ޓްވިޓާގެ ޗީފް އެގްޒެކްޓިވްކަމުން ބިލިއަނަރު އެލޮން މަސްކް އިސްތިއުފާ ދޭން ފެންނަ ކަމަށް ޓްވިޓާ ބޭނުންކުރާ މީހުންގެ މެދުގައި ނެގި ވޯޓަކުން ދައްކައިފި އެވެ.
ސީއީއޯގެ މަގާމުން އިސްތިއުފާ ދޭން ފެނޭތޯ ސުވާލުކޮށް، ޓްވިޓާގައި ވޯޓަށް ހުޅުވާލީ މަސްކް އެވެ. އޭނާ ބުނީ އެ ވޯޓުގެ ނަތީޖާއަށް އިހްތިރާމް ކުރާނެ ކަމަށެވެ.
ވޯޓުލުމުގެ ސުންގަޑި ހަމަވި އިރު، 57.5 ޕަސެންޓް މީހުން ބުނީ މަސްކް ސީއީއޯކަމުން ވަކިވާން ފެންނަ ކަމަށެވެ. ޓްވިޓާގައި 122 މިލިއަން މީހުން އޭނާ ފޮލޯކުރެ އެވެ.
މަސްކް ޓްވިޓާ ގަތީ 44 ބިލިއަން ޑޮލަރަށެވެ. ޓެސްލާ އާއި ސްޕޭސް އެކްސް ވެސް ހިންގާ މަސްކް ޓްވިޓާއަށް ގެންނަމުންދާ ބަދަލުތަކާ ގުޅިގެން ފާޑުކިޔުން އަމާޒުވެފައިވެ އެވެ.
ސީއީއޯގެ މަގާމުން އިސްތިއުފާ ދޭން ފެނޭތޯ ސުވާލުކޮށް ހުޅުވާލި ވޯޓުގެ ނަތީޖާއާ ގުޅޭ ގޮތުން މަސްކް އަދި ވަކި އެއްޗެއް ނުބުނެ އެވެ. ސީއީއޯކަމުން އިސްތިއުފާ ދިން ނަމަވެސް، ކުންފުނީގެ ވެރިޔާގެ މަގާމުގައި ހުންނާނީ އޭނާ އެވެ.
ހޯމަ ދުވަހު ހުޅުވާލި ވޯޓުގައި 17.5 މިލިއަން މީހުން ބައިވެރިވި އިރު، 42.5 ޕަަސެންޓް މީހުން ބުނީ މަސްކް ސީއީއޯކަމުގައި ހުންނަން ފެންނަ ކަމަށެވެ.
މީގެ ކުރިން ވެސް މަސްކް ވަނީ ޓްވިޓާގައި ތަފާތު އެކި ކަންކަމުގައި ވޯޓަށް ހުޅުވާލައިފަ އެވެ. ކޮންމެ ފަހަރަކު ވެސް އެ ވޯޓެއްގެ ނަތީޖާއާ އެއްގޮތަށް އަމަލުކުރެ އެވެ.
