އައްޑޫ ސިޓީ އަދި ފުވައްމުލަކު ސިޓީގެ ހާލަތު ބެއްލެވުމަށް ނައިބު ރައީސް ފައިސަލް ނަސީމް ފުވައްމުލަކާއި އައްޑޫއަށް ކުރައްވާ ރަސްމީ ދަތުރުފުޅު ފައްޓަވައިފިއެވެ.
މިދަތުރުފުޅުގައި އައްޑޫ ސިޓީގައި މީހުން ދިރިއުޅޭ ހުރިހާ ރަށަކަށް މިއަދު ޒިޔާރަތްކުރައްވާނެކަމަށް ރައީސް އޮފީހުން ބުންޏެވެ.
މިގޮތުން، އައްޑޫ ސިޓީގައި ހިނގަމުންދާ ތަރައްގީގެ މަޝްރޫއުތައް ކުރިޔަށްދާގޮތް ބައްލަވާލައްވައި، ސަރުކާރުގެ މުއައްސަސާތަކަށް ޒިޔާރަތް ކުރައްވުމާއި އަދި ހުޅުމީދޫ ހެލްތު ސެންޓަރުގައި އަލަށް ފަށާ ހިދުމަތްތައްވެސް މި ދަތުރުފުޅުގެ ތެރެއިން އިފްތިތާހުކުރައްވާނެ އެވެ.
ނައިބު ރައީސްގެ މިދަތުރުފުޅުގައި، ފުވައްމުލައް ސިޓީއަށް ވަޑައިގެން، އެސިޓީގައި ހިންގޭ އުމުރާނީ ތަރައްގީގެ މަޝްރޫއުތައް ބައްލަވާލައްވައި ސަރުކާރުގެ މުއައްސަސާތަކަށް ޒިޔާރަތްކުރެއްވުމަށް ހަމަޖެހިފައިވާ ކަމަށް ރައީސް އޮފީހުން ހާމަކޮށްފައި ވެއެވެ.
ފުވައްމުލަކު ހޮސްޕިޓަލުގެ އާ އިމާރާތް ހުޅުއްވައި ދެއްވުމުގެ އިތުރުން، ޏ. އަތޮޅު ތައުލީމީ މަރުކަޒުގެ އަހަރީ ދުވަހާ ގުޅިގެން ބާއްވާ ޖަލްސާ ނައިބު ރައީސް ޝަރަފްވެރިކޮށްދެއްވާނެ އެވެ.
ފައިސަލް އައްޑޫ ސިޓީއާ ފުވައްމުލައް ސިޓީއަށް ކުރައްވާ ރަސްމީ ދަތުރުފުޅު ނިންމަވާލެއްވުމަށްފަހު މާލެ ވަޑައިގަންނަވާނީ އަންނަ ހޯމަ ދުވަހު އެވެ.
