އެމެރިކާ އާއި ކެނެޑާއަށް ކުރިމަތިވެފައިވާ ފިނީގެ ތޫފާނުގައި މިހާތަނަށް 38 މީހުން މަރުވެއްޖެ އެވެ.
އޮފިޝަލުން ބުނީ އެމެރިކާއިން 34 މީހުން މަރުވި ކަމަށެވެ. އެންމެ ބޮޑަށް އަސަަރު ކުރަމުން ދަނީ ނިއު ޔޯކް ސްޓޭޓުގެ ބަފަލޯ ސިޓީއަށެވެ.
ކެނެޑާގައި ހަތަރު މީހުން މަރުވި އެވެ. އެއީ ހުޅަނގު ބްރިޓިޝް ކޮލަމްބިއާ ޕްރޮވިންސްގެ މެރިޓް އަވަށުގައި ގަނޑުވެފައި އޮތް މަގަކުން ކައްސާލި ބަހެއް ފުރޮޅާލައި ހިނގި އެކްސިޑެންޓެއްގަ އެވެ.
މި އަހަރުގެ ފިނި މޫސުމުގައި ކުރިމަތިވި ތޫފާން އޮތީ ވަރަށް ބޮޑު ސަރަހައްދަކަށް ފެތުރިފަ އެވެ. އެގޮތުން ކެނެޑާއިން ފެށިގެން ގޮސް އެމެރިކާގެ ޓެކްސަސް ސްޓޭޓާ ހަމައަށް އަސަރުކުރަމުންދެ އެވެ.
މޫސުން ލަފާކުރާ ފަރާތްތަކުން ބުނީ ކުރިއަށް އޮތް ދުވަސްތަކުގައި ތޫފާނުގެ ބާރު ކުޑަ ވާނެ ކަމަށެވެ. އެހެން ނަމަވެސް، ޒަރޫރީ ހާލަތެއް މެދުވެރި ނުވާ ނަމަ ދަތުރު ނުކުރުމަށް ލަފާދެ އެވެ.
ތޫފާނުގެ ސަބަބުން އެތައް މިލިއަން ބަޔަކަށް ކަރަންޓު ކެނޑުނެވެ. އެކަމަކު މިހާރު ވަނީ ބޮޑު ހިސާބަކަށް އަލުން ހިދުމަތް ދޭން ފަށައިފަ އެވެ.
ކްރިސްމަސް އާއި އާ އަހަރުގެ ޗުއްޓީއަށް ގިނަ ބަޔަކު ދަތުރު ކުރަން ރާވާފައި ވަނިކޮށް، އެތައް ހާސް ފްލައިޓް ކެންސަލް ކުރި އެވެ.
