އދ.، އެމެރިކާ (ޑިސެމްބަރު 14) - އިރާނުގެ އަންހެނުން އިސްނަގައިގެން ފެށި މުޒާހަރާ ހުއްޓުވުމަށް އަމަލު ކުރަމުންދާ އަނިޔާވެރި ގޮތާ މެދު ހިތްހަމަނުޖެހިގެން، އަންހެނުންނާ ގުޅޭ އދ. ގެ ކޮމިޝަނުން އިރާން ވަކިކުރަން ނިންމައިފި އެވެ.
އެގޮތަށް ނިންމީ އެމެރިކާއިން ފެށި ކެމްޕެއިނެއްގައި އދ. ގެ އިކޮނޮމިކް އެންޑް ސޯޝަލް ކައުންސިލްގެ 29 މެމްބަރުންގެ ވޯޓުންނެވެ. އެގޮތުން އދ. ގެ ކޮމިޝަން އޮން ދަ ސްޓޭޓަސް އޮފް ވިމެން (ޔޫއެންސީއެސްޑަބްލިއު) އިން އިރާން ވަކިކުރަން ނިންމި އެވެ.
ވޯޓުގައި ބައިވެރިވި އަށް ގައުމުން ވޯޓު ދިނީ އެ ކޮމިޝަަނުގައި އިރާނު ބޭއްވުމަށެވެ. ސޯޅަ ގައުމަކުން ވަކި ކޮޅަކަށް ނުޖެހެ އެވެ.
އެ ކޮމިޝަނަކީ ދުނިޔޭގައި އަންހެނުން ބާރުވެރިކޮށް، ދެ ޖިންސުގެ ހަމަހަމަކަން ގެނައުމަށް މަސައްކަތް ކުރާ އެންމެ ބޮޑު ކޮމިޝަނެވެ. އެ ކޮމިޝަނުން އިރާނު ވަަކިކުރުމަށް ކެމްޕެއިން ފެއްޓެވީ އެމެރިކާގެ ނައިބު ރައީސް ކަމަލާ ހެރިސް އެވެ.
އެ ވޯޓާ ދެކޮޅަށް އަޑުއުފުލި ރަޝިއާ އާއި ޗައިނާއިން ބުނީ އިރާނަކީ އދ. ގައި ނެގި ވޯޓަކުން އެ ކޮމިޝަންގެ މެމްބަރުކަން ހޯދި ގައުމެއް ކަމަށާއި އިރާން ވަކިކުރަން ނިންމުމުން ގާއިމްކުރެވެނީ ގޯސް އުސޫލެއް ކަމަށެވެ.
ޔޫއެންސީއެސްޑަބްލިއު އަށް މެމްބަރު ގައުމުތައް ހޮވަނީ އދ. ގެ އިކޮނޮމިކް އެންޑް ސޯޝަލް ކައުންސިލުންނެވެ. އޭގެ ފަހުން އދ. ގެ އާއްމު މަޖިލީހުގައި އެ ގައުމުތަކަށް ރުހުން އޮތްތޯ ބަލަން ޖެހެ އެވެ.
ސެޕްޓެމްބަރު މަހުން ފެށިގެން އިރާނުގައި ހަމަނުޖެހުން ބޮޑުވީ ބުރުގާ ނާޅާ ހުރުމުން ހައްޔަރު ކުރި ޒުވާން އަންހެނަކު މަރުވި މައްސަލައިގަ އެވެ. އިރާނުގައި އަންހެނުން ބުރުގާ އެޅުމަކީ މަޖުބޫރު ކަމެކެވެ. އެހެން ނަމަވެސް، ބުރުގާ އެޅުން މަޖުބޫރުވާ ގާނޫނު މުރާޖައާ ކުރުމުގެ މަސައްކަތް މިހާރު ދަނީ ކުރަމުންނެވެ.
