ސޯމާލިއާގެ އަލް ޝަބާބް ޓެރަރިސްޓުން ރަހީނުކުރި އިރާނުގެ 14 މަސްވެރިން އަހަރުތަކަކަށް ފަހު މިނިވަންކޮށްފި އެވެ.
އިރާނުގެ އިސްނާ ނިއުސް އެޖެންސީއިން ބުނީ އެ މީހުން މިނިވަން ކުރީ ސަރުކާރުގެ އޮފިޝަލުންނާއި ސޯމާލިއާގެ ގަބީލާތަކުގެ ވެރިންނާ ދެމެދު ދިގު މަޝްވަރާތަކަށް ފަހު ކަމަށެވެ.
އެ މީހުން އަނބުރާ އިރާނަށް ގެންދިޔައީ ހޮނިހިރު ދުވަހު އެވެ. އޭގެ ފަހުން އެ މީހުންގެ އަވަށް ޗަބަހާރްއަށް ގެންދިޔަ އެވެ.
އޭގެ ތެރެއިން ބައެއް މީހުން ރަހީނުކޮށްފައި ތިބޭތާ އަށް އަހަރު ވެއްޖެ އެވެ. އެ މީހުން ރަހީނުކުރީ ސޯމާލިއާ ކައިރިން ބައިނަލްއަގްވާމީ ކަނޑުގެ ސަރަހައްދުންނެވެ.
އެ މީހުން މިނިވަން ކުރި އިރު، ސޯމާލިއާގެ ފުލުހުން ދާދި ފަހުން ބުނީ ހަނގުރާމަވެރިން ކޮންޓްރޯލް ކުރާ ސަރަހައްދާ ކައިރިން އެހެން ގައުމުތަކުގެ 20 މީހުން ފެނިފައިވާ ކަމަަށެވެ. އެއީ އިރާނުގެ 14 މީހުންނާއި ޕާކިސްތާނުގެ ހަ މީހުންނެވެ.
އޭރު ފުލުހުން ބުނީ އޭގެ ތެރެއިން ބައެއް މީހުން ރަހީނުކުރީ 2014 ގައި ކަަމަށާއި ދެން ތިބި މީހުން ރަހީނު ކުރީ 2019 ގައި ކަމަށެވެ.
ފަހަކަށް އައިސް އަލް ޝަބާބްގެ ހަމަލާތައް ވަރުގަދަކޮށްފައިވެ އެވެ. އެގޮތުން ވެރިރަށް މޮގަދިޝޫގައި މިދިޔަ އޮކްޓޯބަރު މަހު ދެ ކާރު ބޮން ގޮއްވާލައި 120 މީހުން މަރާލި އެވެ.
