އެމެރިކާގެ މުޅި އާބާދީ ނެތިކޮށްލާ އަދަދަށް 2022 ވަނަ އަހަރުގެ ތެރޭގައި ނުރައްކާތެރި ފެންޓަނިލް ޑްރަގު އަތުލައިގަނެފައިވާ ކަމަށް އެ ގައުމުގެ ފެޑެރަލް އޭޖެންޓުން ބުނެފި އެވެ.
ޑްރަގް އެންފޯސްމަންޓް އެޑްމިނިސްޓްރޭޝަން (ޑީއީއޭ) އިން ބުނީ މި އަހަރު 379 މިލިއަން ޑޯޒްގެ ފެންޓަނިލް ހިފެހެއްޓި ކަމަށެވެ.
ފެންޓަނިލްއަކީ ހެރޮއިންއަށް ވުރެ 50 ގުނަ އަވަހަށް ދެވިހިފާ އެއްޗެކެވެ. އެއީ މިހާރު އެމެރިކާއަށް ދިމާވެފައިވާ އޮތް އެންމެ ނުރައްކާތެރި މަސްތުވާތަކެތީގެ ބާވަތް ކަމަށް ޑީއީއޭއިން ސިފަކުރެ އެވެ.
އެ އެޖެންސީއިން ބުނީ ފެންޓަނިލް ގިނައިން އެމެރިކާއަށް އެތެރެ ކުރަނީ މެކްސިކޯއިން ކަމަށެވެ.
ޑީއީއޭއިން ބުނީ 4،500 ކިލޯގެ ފެންޓަނިލްގެ އިތުރުން ފެންޓަނިލް ހިމެނޭ 50.6 މިލިއަން ބޭސްގުޅަ މި އަހަރުގެ ތެރޭގައި ހޯދި ކަމަށެވެ. އެ ބޭސްގުޅަތަކަކީ ތަފާތު އެހެން ބާވަތްތަކުގެ ބޭސް ކަމަށް ހަދައިގެން ވަގަށް ގެންގުޅޭ ތަކެއްޗެވެ.
މި އަހަރު އަތުލައިގަތް ފެންޓަނިލްއަކީ 2021 ވަނަ އަހަރާ އަޅާ ބަލާއިރު ދެ ގުނަ އިތުރެވެ.
އެ އެޖެންސީއިން ބުނީ ފެންޓަނިލް ގިނައިން އުފައްދަނީ މެކްސިކޯގައި މަސްތުވާތަކެތީގެ ވިޔަފާރި ކުރާ ސިނައޮލާ އަދި ޖަލިސްކޯ ކާޓެލްއިން ހިންގާ ސިއްރު ފެކްޓްރީތަކުގައި ކަމަށެވެ. އެ ޑްރަގު އުފެއްދުމަށް ބޭނުންވާ ކެމިކަލް ހޯދަނީ ޗައިނާ އިންނެވެ.
ފެންޓަނިލްއަކީ ފުރާނައަށް ނުރައްކާ ހުރި އެއްޗެކެވެ. އޭގެ ކުޑަކުޑަ މިންވަރަކުން ވެސް އޯވާޑޯޒްވުމުގެ ފުރުސަތު އޮވެ އެވެ.
މިދިޔަ އަހަރުގެ އޯވާޑޯޒްވެގެން އެމެރިކާގައި 100،000 އަށް ވުރެ ގިނަ މީހުން މަރުވި އިރު، އޭގެ ތެރެއިން ތިންބައި ކޮށްފައި ދެބައި މީހުން މަރުވީ ފެންޓަނިލްގެ ސަބަބުންނެވެ.
ޑީއީއޭއިން ބުނީ މި އަހަރު އަތުލައިގަތް ފެންޓަނިލްއަކީ އެމެރިކާގެ މުޅި އާބާދީގައި ހިމެނޭ 330 މިލިއަން މީހުން މަރާލެވޭ އަދަދުގެ ތަކެތި ކަމަށެވެ.
"މި ވަގުތު ޑީއީއޭގެ އެންމެ ބޮޑު އިސްކަމަކީ އެމެރިކާގެ ރައްޔިތުން މަރަމުންދާ ފެންޓަނިލްއަށް ޒިންމާވާ މެކްސިކޯގެ ސިނައޯލާ އަދި ޖަލިސްކޯ ޑްރަގް ކާޓެލްތައް ބަލިކުރުން،" ޑީއީއޭގެ އެޑްމިނިސްޓްރޭޓަރު އޭން މިލްގްރަމް ވިދާޅުވި އެވެ.
ފެންޓަަނިލްގެ އިތުރުން މި އަހަރު ޑީއީއޭއިން 59،420 ކިލޯގެ މެތަމްފެޓަމައިން، 1950 ކިލޯގެ ހެރޮއިން އަދިި 201،395 ކިލޯގެ ކޮކެއިން އަތުލައިގަތެވެ.
