އިޒްރޭލާ ދެކޮޅަށް ހަތިޔާރު ނެގުމާ ދެކޮޅު ނަމަވެސް، އެއީ ކޮންމެ ވަގުތަކު ވެސް ބަދަލުވެދާނެ ވިސްނުމެއް ކަމަށް ފަލަސްތީނުގެ ރައީސް މަހްމޫދް އައްބާސް ވިދާޅުވެއްޖެ އެވެ.
"ކޮންމެ ވަގުތަކު ވެސް ވިސްނުން ބަދަލުވެދާނެ. މާދަމާ ނުވަތަ ޖެހިގެން އޮންނަ ދުވަހު، ކޮންމެ ވަގުތަކު ވެސް ބަދަލުވެދާނެ. ހުރިހާ ކަމެއް ބަދަލުވެދާނެ،" އަލް އަރަބިއްޔާ ނޫހަށް ދެއްވި ހާއްސަ އިންޓަވިއުއެއްގައި އައްބާސް ވިދާޅުވި އެވެ.
"ސުލްހަވެރިކަމާ އެކު އަޑު އުފުލުމަކީ ނަތީޖާ ނެރެވޭނެ ގޮތެއް. އެކަމަކު [އިޒްރޭލުން] ބާރަށް ކޮއްޕަން ފަށައިފި ނަމަ ރައްޔިތުން މަޑަކުން ނުތިބޭނެ... ފަލަސްތީނުގެ ރައްޔިތުންގެ ކެތްތެރިކަން ކޮޅުންލާ ހިސާބަށް ކަންކަން ނުގެންދިޔުމަށް އަޅުގަނޑު މި ދަނީ އިންޒާރުދެމުން."
ހުޅަނގު އައްސޭރީގައި ޕަލެސްތީނިއަން އޮތޯރިޓީ (ޕީއޭ) ގެ ނަމުގައި ގާއިމްކޮށްފައި އޮތް ވެރިކަން އުވާލާނެތޯ ސުވާލު ކުރުމުން އައްބާސް ވިދާޅުވީ އެއީ ބުރަ މަސައްކަތުން ހާސިލް ކުރި ކަމެއް ކަމަށާއި އުވާނުލާނެ ކަމަށެވެ.
"އެ ވެރިކަން ގާއިމްކުރީ ގިނަ ބަޔަކު ޝަހީދުވެގެން. ޕަލެސްތީނިއަން އޮތޯރިޓީ ދެމިއޮންނާނެ. ފަލަސްތީނުގެ ދައުލަތް ވެސް ދެމިއޮންނާނެ. އަޅުގަނޑުމެންގެ ވެރިކަން އުވާލަން އެއްވެސް ބަޔަކަށް ބާރެއް ނުހިންގޭނެ. އިޒްރޭލުން ފިޔަވަޅުތަކެއް އެޅުމަކީ އެކަށީގެންވާ ކަމެއް. އެކަމަކު ހިތްވަރާ އެކު އަޅުގަނޑުމެން އަބަދުވެސް ދެމިއޮންނާނެ."
