ލަންޑަން (ޑިސެމްބަރު 28) - ޗެލްސީގެ ނަތީޖާތަށް ރަނގަޅު ކުރުމެކޭ އެއްވަރަށް އެ ކްލަބްގެ މެޖޯރިޓީ ސަޕޯޓަރުންގެ އިތުބާރު ހޯދުމަކީ ވެސް އޮތް ޗެލެންޖެއް ކަމަށް މި ފަހަރު ޗެލްސީގެ ކޯޗުކަމާ ހަވާލުވި އިނގިރޭސި ކޯޗު ގްރަހަމް ޕޮޓާ ބުނެފި އެވެ.
މިދިޔަ ސެޕްޓެމްބަރު މަހު، ޗެލްސީގެ ކޯޗުކަމުން ތޯމަސް ޓުޗެލް ވަކިކުރަަން އެ ކްލަބްގެ ބޯޑުން ނިންމީ އެ ކްލަބްގެ ވެރިޔާ ޓޮޑް ބޯލީގެ ތަސައްވުރާ އެއްގޮތަށް ކުރިއަށްދެވޭނެ ކޯޗެއް ގެނައުމަށެވެ. އެ ގޮތުން، ބޯލީ އިހުތިޔާރުކުރީ ބްރައިޓަންގެ ކޯޗަކަށް ހުރި ޕޮޓާ އެ ޓީމަށް ގެންނާށެވެ.
ފަސް އަހަރުގެ ކޮންޓްރެކްޓެއްގައި، ޕޮޓާ، ޗެލްސީ ކޯޗަކަށް ގެނައިއިރު، ބްރައިޓަންގައި އޭނާއާ އެކު މަސައްކަތްކުރި ކޯޗިން ޓީމު ވެސް ވަނީ ޗެލްސީ އަށް ބަދަލުވެފަ އެވެ.
ޕޮޓާ ހަވާލުވި ފަހުން، ޗެލްސީ އަށް އެއް ފެންވަރެއްގެ ކުޅުން ދައްކަން އުނދަގޫވިއިރު، ނަތީޖާތަކަށް އަސަރުކޮށްފައިވާތީ، އޭނާ ވަކިކުރަން ވެސް ސަޕޯޓަރުން ވަނީ ގޮވާލައިފަ އެވެ.
ފީފާ ވޯލްޑް ކަޕްގެ ބްރޭކަށް ފަހު، ޗެލްސީ ކުޅުނު ފުރަތަމަ މެޗުގައި ރޭ ވަނީ ބޯންމައުތު އަތުން 2-0 އިން މޮޅުވެފަ އެވެ. މިއީ ޗެލްސީ ލީގުގައި އެންމެ ފަހުން ކުޅުނު ހަ މެޗުގެ ތެރެއިން ހޯދި ފުރަތަމަ މޮޅެވެ. މި މެޗުގެ ކުރިން، ލީގުގައި އެންމެ ފަހުން، ޗެލްސީ ކުޅުނު ތިން މެޗުން ވެސް ވީ ބައްޔެވެ.
"އަހަންނަށް ވެސް އެނގޭ މި ކްލަބުން ހިފަހައްޓަމުން އައި ލެވަލަށް ބަލާއިރު ނަތީޖާތަށް ދަށްވީމަ، ނޫނީ ކުޅުން ދަށްވީމަ ސަޕޯޓަރުން މާޔޫސްވާނެކަން، އެ ވަރު އަހަންނަށް ވެސް ވިސްނޭ. އަހަންނަށް އެނގޭ، ތިބޭނެކަން ސަޕޯޓަރުން ވެސް ނޫސްވެރިން ވެސް، އަހަންނަކީ ޗެލްސީ އަށް އެކަށީގެންވާ ލެވަލްގެ ކޯޗެއް ނޫނޭ ބުނާ،" ކުރިން ސްވަންސީ ސިޓީ އާއި ބްރައިޓަންގައި ރަނގަޅު މަސައްކަތްތަކެއް ކުރި ޕޮޓާ ބުންޏެވެ.
"އެކަމު އަހަންނަކީ އެ ހުރިހާ ޗެލެންޖަކާ ކުރިމަތިލައިގެން ހުރި މީހެއް، ނަތީޖާ ނެރުމާ އެއްވަރަށް ސަޕޯޓަރުންގެ އިތުބާރު ވެސް ހޯދަންޖެހޭ. ޗެލްސީގައި ވެސް މި ހުރިހާ ޗެެލެންޖެއް އެބައޮތް،"
ޕޮޓާ ބުނީ ކޯޗިން ކެރިއަރުގައި އޭނާ ކުރި ފުރަތަމަ މަސައްކަތުގައި، ސްވިޑެންގެ އޮސްޓަސުންޑަށް ކޯޗުކޮށްދިންއިރު، އެ ޓީމާ އެކު ފުރަތަމަ 18 މަސް ދުވަހު ކުރި ކަންކަމަށް ބަލައިފިނަމަ ދިޔައީ ވަރަށް ދަށްކޮށް ކަމަށެވެ.
އެކަމަކު، އޮސްޓަސުންޑްގައި ހާލަތު ބަދަލުކޮށްލަން ނެގި މުއްދަތުގައި ކުރެވުނު މަސައްކަތުން ގިނަ ބަޔެއް އޭނާ އަށް ތައުރީފު ކުރިކަން ޕޮޓާ ވަނީ ފާހަގަކޮށްފަ އެވެ.
ޗެލްސީގައި މިހާރު ތިބި ވެރިންގެ ވެސް ރަނގަޅު ދުރު ވިސްނުމެއް އޮތްކަން ފާހަގަކޮށް ޕޮޓާ ބުނީ، ސަޕޯޓަރުން ގަޔާވާނެ ފުޓްބޯޅައެއް ކުޅެ، ނަތީޖާ ނެރޭ ޓީމެއްގެ ގޮތުގައި ޗެލްސީ ކުރިއަށްދާނެ ކަމުގެ ޔަގީންކަން އެބައޮތް ކަމަށެވެ.
ދެން އެންމެ އަވަހަށް ޗެލްސީ ކުޅޭ މެޗުގައި ނުކުންނާނީ ރަށުންބޭރުގައި ނޮޓިންހަމް ފޮރެސްޓާ ދެކޮޅަށެވެ. އެ މެޗުގައި ޗެލްސީގެ ފުލްބެކް، ރީސް ޖޭމްސް އަށް ކުޅެވުމާ މެދު އަދި އެއްޗެއް ނުބުނެވޭނެ ކަމަށް ޕޮޓާ ވަނީ ބުނެފަ އެވެ. ރޭ ބޯންމައުތާ ދެކޮޅަށް ކުޅުނު މެޗުގައި ކަކުލަށް އަނިޔާވެގެން ޖޭމްސް ވަނީ ބަދަލުކޮށްފަ އެވެ.
