ގާޒާ، ފަލަސްތީން (ޑިސެމްބަރު 14) - އިޒްރޭލާ އެކު ގައިދީން ބަދަލު ކުރުމުގެ މަޝްވަރާއިން އަވަސް ކުރިއެރުން ނުލިބޭ ނަމަ، މަޝްވަރާ ހުއްޓާލާނެ ކަމަށް ގާޒާގައި ވެރިކަން ކުރާ ހަމާސްއިން ބުނެފި އެވެ.
"އިޒްރޭލުން މަޝްވަރާ ދިގުދަންމަން އުޅޭތީ، އަޅުގަނޑުމެން މި އިއުލާނު ކުރަނީ ވަކި މުއްދަތެއްގެ ތެރޭގައި އެ މީހުން ގޮތެއް ނިންމަން ޖެހޭނެ ކަމަށް،" ހަމާސްގެ ވެރިޔާ ޔަހްޔާ ސިންވާރް ވިދާޅުވި އެވެ.
"އެހެން ނޫން ނަމަ، ދުޝްމަނުންގެ ފަޅިއަށް ނިސްބަތްވާ ހަތަރު ގައިދީންގެ ކޭސް މުޅި އުމުރަށް ބަންދު ކުރެވޭނެ،" ހަމާސް އުފެދުނުތާ 35 އަހަރު ފުރުން ފާހަގަކުރުމުގެ ގޮތުން އެއްވުމެއްގައި އޭނާ ވިދާޅުވި އެވެ.
އިޒްރޭލުން 2014 ވަނަ އަހަރު ގާޒާއަށް އެރި ފަހުން، އިޒްރޭލުގެ ދެ ސިފައިންގެ މީހެއްގެ ހަށިގަނޑު އޮތީ ހަމާސްގެ އަތްދަށުގަ އެވެ. އެއީ އޯރޯން ޝޯލް އަދި ހާދަރް ގޯލްޑިން އެވެ.
އެހެން ނަމަވެސް އެ ދެ މީހުން މަރުވިކަން ހަމާސްއިން ދުވަހަކު ވެސް ކަށަވަރުކޮށްދީފައެއް ނުވެ އެވެ. މި އަހަރުގެ ކުރީކޮޅު ހަމާސްއިން އާއްމުކުރި ވީޑިއޯއެއްގައި ފެނުނީ ގާޒާގައި ހަތް އަހަރު ވަންދެން ބަންދުކޮށްފައި ހުރި އިޒްރޭލުގެ އާއްމު ރައްޔިތެކެވެ.
އޭގެ އިތުރުން ވެސް 2014 ވަނަ އަހަރުން ފެށިގެން، އިޒްރޭލުގެ އިތުރު މީހަކު ހަމާސްއިން ބަންދުކޮށްފައިވާ ކަމަށް ބެލެވެ އެވެ.
އިޒްރޭލާއި ހަމާސްއިން ރަސްމީކޮށް އެއްވެސް މަޝްވަރާއެއް ނުކުރެ އެވެ. މަޝްވަރާތައް ކުރަނީ މިސްރު އަދި އދ. މެދުވެރިވެގެންނެވެ.
ސިންވާރް ވިދާޅުވީ ގައިދީން ބަދަލުކުރުމާ ގުޅޭ ނުސީދާ މަޝްވަރާއަށް ހުރަސް އެޅުނީ އިޒްރޭލުގެ އިންތިހާބާ ހެދި ކަމަށެވެ. އިންތިހާބުން ކުރި ހޯދީ ކުރިން ވެސް ބޮޑު ވަޒީރުކަަން ކުރެއްވި ބެންޖަމިން ނަތަންޔާހޫ އެވެ.
މީގެ ކުރިން 2011 ގައި ނަތަންޔާހޫ ބޮޑު ވަޒީރުކަމަށް ހުންނެވި އިރު ފަލަސްތީނުގެ 1000 ގައިދީން މިނިވަން ކުރި އެވެ. ބަދަލުގައި ހަމާސްއިން މިނިވަން ކުރީ ފަސް އަހަރު ވަންދެން ބަންދުކޮށްފައި ހުރި ސިފައިންގެ މީހެކެވެ.
ހަމާސްއިން ގާޒާ ކޮންޓްރޯލް ކުރީ 2007 ގަ އެވެ. އޭރުން ފެށިގެން އިޒްރޭލުން ވަނީ ގާޒާ ވަށައިގެން ބަންދުކޮށްފަ އެވެ. އޭގެ ފަހުން އިޒްރޭލާއި ހަމާސްއާ ދެމެދު ހަތަރު ހަނގުރާމަ ކޮށްފި އެވެ.
