ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ރިޔާސީ ޕްރައިމަރީ އަންނަ ޖެނުއަރީ 28، ގައި ބޭއްވުމަށް އެ ޕާޓީން މިއަދު އިއުލާނުކޮށްފި އެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ޕާޓީގެ ރައީސް މުހައްމަދު ނަޝީދު ވާދަ ކުރައްވާނެ ކަމަށް ބެލެވޭ އެ ޕްރައިމަރީއަށް ވާދަ ކުރުމަށް ފޯމު ހުށަހެޅޭނީ އަންނަ ހޮނިހިރު ދުވަހުގެ ނިޔަލަށެވެ. ފޯމާއެކު 500 މެމްބަރުންގެ ސޮއި ވެސް ތާއީދުގެ ގޮތުގައި ހުށަހަޅަންޖެހެ އެވެ.
އިންތިހާބުގެ ޓައިމްލައިން
- ޑިސެމްބަރު 18 – ރިޔާސީ ޕްރައިމަރީ އިއުލާން ކުރުން
- ޑިސެމްބަރު 18 – ރިޔާސީ ޕްރައިމަރީ ކުރިމަތިލުމަށް ފުރުސަތު ހުޅުވާލުން
- ޑިސެމްބަރު 24 – ކެންޑިޑޭޓުން ވާދަ ކުރުމުގެ ފޯމް ބަލައިގަތުމުގެ މުއްދަތު ހަމަވުން (16:00 އަށް)
- ޑިސެމްބަރު 26 – ކެންޑިޑޭޓުންގެ ފައިނަލް ލިސްޓު، ކެންޑިޑޭޓް ނަންބަރާއެކު އިއުލާން ކުރުން
- ޑިސެމްބަރު 28– ރިޔާސީ ޕްރައިމަރީ ވޯޓާޒް ލިސްޓް އާންމު ކުރުމާއި ލިސްޓަށް ޝަކުވާ ހުށަހެޅުމަށް ހުޅުވާލުން
- ޑިސެމްބަރު 31 – ވޯޓާޒް ލިސްޓަށް ހުށަހަޅާ ޝަކުވާ ބަލައިގަތުމުގެ މުއްދަތު ހަމަވުން (16:00 އަށް)
- ޖެނުއަރީ 3 – ރިޔާސީ ޕްރައިމަރީ ފައިނަލް ވޯޓާޒް ލިސްޓް އާންމު ކުރުން
- ޖެނުއަރީ 10 - ކެންޑިޑޭޓް މަންދޫބުންނަށް ފުރުސަތު ހުޅުވާލުން
- ޖެނުއަރީ 15 – ކެންޑިޑޭޓް މަންދޫބުންނަށް ފުރުސަތު ބަންދުވުން
- ޖެނުއަރީ 28 – ރިޔާސީ ޕްރައިމަރީ ވޯޓުލާ ދުވަސް
އެމްޑީޕީގައި މިވަގުތު 58،000 އަށް މެމްބަރުން ތިބިއިރު އެއީ ދިވެހިރާއްޖޭގައި ހިންގާ އެންމެ ބޮޑު ސިޔާސީ ޕާޓީ އެވެ. އަދި އެއީ ރާއްޖޭގައި އެންމެ ފުރަތަމަ ރަޖިސްޓްރީ ކުރި ސިޔާސީ ޕާޓީ އެވެ.
އެމްޑީޕީގެ ޕްރައިމަރީގައި ވާދަ ކުރައްވާނެ ކަމަށް ރައީސް ސޯލިހު އިއުލާނު ކުރެއްވީ ޖޫން 8، ގަ އެވެ. އޭގެ ފަހުން ނަޝީދު ވެސް އިންތިހާބުގައި ވާދަ ކުރައްވާނެކަމުގެ އެކި އިޝާރާތް ވަނީ ދެއްވައިފަ އެވެ. އެގޮތުން އެމަނިކުފާނު އެމްޑީޕީގެ ރިޔާސީ ޕްރައިމަރީގައި ވާދަ ކުރައްވާނެ ކަމަށް ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވެސް ވިދާޅުވި އެވެ.
ނަމަވެސް ފަހުން ނަޝީދު ވިދާޅުވެފައި ވަނީ ޕްރައިމަރީއެއްގެ ކުރިން ވާހަކަ ދައްކަންޖެހޭނީ ދައުލަތް ހިންގުމުގެ ނިޒާމު ބަދަލު ކުރުމަށް ކަމަށެވެ. އަންނަ އަަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ކުރިން ބަރުލަމާނީ ނިޒާމަކަށް ގައުމު ބަދަލު ކުރުމަށް ވެސް ނަޝީދު ހުށަހެޅުއްވި އެވެ.
