ތަރައްގީވަމުން އަންނަ ކުދިޖަޒީރާ ގައުމުތަކަކީ، ދިރުންތައް ނެތިދިޔުމާއި، ވައިފެން ތަޣައްޔަރުވުމާއި، މޫސުމީ ބަދަލުތަކުގެ ސަބަބުން އެންމެ ބޮޑަށް ނުރައްކަލަށް ހުށައެޅިފައިވާ ގައުމުތައް ކަމަށް ނައިބް ރައީސް ފައިސަލް ނަސީމް ވިދާޅުވެއްޖެ އެވެ.
ފައިސަލް މިހެން ވިދާޅުވީ، ކޮންފަރެންސް އޮފް ދަ ޕާޓީސް ޓު ދަ ކޮންވެންޝަން އޮން ބަޔޮލޮޖިކަލް ޑައިވާސިޓީގެ ފަނަރަ ވަނަ ކޮންފަރެންސްގައި ދެއްވި ވީޑިއޯ މެސެޖުގައެވެ.
އެމަނިކުފާނު ވިދާޅުވީ، ރާއްޖެއަކީ "ޕޮލިޓިކަލް ވިޝަން: ދި 10 ޕޮއިންޓް ޕްލޭން ފޯ ފައިނޭންސިން ބަޔޯޑައިވާސިޓީ" ގެ ފައުންޑިން މެމްބަރެއް ކަމަށާއި، އިކުއެޑޯ، ގެބޮން އަދި އިނގިރޭސިވިލާތާއެކު ރާއްޖެއިން އިސްނަގައިގެން ކުރިއަށް ގެންދާ ޕްލޭނެއް ކަމަށެވެެ.
އެ ޕްލޭންގެ ލަނޑުދަނޑިތައް ހާސިލްކުރުމުގައި، ވެށި ހިމާޔަތްކުރުމަށާއި ގެއްލުންތައް ފޫބެއްދުމާއި ދެމެހެއްޓެނިވި ގޮތެއްގައި ބޭނުންކުރުމަށް، އެއްބާލުލުން ދެއްވުމަށް ފައިސަލް ވަނީ ސަރުކާރުތަކަށް ގޮވާލައްވާފަ އެވެ.
އެމަނިކުފާނު ވިދާޅުވީ، ގްލޯބަލް ބަޔޯޑަިއވަރސިޓީ ފްރޭމްވޯކް މަދު ދުވަސްކޮޅެއްގެ ތެރޭގައި އެކުލަވާލައި ނިންމުމަށް މަސައްކަތް ކުރެވެމުންދާއިރު، ދިރުންތައް ނެތިދިޔުމާއި، ލިބޭގެއްލުންތައް ހުއްޓުވައި، އަމަލީގޮތުން ކުރެވޭނެ ކަންކަމާއި ވަސީލަތްތައް ކަށަވަރުކުރުމަކީ ކޮންމެހެން ކުރަންޖެހޭ ކަމެއް ކަމަށެވެ.
އެގޮތުން އިންސާނުންގެ އަމަލުތަކުގެ ސަބަބުން، ގުދުރަތީ ނިޒާމްތައް ހަލާކުވެ، ދިރުންތައް މުޅިން ނެތި ފަނާވެގެން ނުދާނެކަން ކަށަވަރު ކޮށްދެއްވުމަށް ނައިބް ރައީސް ވަނީ ގޮވާލައްވާފަ އެވެ. އަދި ބައިނަލްއަގުވާމީ މުޖުތަމައުން ގުޅިގެން މަސައްކަތް ކުރުމަށް ވެސް އެމަނިކުފާނު ވަނީ ގޮވާލައްވާފަ އެވެ.
