުތަކަށް ވަރަށް ބޮޑަށް ފާޑު ވިދާޅުވަމުންނެވެ.
މިއީ މި ފާޑުކިޔުންތަކަށް ރައީސް ސޯލިހު ފާޅުގައި ރައްދު ދެއްވި ފުރަތަމަ ފަހަރެވެ. ނަޝީދު ވެރިކަމަށް ވަޑައިގަތުމަށް ބޭނުންފުޅު ވަނީ ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށެވެ. އެކަން އެގޮތަށް ކުރެވެން އޮތީ ވެރިކަން ކުރާ ކޯލިޝަނުގެ ބައިވެރިންނާ މަޝްވަރާ ކުރުމަށް ފަހު ކަމަށް ރައީސް މިއަދު ވިދާޅުވި އެވެ.
"ވަކި މީހެއްގެ ވަކި ކަމެއް ހާސިލްކުރުމަށް ޓަކައި އަޅުގަނޑަށް ހުށަހަޅާ ހުށަހެޅުމެއްގައި އަޅުގަނޑަށް ގޮތެއް ނިންމޭނީ ދެން ތިބި އެންމެންގެ މަޝްވަރާ މަތީގައި. މި ވަގުތު ހިޔާލުތަފާތުވުން އުފެދި އޮތް މައިގަނޑު ސަބަބަކީ ވެރިކަމުގައި މި ހުރި ހުރުން،" މިއަދުގެ ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވި އެވެ.
ނަޝީދު ކެމްޕެއިން ކުރައްވަމުން ގެންދަވަނީ ރާއްޖޭގެ ވެރިކަމުގެ ނިޒާމް, ބަރުލަމާނީ ނިޒާމަށް ބަދަލުކޮށް, އެމްޑީޕީން އެކަނި ވެރިކަމަށް އައުމަށެވެ. ނަމަވެސް، މިއަދު ވެސް ރައީސް ސޯލިހު ވަނީ ކޯލިޝަނަކާ އެކު ވެރިކަން ކާމިޔާބު ކުރެވޭނެ ކަމަށް ވިދާޅުވެފަ އެވެ.
"އަޅުގަނޑު ނޫން ކޮންމެ ބޭފުޅަކު ވެރިކަމުގައި ހުންނެވި ނަމަވެސް މި މައްސަލަ އޮންނާނެ. ރައީސް ނަޝީދަކީ އަބަދުވެސް ވެރިކަމުގައި ހުންނަން ބޭނުންވާ ބޭފުޅެއް،"
ރައީސް ސޯލިހު ވަނީ ރައީސް ނަޝީދާ ނުލައި ރިޔާސީ އިންތިހާބު ކާމިޔާބު ކުރުން ވެގެންދާނީ ޗެލެންޖެއްގެ ގޮތުގައި މިއަދު ސިފަކުރައްވާފަ އެވެ.
"ޕްރައިމަރީ ނިމުނީމަ އެކީގައި މަސައްކަތް ކުރަން ޖެހޭ ކަމަށް ދެނެގަނެއް ކުރިއަށް ދިޔުން. ނިމުމަށް ފަހު ރިޔާސީ އިންތިހާބު ކާމިޔާބު ކުރުމަށް އެންމެން އެކީ ތިބުން. އަޅުގަނޑު ބޭނުން ވަނީ ޕާޓީ އެކީގައި ކުރިއަށްދާން،" ރައީސް ވިދާޅުވި އެވެ.
މިދިޔަ ޖޫން މަހު ބޭއްްވި ޗެއާޕާސަންގެ އިންތިހާބާ ދިމާކޮށް ދެ ރައީސުންގެ ގުޅުން ވަރަށް ބޮޑަށް ހީނަރުވެގެން ދިޔަ އެވެ.
މި އިންތިހާބުގައި ނަޝީދު ތާއީދު ކުރެއްވީ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ އަށެވެ. އިންތިހާބު ކާމިޔާބުކުރެއްވީ ރައީސް ސޯލިހު ތާއީދު ކުރެއްވި މި ސަރުކާރުގެ އިކޮނޮމިކް މިނިސްޓަރު ފައްޔާޒް އިސްމާއީލެވެ.
އެއަށްފަހު ފައްޔާޒުގެ ޗެއާޕާސަންގެ ދައުރުގައި ރިޔާސީ ޕްރައިމަރީ ބާއްވާއިރު ޕާޓީގެ ދަފްތަރުން ނުހައްގުން އެތައް ހާސް މެމްބަރުންނެއް ވަކިކޮށް ދަފްތަރު "ގަޑުބަޑު" ކޮށްފައިވާ ކަމަށް ނަޝީދު ވަނީ ތުހުމަތު ވެސްް ކުރައްވާފަ އެވެ. އަދި، ދަފްތަރުން އުނިކުރީ ރައީސް ސޯލިހަށް ވޯޓު ނުދެއްވާނެ ކަމަށް ބެލެވޭ މެމްބަރުން ކަމަށް ވެސް ނަޝީދު ވިދާޅުވި އެވެ.
ރާއްޖޭގެ ވެރިކަން ކުރާ ނިޒާމް ބަރުލަމާނީ ނިޒާމަށް ބަދަލުކޮށް, ރިޔާސީ އިންތިހާބެއްގައި ދެވަނަ ބުރެއްގެ ވޯޓަކަށް ނުގޮސް އިންތިހާބު ކާމިޔާބު ކުރެވޭނެ މަގެއް ކަނޑައަޅެމަށް ފެންނަ ނުފެންނަ ވޯޓެއް ނެގުމަށް އެމްޑީޕީ ކޮންގްރެސްއަށް ހުށަހެޅުމަށް ނިންމި ގަރާރު ނަޝީދު އަނބުރާ ގެންދެވި އެވެ.
