އެމްޑީޕީގެ ރިޔާސީ ޕްރައިމަރީގައި ވާދަ ކުރެއްވުމަށް އެމްޑީޕީގެ ރައީސް މުހައްމަދު ނަޝީދު މިރޭ ފޯމް ހުށަހަޅުއްވައިފި އެވެ.
ނަޝީދަށް ތާއިދު ކުރައްވާ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ "2023 ވަނަ އަހަރުގެ ރިޔާސީ އިންތިޚާބުގެ އެމްޑީޕީގެ ޓިކެޓަށް ވާދަކުރެއްވުމަށް ކެންޑިޑޭޓްކަމުގެ ފޯމް ރައީސް މުހައްމަދު ނަޝީދު ހުށަހަޅުއްވައިފި،" ކަމަށެވެ.
ޖެނުއަރީ 28، 2023 ގައި ބާއްވާ އެމްޑީޕީގެ ރިޔާސީ ޕްރައިމަރީއަށް ވާދަކުރެއްވެނީ ކެންޑިޑެސީ ފޯމާއެކު 500 މެމްބަރުންގެ ތާއިދު އޮތްކަން ހުށަހަޅައިގެންނެވެ.
ނަޝީދު ކެންޑިޑެސީ ފޯމް ހުށަހެޅުއްވީ "ބަރާބަރު ފަސް ސަތޭކަ މީހުން"ގެ ތާއިދާއެކު ކަމަށް ހަސަން ލަތީފު ވިދާޅުވި އެވެ.
ޕްރައިމަރީގައި ވާދަކުރެއްވުމުގެ ފުރުސަތު ހޮނިހިރު ދުވަހުގެ ނިޔަލަށް ހަމަވާއިރު، ނަޝީދު ފިޔަވައި އެހެން ކެންޑިޑޭޓަކު ވާދަ ކުރައްވަން އަދި ހުށަހަޅުއްވާފައެއް ނެތެވެ.
ރިޔާސީ ޕްރައިމަރީގައި ނަޝީދު ވާދަކުރެއްވުމަށް މެމްބަރުންގެ ތާއީދު ހޯއްދެވުމަށް ފޯމް ފުރަމުން ދަނީ. -- ފޮޓޯ: މުހައްމަދު ޝާބިން/ އަދަދު
ޕްރައިމަރީގައި ރައީސް އިބްރާހިމް މުހައްމަދު ސޯލިހު ވާދަކުރައްވަން ނިންމަވާފައިވާއިރު، ތާއިދު ހޯދުމުގެ މަސައްކަތް އެ މަނިކުފާނުގެ ކެމްޕޭން ޓީމުން ގެންދަވަނީ ކުރަމުންނެވެ.
ނަޝީދު ޕްރައިމަރީގައި ވާދަ މިކުރައްވަނީ ޕާޓީ ތެރޭގައި ވަރަށް ބޮޑަށް ހިޔާލު ތަފާތުވެފައިވުން އުފެދިފައިވާ ދަނޑިވަޅެއްގަ އެވެ. ހިޔާލު ތަފާތުވުން އުފެދިފައި ވަނީ ރިޔާސީ ޕްރައިމަރީގެ ކުރިން ވާހަކަ ދައްކަން ޖެހޭނީ ދައުލަތް ހިންގުމުގެ ނިޒާމާ ގުޅޭ ގޮތުން ކަމަށް ބުނެ ބަރުލަމާނީ ނިޒާމަކަށް ބަދަލު ކުރެއްވުމަށް ރައީސް ނަޝީދު ފައިނެންގެވި ހިސާބުންނެވެ.
އެމްޑީޕީ އަކީ ރާއްޖޭގެ އެންމެ ގިނަ ދުވަސްވީ އެންމެ ބޮޑު ސިޔާސީ ޕާޓީ އެވެ. ރިޔާސީ ޕްރައިމަރީއަށް ހުޅުވާލުމާ ހަމައަށް އެޕާޓީގެ ދަފްތަރުގައި 58،000 މެމްބަރުން އެބަ ތިއްބެވެ.
ދެހާސް އަށާރައިގެ ރިޔާސީ އިންތިހާބަށް ކެންޑިޑޭޓަކު ހޮވުމަށް ބޭއްވި އެމްޑީޕީގެ ޕްރައިމަރީގައި ވާދަ ކުރެއްވީ ރައީސް ނަޝީދު އެކަންޏެވެ. އެހެން ނަަމަވެސް ރިޔާސީ އިންތިހާބާ ކުރިމަރިލާން ޖެހިވަޑައިގަތް އިރު އެ މަނިކުފާނަށް ކުރިމަތިލެއްވޭ ގޮތް ނުވުމުން، އެ ފުރުސަތު އެމަނިކުފާނުގެ އޭރުގެ އެންމެ އަރިސް ބޭފުޅާ، މިހާރުގެ ރައީސުލްޖުމްހޫރިއްޔާ، އިބްރާހިމް މުހައްމަދު ސޯލިހަށް ދެއްވި އެވެ. އެކަން ނިންމީ އެމްޑީޕީގެ ކޮންގްރެސްއިންނެވެ.
