ފުޓްބޯޅަ ލެޖެންޑު އަލީ ދާއީގެ އަންހެނުންނާއި އަންހެން ދަރިފުޅު އިރާނުން ފުރުން ހުއްޓުވުމަށް ބައިނަލްއަގްވާމީ ފްލައިޓެއްގެ މިސްރާބު ބަދަލުކުރި ކަމަށް އޭނާ ތުހުމަތުކޮށްފި އެވެ.
އުމުރުން 53 އަހަރުގެ ދާއީ ވަނީ އިރާނު ސަރުކާރާ ދެކޮޅަށް ކުރާ މުޒާހަރާތަކަށް ތާއީދުކޮށްފަ އެވެ. އޭނާ ބުނީ އަންހެނުންނާއި ދަރިފުޅު ހޯމަ ދުވަހު ތެހްރާނުން ޑުބާއީ ދާން އުޅުނު ކަމަށެވެ.
އެއީ މި ވަގުތު ޑުބާއީގައި ހުރި ދާއީއާ އެކު ޗުއްޓީ ހޭދަކުރުމަށް ކަމަށް ވެސް އޭނާ ބުންޏެވެ. އެހެން ނަމަވެސް، އެ ބޯޓު ވަނީ ގަލްފުގައި އޮންނަ އިރާނުގެ ރަށަކަށް ތިރިކޮށްފަ އެވެ.
ދާއީ ބުނީ އެ ރަށަށް ބޯޓު މަޑުކޮށް އޭނާގެ އަންހެނުންނާއި ދަރިފުޅު ފައިބަން އެންގި ކަމަށެވެ. ބޯޓުން ފައިބަން އެންގީ އެއްވެސް ސަބަބެއް ނުދައްކަ އެވެ.
އިރާނުގައި މުޒާހަރާތައް ފެށީ މިދިޔަ ސެޕްޓެމްބަރު މަހު ބުރުގާ ނާޅާ ހުރުމުން ހައްޔަރު ކުރި ޒުވާން އަންހެނަކު މަރުވި މައްސަލައިގަ އެވެ.
މިހާތަނަށް މުޒާހަރާތަކުން 500 އަށް ވުރެ ގިނަ މީހުން މަރުވެފައިވާ އިރު އޭގެ ތެރޭގައި 69 ކުޑަކުދިން ހިމެނެ އެވެ. އެތައް ހާސް ބަޔަކު ތިބީ ބަންދުކޮށްފަ އެވެ.
އިރާނުގެ ދައުލަތުގެ ނިއުސް އެޖެންސީ، އިރްނާއިން ބުނީ ގައުމުން ފުރުމުގެ ކުރިން އޮފިޝަލުންނަށް އަންގާނެ ކަމަށް ދާއީގެ އަންހެނުން މޮނާ ފާރޮހްހަޒާރީ މީގެ ކުރިން އެއްބަސްވި ކަމަށެވެ.
އެ ނިއުސް އެޖެންސީއިން ބުނީ ބޯޓު ޖެއްސީ ކިޝް އައިލެންޑަށް ކަމަށާއި ދާއީގެ އަންހެނުންނާއި އަންހެން ދަރިފުޅު ބޯޓުން ފޭބީ އެ ރަށަށް ކަމަށެވެ.
މީގެ ކުރިން އިރާނުގެ ކޯޓަކުން ވަނީ ދާއީގެ ގަހަނާ ވިއްކާ ފިހާރަ އާއި ރެސްޓޯރެންޓް ބަންދުކުރަން އަމުރުކޮށްފަ އެވެ.
ގިނަ މީހުން ހައްޔަރު ކުރުމުގެ އިތުރުން، މުޒާހަރާއަށް ތާއީދު ކުރާ ސެލެބްރިޓީންނާއި އާޓިސްޓުން އަދި މަގްބޫލް އެހެން ޝަހުސިއްޔަތުން އިރާނުން ފުރުމަށް ދަނީ ހުރަސް އަޅަމުންނެވެ.
ދާއީއަކީ އިރާނުގެ އެންމެ މަގްބޫލު އެއް ކުޅިވަރު ޝަހުސިއްޔަތެވެ. ބައިނަލްއަގްވާމީ ފުޓްބޯޅައިގައި ދާއީ ޖެހި 109 ގޯލް ވަރަށް ފަހަކާ ޖެހެންދެން އޮތީ ރެކޯޑެއްގެ ގޮތުގަ އެވެ. އެ ރެކޯޑް މުގުރާލީ ޕޯޗުގަލްގެ ކްރިސްޓިއާނޯ ރޮނާލްޑޯ އެވެ.
ދާއީއަކީ 1998 ވަނަ އަހަރުގެ ފީފާ ވޯލްޑް ކަޕްގައި އިރާނުން 1-2 އިން އެމެރިކާ ބަލިކުރި މެޗުގައި ކުޅުނު ކުޅުންތެރިއެކެވެ. އޭނާ ވަނީ ޖަރުމަނު ލީގުގައި ބަޔާން މިޔުނިކަށް ވެސް ކުޅެފަ އެވެ.
