ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ގައުމީ މަޖިލީހުގެ ވަރަށް ގިނަ އަދަދެއްގެ މެމްބަރުންނާއި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ބައްދަލުވުމެއް ސޯލްޓް ރެސްޓޯރަންޓުގައި މިވަގުތު އެބަ ކުރިއަށްދެ އެވެ.
އެމްޑީޕީގެ ގައުމީ މަޖިލީހުގެ މެމްބަރުންނާ ރައީސް ބައްދަލު ކުރައްވަމުން ގެންދަވާއިރު، މަގްސަދަކީ ޖެނުއަރީ 28، ގައި ބާއްވާ އެމްޑީޕީގެ ޕްރައިމަރީގެ ކެމްޕެއިން ގެންދާނެ ގޮތާމެދު މަޝްވަރާ ކުރުން ކަމަށް މި ނޫހަށް ވަނީ އެނގިފަ އެވެ.
ރައީސް ސޯލިހާއި އެމަނިކުފާނާއެކު ރިޔާސީ ޕްރައިމަރީގައި ވާދަ ކުރައްވާނެ އެ ޕާޓީގެ ރައީސް މުހައްމަދު ނަޝީދު ވެސް ހިމެނިވަޑައިގަންނަވާ ގޮތަށް އެމްޑީޕީގެ ގައުމީ މަޖިލީހުގައި ޖުމްލަަ 167 މެމްބަރުން ތިބޭއިރު އޭގެ ތެރެެއިން 100 އަށް ވުރެ ގިނަ މެމްބަރުން ސޯލްޓުގެ ބައްދަލުވުމުގައި އެބަ ބައިވެރިވެ އެވެ.
ރައީސްގެ ބައްދަލުވުމުގައި ބައިވެރިވާ ބައެއް މެމްބަރުން: ރައީސްގެ ކެމްޕެއިން ހަރަކާތްތަކާމެދު ދަނީ މަޝްވަރާ ކުރަމުން -- ފޮޓޯ: ކިޔުންތެރިއެއް
ރައީސް ސޯލިހުގެ އާއިލީ މަސްލަހަތު އޮންނަ ސޯލްޓުގައި ހިނގާ އެ ބައްދަލުވުމުގައި ވަޒީރުންގެ މަޖިލީހާއި ރައްޔިތުންގެ މަޖިލީހުގެ ބައެއް މެމްބަރުންނާއި ދާއިރާތަކުގެ ރައީސުން އެބަ ތިއްބެވި އެވެ. ޕްރައިމަރީގައި ވާދަ ކުރުމަށް މަދުވެގެން ހަމަކުރަންޖެހޭ 500 ސޮޔާއި ރައީސް ސޯލިހުގެ ކެންޑިޑެސީ ފޯމު ހުށަހަޅުއްވާނެ ތާރީހަކާމެދު ވެސް އެ ބައްދަލުވުމުގައި ވާހަކަ ދެއްކުމަށް ހަމަޖެހިފައިވާ ކަމަށްވެ އެވެ.
އެމްޑީޕީގެ ޕްރައިމަރީ އިިއްޔެ އިއުލާނުކޮށްފައިވާއިރު ޕާޓީގެ މެމްބަރުންގެ ދަފްތަރުގައި މައްސަލަތަކެއް އުޅޭ ކަމަށް ނަޝީދު ވަނީ ތުހުމަތު ކުރައްވައިފަ އެވެ. އަދި ޕާޓީގެ ދަފްތަރުގައި މައްސަލަތަކެއް އުޅެނިކޮށް ބާއްވާ އިންތިހާބެއް އިންސާފުވެރި ނުވާނެ ކަމަށް ވެސް އެމަނިކުފާނު ވިދާޅުވެފައިވެ އެވެ.
އެކަމަކު އެމްޑީޕީން މިއަދު ބުނީ ޕާޓީގެ ދަފްތަރު ސައްހަ ކަމަށާއި އޮޅުންބޮޅުންގަނޑެއްގައި އޮއްވާ ދަފްތަރު ރަނގަޅު ކުރީ އިންތިހާބުގެ ސައްހަކަން ކަށަވަރު ކުރަން ކަމަށެވެ.
އެމްޑީޕީގައި މިވަގުތު 58،000 އަށް މެމްބަރުން ތިބިއިރު އެއީ ދިވެހިރާއްޖޭގައި ހިންގާ އެންމެ ބޮޑު ސިޔާސީ ޕާޓީ އެވެ. އަދި އެއީ ރާއްޖޭގައި އެންމެ ފުރަތަމަ ރަޖިސްޓްރީ ކުރި ސިޔާސީ ޕާޓީ އެވެ.
