އިޒްރޭލާއި ފަލަސްތީނުގެ މައްސަލައަށް ހައްލު ގެނެވޭނީ އިޒްރޭލާއި ސައުދީ އަރަބިއްޔާ ސުލްހަވުމުން ކަމަށް އިޒްރޭލުގެ އިންތިހާބީ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ.
އަލް އަރަބިއްޔާ ނޫހަށް ދެއްވި ހާއްސަ އިންޓަވިއުގައި ނަތަންޔާހޫ ވިދާޅުވީ 2020 ވަނަ އަހަރުގެ އަބްރަހަމް އެކޯޑްސްގެ ދަށުން ހޯދި ކުރިއެރުން ފުޅާވެއްޖެ ނަމަ ސުލްހައަށް މަގުފަހިވާނެ ކަމަށެވެ.
އަބްރަހަމް އެކޯޑްސްއަކީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް މެދުވެރިވެގެން އިޒްރޭލާއި މުސްލިމް ގައުމުތަކާ ދެމެދު ޑިޕްލޮމެޓިކް ގުޅުން ގާއިމްކުރުމަށް ހެދި އެއްބަސްވުމެކެވެ.
ނަތަންޔާހޫ ވިދާޅުވީ އިޒްރޭލަކީ ދައުލަތެއްގެ ގޮތުގައި ގަބޫލުކުރަން ފަލަސްތީނުގެ ވެރިން ބޭނުން ނުވާ ކަމަށާއި އޭގެ ސަބަބުން ފަލަސްތީނުގެ ވެރިންނާ އެކު މަޝްވަރާއަށް ހުރަސް އެޅޭ ކަމަށެވެ.
"އަޅުގަނޑު ދެކޭ ގޮތުގައި ސައުދީ އަރަބިއްޔާއާ އެކު ސުލްހަވެވިއްޖެ ނަމަ ދެ ކަމެއް ހާސިލްވާނެ. އެކަން ވާނީ އިޒްރޭލާއި އަރަބި ދުނިޔޭގެ ސުލްހަ ކުރިއެރުވުމަށް އެޅޭ ބޮޑު ފިޔަވަޅަކަށް. ހިތަށް ނުގެނެވޭހާ ބޮޑެތި ބަދަލުތައް މި ސަރަހައްދަށް ގެނެވޭނެ. އަދި އަޅުގަނޑު ދެކޭ ގޮތުގައި އޭގެ ސަބަބުން ފަލަސްތީނާއި އިޒްރޭލުގެ ސުލްހައަށް މަގުފަހިވާނެ. އެއީ އަޅުގަނޑު ގަބޫލުކުރާ ގޮތް އަދި އެކަން ކުރަން މަސައްކަތް ކުރާނަން،" ނަތަންޔާހޫ ވިދާޅުވި އެވެ.
ތާރީހީ ގޮތުން ފަލަސްތީނުގެ އެންމެ ބޮޑު އެއް ބައިވެރިއަކީ ސައުދީ އަރަބިއްޔާ އެވެ. ސައުދީ އަރަބިއްޔާއިން ތަކުރާރުކޮށް ބުނެފައި ވަނީ އިޒްރޭލާ އެކު ގުޅުން ގާއިމް ކުރެވޭނީ ފަލަސްތީނުގެ ދައުލަތެއް ގާއިމްކުރުމުން ކަމަށެވެ.
އަބްރަހަމް އެކޯޑްސްގެ ދަށުން ޔޫއޭއީ އާއި ބަހްރެއިނުން ވަނީ އިޒްރޭލާ އެކު ގުޅުން ގާއިމްކޮށްފަ އެވެ. އެކަމާ ބެހޭ ގޮތުން ސައުދީ އަރަބިއްޔާއިން ވަކި އެއްޗެއް ނުބުނި ނަމަވެސް، ފަހަކަށް އައިސް ސައުދީ އަރަބިއްޔާ އާއި އިޒްރޭލުގެ ގުޅުން ގާތްވަމުންދާ ކަމަށް ފާހަގަކުރެވެ އެވެ.
ދެހާސް ދެ ވަނަ އަހަރު ސައުދީ އަރަބިއްޔާއިން ހުށަހެޅި އަރަބް ޕީސް އިނީޝިއޭޓިވްގެ ދަށުން އިޒްރޭލަށް ގޮވާލީ ޔަހޫދީން ހިފައިގެން އުޅޭ އަރަބިންގެ ހުރިހާ ބިންތަކެއް އަނބުރާ ހަވާލުކޮށް، ސުލްހައަށް މަގުފަހި ކުރުމަށެވެ.
އެ ހުށަހެޅުމާ ގުޅޭ ގޮތުން ސުވާލު ކުރުމުން ނަތަންޔާހޫ ވަކި އެއްޗެއް ވިދާޅެއް ނުވެ އެވެ. އޭނާ ވިދާޅުވީ އެ ހުށަހެޅުމުން ފެންނަނީ ސުލްހަ ބޭނުންވެފައި ތިބި މިންވަރު ކަމަށާއި މިހާރު މިއީ އޭގެ 20 އަހަރު ފަސް ކަމަށް ވާތީ ސުލްހައަަށް އެދި ހުށަހަޅަން ވާނީ "ތާޒާ ހުށަހެޅުމެއް" ކަމަށެވެ.
