ބީނޯޒް އެރީޒް، އާޖެންޓީނާ (ޑިސެމްބަރު 24) - މި ފަހަރު ގަތަރުގައި ހޯސްޓްކުރި ފީފާ ވޯލްޑް ކަޕަށް ފަހު، އާޖެންޓީނާ ގައުމީ ފުޓްބޯޅަ ޓީމަށް ކުޅުން ހުއްޓާލަން އެންހެލް ޑި މާރިއާ ނިންމާފައި އޮތް ނިންމުން ފަސްކުރަން ނިންމާފައިވާ ކަމަށް ރިޕޯޓްތައް ބުނެފި އެވެ.
ޑި މާރިއާ، 34، އަކީ މި ފަހަރު ގަތަރުގައި އޮތް ވޯލްޑް ކަޕްގެ ޗެމްޕިއަންކަން އާޖެންޓީނާ އިން ހޯދިއިރު، ޓީމުގެ މުހިންމު ކުޅުންތެރިއެކެވެ. ފައިނަލުގައި ފްރާންސް ކޮޅަށް ޑި މާރިއާ ވަނީ މުހިންމު ގޯލެއް ވެސް ޖަހައިފަ އެވެ.
އާންމު ގޮތެއްގައި އާޖެންޓީނާ އަށް ފައިނަލުތަކުގައި ގޯލު ޖެހުމުގެ ރަަނގަޅު ރެކޯޑެއް ވެސް އޮތް ޑި މާރިއާ ކުރިން ނިންމާފައި އޮތީ މި ފަހަރުގެ ވޯލްޑް ކަޕަށް ފަހު ގައުމީ ޓީމުން ރިޓަޔާކުރުމަށެވެ.
އެކަމަކު، އާޖެންޓީނާގެ ކުޅިވަރު ނޫސްވެރިޔާ، ގެސްޓޮން އެޑުލް ރިޕޯޓްކުރާ ގޮތުގައި ޑި މާރިއާ، މިހާރު ނިންމާފައި އޮތީ ލިއޮނަލް މެސީ އެކޭ އެއްގޮތަށް ގައުމީ ޓީމަށް ކުޅުން ކުރިއަށް ގެންދިއުމަށެވެ.
ޑި މާރިއާ، ވޯލްޑް ކަޕްގެ ޓްރޮފީ އުފުލާލަނީ.
އާޖެންޓީނާގެ މީޑިއާ ރިޕޯޓްތައް ބުނާގޮތުން ޑި މާރިއާ އާއި މެސީ ގައުމީ ޓީމަށް ކުޅޭ ފަހު މުބާރާތަށް ވުމުގެ ފުރުސަތު ބޮޑީ 2024 ވަނަ އަހަރު އިކުއެޑޯގައި ބާއްވާ ކޮޕަ އެމެރިކާ ފުޓްބޯޅަ މުބާރާތުގަ އެވެ.
އާޖެންޓީނާގެ ކޯޗު ލިއޮނަލް ސްކަލޯނީއާ ހަވާލާދީ ބައެއް ނޫސްތަކުން ވަނީ ޑި މާރިއާ އާއި މެސީ، 2024 ވަނަ އަހަރުގެ ކޮޕަ އެމެރިކާ އިން ފެންނާނެ ކަމަށް ރިޕޯޓްކޮށްފަ އެވެ.
ދުނިޔޭގެ މަޝްހޫރު ކްލަބްތަކުގައި ވެސް ތަފާތު ދެއްކި، ޑި މާރިއާ، އާޖެންޓީނާ ގައުމީ ޓީމަށް އެންމެ ފުރަތަމަ މެޗެއް ކުޅުނީ 2008 ވަނަ އަހަރުގެ ސެޕްޓެމްބަރު މަހުގައި ވޯލްޑް ކަޕް ކޮލިފައިން މެޗެއްގައި ޕެރޫއާ ދެކޮޅަށެވެ. އޭގެ ފަހުން އޭނާ ވަނީ މިހާތަނަށް އާޖެންޓީނާ އަށް ކުޅެދިން 129 މެޗުގައި 28 ލަނޑު ޖަހައިފަ އެވެ.
ގައުމީ ޓީމާ އެކު ޑި މާރިއާ ހޯދި ކާމިޔާބީތަކަށް ބަލާއިރު، 2007 ވަނަ އަހަރު، ފީފާ 20 އަހަރުން ދަށުގެ ވޯލްޑް ކަޕަާއި 2008 ވަނަ އަހަރު އޮލިމްޕިކްސްގެ ފުޓްބޯޅަ އިވެންޓާއި، 2021 ވަނަ އަހަރު ކޮޕަ އެމެރިކާ ފުޓްބޯޅަ މުބާރާތާއި ޔޫރަޕާއި ދެކުނު އެމެރިކާގެ ޗެމްޕިއަނުން ކުޅުނު "ފައިނަލިސިމާ" ޓްރޮފީގެ އިތުރުން މި ފަހަރުގެ ވޯލްޑް ކަޕް އެވެ.
