އަންނަ ފެބްރުއަރީ މަހު، ހަތަރު ވަނަ ދުވަހުން ފެށިގެން ސ. ގަމާއި ގއ. ކޫއްޑޫއާ ދެމެދު މޯލްޑިވިއަން އިން ކުރާ ދަތުރުތައް އިތުރު ކުރަން އެ އެއާލައިނުން ނިންމައިފި އެވެ.
އެ ދެމެދުގައި ކުރާ ދަތުރުތައް އިތުރު ކުރަން އެ އެއާލައިނުން ނިންމާފައި ވަނީ އާ އަހަރާ އެކު ފުލައި ޑުބާއީގެ ދަތުރުތައް ސީދާ ގަމަށް ފެށުމަށް ނިންމުމާ ގުޅިގެން، ރާއްޖެއިން ބޭރުން ގަމަށް އަންނަ ފަތުރުވެރިންނަށް ލުއިފަސޭހަތަކެއް ހޯދައިދިނުމަށް ކަމަށް އެ އެއާލައިނުން ބުނެ އެވެ.
ކޫއްޑޫ އާއި ގަމާ ދެމެދު ހަފްތާގެ ކޮންމެ ދުވަހަކު ވެސް ދަތުރުތައް ކުރުމަށް ހަމަޖެހިފައިވާ ކަމަށް މޯލްޑިވިއަން އިން މައުލޫމާތު ދެއެވެ.
"މިއީ ރާއްޖޭގެ ދެކުނުގެ ރަށްތަކުގައި ފަތުރުވެރިކަން ކުރިއެރުވުމަށް ކުރާ މަސައްކަތަށް އެއްބާރުލުމެއް ދިނުމަށް މޯލްޑިވިއަން އިން ފަށާ ދަތުރުތަކެއް، ބޭނުމަކީ ގައުމީ އެއާލައިންގެ ހައިސިއްޔަތުން ދެކުނުގައި ފަތުރުވެރިކަން ކުރިއެރުވުމަށް ކުރާ މަސައްކަތުގައި ގައުމީ ވާޖިބު އަދާ ކުރުން،" މޯލްޑިވިއަންގެ ޕަބްލިކް ރިލޭޝަންސް އެގްޒެކެޓިވް، މުޝިލް ސޮބާހު މި ނޫހަށް ވިދާޅުވި އެވެ.
ގާފު އަލިފު، ގާފު ދާލު އަދި އައްޑު އަތޮޅު ހިމެނޭހެން ދެކުނުގެ ތިން އަތޮޅުގައި ޖުމްލަ ބާރަ ރިސޯޓު ހިންގަމުންދެ އެވެ.
ފުލައި ޑުބާއީގެ ސީދާ ދަތުރުތައް އައްޑޫއަށް ފެށުމަށް އެ އެއާލައިނުން ނިންމީ އެ އަތޮޅުތަކުގައި ފަތުރުވެރިކަން ކުރިއަރައި، ފުޅާވަމުން އަންނަ އައުމާ ގުޅިގެންނެވެ.
އެގޮތުން، ފުލައި ޑުބާއީގެ 28 ފުލައިޓު ކޮންމެ ހަފްތާއަކު އައްޑު އަތޮޅު ގަމަށް ދަތުރު ކުރުމަށް އެ އެއާލައިނުން ވަނީ ނިންމާފަ އެވެ. އެ ދަތުރުތައް ވެސް ފެށުމަށް ހަމަޖެހިފައި ވަނީ މޯލްޑިވިއަންގެ ސަޕްލިމެންޓަރީ ފުލައިޓުތައް ފެށުމަށް ހަމަޖެހިފައިވާ ތާރީހު، އަންނަ ފެބްރުއަރީ ހަތަރު ވަނަ ދުވަހު އެވެ.
